ມຽນມາຮຽກຮ້ອງປະຊາຊົນ ຢ່າແຕກຕື່ນໄວຣັສໄຂ້ຫວັດໝູ
ລັດຖະບານມຽນມາຂໍໃຫ້ປະຊາຊົນຢ່າແຕກຕື່ນຕໍ່ສະຖານະການເຊື້ອໄວຣັສໄຂ້ຫວັດໃຫຍ່ສາຍພັນ H1N1 ຫລື ໄຂ້ຫວັດໝູ ພາຍຫລັງມີລາຍງານການພົບຜູ້ຕິດເຊື້ອຢ່າງໜ້ອຍ 13 ຄົນພາຍໃນປະເທດ ແລະ ເສຍຊີວິດແລ້ວ 1 ຄົນ.
ສຳນັກຂ່າວຕ່າງປະເທດລາຍງານຈາກເມືອງຢາງກຸ້ງ ປະເທດມຽນມາ ໃນວັນທີ 25 ກໍລະກົດວ່າ: ກະຊວງສາທາລະນະສຸກ ແລະ ກິລາຂອງມຽນມາ ອອກຖະແຫລງໃນວັນທີ 24 ກໍລະກົດ ຢືນຢັນການພົບຜູ້ຕິດເຊື້ອໄວຣັສໄຂ້ຫວັດໃຫຍ່ສາຍພັນ H1N1 ຢ່າງໜ້ອຍ 13 ຄົນພາຍໃນປະເທດ, ໃນຈຳນວນນີ້ 3 ຄົນຢູ່ເມືອງຢາງກຸ້ງ ສ່ວນທີ່ເຫລືອຢູ່ເມືອງມະຕູປີ ໃນລັດຊິນ ເຊິ່ງຢູ່ທາງຕາເວັນຕົກ ແລະ ມີຊາຍແດນຕິດກັບອິນເດຍ ແລະ ຜູ້ຕິດເຊື້ອຢູ່ເມືອງມະຕູປີເສຍຊີວິດແລ້ວ 1 ຄົນ ເປັນເດັກນ້ອຍຜູ້ຊາຍອາຍຸ 6 ປີ.
ທ່ານໝໍ ວິນ ລາວິນ ຜູ້ອຳນວຍການສຳນັກງານສາທາລະນະສຸກເມືອງຢາງກຸ້ງ ເຊິ່ງເປັນເມືອງໃຫຍ່ທີ່ສຸດຂອງມຽນມາ ຮຽກຮ້ອງໃຫ້ປະຊາຊົນຢ່າແຕກຕື່ນຕໍ່ສະຖານະການທີ່ເກີດຂຶ້ນ ເນື່ອງຈາກເຊື້ອໄວຣັສໄຂ້ຫວັດໃຫຍ່ເປັນພະຍາດທີ່ເກີດຂຶ້ນ ແລະ ພົບຜູ້ຕິດເຊື້ອເປັນປະຈຳທຸກປີ ໂດຍສະເພາະໃນລະດູມໍລະສຸມ, ຂະນະທີ່ຜູ້ໃດສົງໄສວ່າຕິດເຊື້ອຂໍໃຫ້ໄປຫາໝໍ. ເຖິງຢ່າງໃດກໍຕາມ, ຊາວມຽນມາຈຳນວນຫລາຍຍັງບໍ່ໄດ້ຮັບການສັກວັກແຊງປະຈຳປີເພື່ອປ້ອງກັນໄວຣັສໄຂ້ຫວັດໃຫຍ່.
