ນາຍົກລັດຖະມົນຕີຄົນໃໝ່ຂອງຍີ່ປຸ່ນ ປະກາດຍຸບສະພາ ເປີດທາງເລືອກຕັ້ງທ້າຍເດືອນນີ້
ທ່ານ ຟູມິໂອະ ຄິຊິດະ ນາຍົກລັດຖະມົນຕີຄົນໃໝ່ຂອງຍີ່ປຸ່ນ ປະກາດຍຸບສະພາຜູ້ແທນລາຊະດອນແລ້ວຢ່າງເປັນທາງການໃນວັນທີ 14 ຕຸລານີ້ ເພື່ອເປີດທາງໃຫ້ມີການຈັດການເລືອກຕັ້ງທົ່ວໄປຂຶ້ນໃນທ້າຍເດືອນນີ້.
ການປະກາດຍຸບສະພາດັ່ງກ່າວມີຂຶ້ນຫລັງຈາກທ່ານ ຄິຊິດະ ຊະນະສຽງລົງຄະແນນໃນພັກເສລີປະຊາທິປະໄຕ (Liberal Democratic Party: LDP) ແລະ ເຂົ້າຮັບຕຳແໜ່ງໃນວັນທີ 4 ຕຸລາ ເຊິ່ງຈະສົ່ງຜົນໃຫ້ທ່ານກາຍເປັນນາຍົກລັດຖະມົນຕີຍີ່ປຸ່ນທີ່ປະກາດຍຸບສະພາຫລັງຮັບຕຳແໜ່ງໃນໄລຍະເວລາສັ້ນທີ່ສຸດພຽງ 10 ວັນ.
ເບື້ອງຕົ້ນຄາດວ່າການເລືອກຕັ້ງຈະຈັດຂຶ້ນໃນວັນທີ 31 ຕຸລາ ພາຍຫລັງສະພາຜູ້ແທນລາຊະດອນໝົດວາລະດຳລົງຕຳແໜ່ງ 4 ປີ ໃນວັນທີ 21 ຕຸລາ ເຊິ່ງຖືເປັນຄັ້ງທຳອິດໃນປະຫວັດສາດຍີ່ປຸ່ນຫລັງຍຸກສົງຄາມໂລກທີ່ການເລືອກຕັ້ງທົ່ວໄປຈະຈັດຂຶ້ນຫລັງຈາກ ສສ ປະຕິບັດໜ້າທີ່ຈົນຄົບວາລະ ໂດຍຄະນະລັດຖະບານຍີ່ປຸ່ນຈະມີການຈັດປະຊຸມໃນມື້ນີ້ ເພື່ອກຳນົດວັນເລືອກຕັ້ງຢ່າງເປັນທາງການ ກ່ອນການຫາສຽງເລືອກຕັ້ງຈະເລີ່ມຕົ້ນໄດ້ນັບແຕ່ວັນທີ 19 ຕຸລາ.
ທັງນີ້, ພັກ LDP ຄາດຫວັງວ່າ: ຜົນສຳເລັດຈາກການຄວບຄຸມສະຖານະການແຜ່ລະບາດຂອງໂຄວິດທີ່ບັນເທົາລົງໃນຕອນນີ້ ໂດຍມີຜູ້ຕິດເຊື້ອແຕ່ລະວັນຫລຸດຈາກ 25.000 ກວ່າຄົນ ໃນເດືອນສິງຫາ ເຫລືອປະມານ 600 ຄົນຕໍ່ວັນໃນອາທິດນີ້ ຈະຊ່ວຍໃຫ້ພັກໄດ້ຮັບການສະໜັບສະໜູນຈາກປະຊາຊົນຫລາຍຂຶ້ນ.
ຂະນະທີ່ທ່ານ ຢູກິໂອະ ເອດາໂນະ ຜູ້ນຳພັກລັດຖະທຳມະນູນປະຊາທິປະໄຕ (Constitutional Democratic Party: CDP) ເຊິ່ງເປັນພັກຝ່າຍຄ້ານຫລັກ ວິພາກວິຈານມາດຕະການຮັບມືໂຄວິດຂອງພັກ LDP ວ່າບໍ່ມີການປ່ຽນແປງ ແລະ ຍັງແລ່ນຕາມຫລັງຄົນອື່ນສະເໝີ.
ສຳລັບການເລືອກຕັ້ງທົ່ວໄປຄັ້ງໃໝ່ນີ້ ຈະເປັນໂອກາດຂອງທ່ານ ຄິິຊິດະ ໃນການໄດ້ຮັບສຽງສະໜັບສະໜູນຈາກປະຊາຊົນທີ່ມີຕໍ່ນະໂຍບາຍຫລັກຂອງທ່ານ ເຊິ່ງເນັ້ນການຟື້ນຟູເສດຖະກິດຂອງຍີ່ປຸ່ນທີ່ໄດ້ຮັບຜົນກະທົບໜັກຈາກວິກິດໂຄວິດ ຕະຫລອດຈົນນະໂຍບາຍເພີ່ມການຮັບມືການລະບາດທີ່ເຂັ້ມງວດຂຶ້ນ.
ເຊິ່ງໃນການເລືອກຕັ້ງຄັ້ງຫລ້າສຸດເດືອນຕຸລາ 2017 ພັກ LDP ແລະ ພັກໂຄເມ (Komeito) ເຊິ່ງເປັນພັກຮ່ວມລັດຖະບານ ຊະນະບ່ອນນັ່ງ ສສ ໃນສະພາ ຈຳນວນ 310 ບ່ອນນັ່ງ ຈາກທັງໝົດ 465 ບ່ອນນັ່ງ ໂດຍໃນການເລືອກຕັ້ງຄັ້ງນີ້ ທ່ານ ຄິຊິດະ ຕັ້ງເປົ້າວ່າພັກ LDP ແລະ ພັກຮ່ວມລັດຖະບານຈະໄດ້ບ່ອນນັ່ງ ສສ ຢ່າງໜ້ອຍ 233 ບ່ອນນັ່ງ ຫລື ເກີນເຄິ່ງໜຶ່ງ.
ອ້າງອີງ:
- https://english.kyodonews.net/news/2021/10/b1a05b6c5750-japans-kishida-to-dissolve-lower-house-for-general-election.html
- https://www3.nhk.or.jp/nhkworld/en/news/20211014_22/
