ເປັນຫຍັງ ຫລາຍຄົນເບິ່ງ Bitcoin ມີຄ່າເປັນສູນ ເຖິງວ່າລາຄາສູງເຖິງ 55.000 ໂດລາ
Bitcoin ສ້າງສະຖິຕິໃໝ່ໃນຮອບຫລາຍເດືອນ, ແຕ່ຫລາຍຝ່າຍເຊື່ອມູນຄ່າແທ້ໆເທົ່າກັບສູນ.
ວັນທີ 7 ຕຸລາ, ຄຣິບໂຕເຄີເຣນຊີອັນດັບໜຶ່ງຄື Bitcoin ປັບຕົວຂຶ້ນອີກຢູ່ໃນລະດັບ 55.000 ໂດລາສະຫະລັດ ຫລັງຈາກຫລຸດລົງຢ່າງຮຸນແຮງໃນໄລຍະຜ່ານມາ ເນັ້ນເຖິງຄຳເວົ້າຂອງ Steve Hanke ນັກເສດຖະສາດຊື່ດັງຈາກອາເມລິກາ ແລະ ອີກຫລາຍຄົນທີ່ເຄີຍກ່າວວ່າ: ຄຣິບໂຕເຄີເຣນຊີ ໂດຍສະເພາະ Bitcoin ເປັນສິນຊັບທີ່ມີການເກັງກຳໄລສູງ, ມີການຜັນຜວນ ແລະ ບໍ່ມີມູນຄ່າທີ່ແທ້ຈິງ ຫລື ອາດກ່າວໄດ້ວ່າ: ມູນຄ່າທີ່ແທ້ຈິງຂອງມັນເປັນສູນ.
Hanke ສາສະດາຈານດ້ານເສດຖະສາດປະຍຸກຈາກມະຫາວິທະຍາໄລຈອນ ຮອບກິນ ໄດ້ອອກມາສະແດງຄວາມຄິດເຫັນຕໍ່ Bitcoin ຫລາຍເທື່ອ ພ້ອມເຕືອນນັກລົງທຶນໃຫ້ຫລີກລ່ຽງການລົງທຶນໃນສິນຊັບດິຈີຕອນດັ່ງກ່າວ ໂດຍເຊື່ອວ່າເມື່ອມີຂຶ້ນກໍຕ້ອງມີລົງ ແລະ ມື້ໜຶ່ງ Bitcoin ຈະຫລຸດລົງຢ່າງຮຸນແຮງ.
ເຊັ່ນດຽວກັບ Andrew Bailey ຜູ້ວ່າການທະນາຄານແຫ່ງປະເທດອັງກິດ ເຊິ່ງເຄີຍເຕືອນວ່າ: ຄຣິບໂຕເຄີເຣນຊີນັ້ນບໍ່ມີມູນຄ່າທີ່ແທ້ຈິງ ແລະ ຜູ້ຄົນຄວນຊື້ມັນຖ້າພວກເຂົາພ້ອມຈະເສຍເງິນເທົ່ານັ້ນ ລວມທັງ Donaid Trump ອະດີດປະທານາທິບໍດີອາເມລິກາ ທີ່ສະແດງຈຸດຢືນບໍ່ສະໜັບສະໜູນ Bitcoin ແລະ ສະກຸນເງິນດິຈີຕອນມາໂດຍຕະຫລອດ ໂດຍເບິ່ງວ່າມັນບໍ່ແມ່ນເງິນ ເພາະມູນຄ່າຂອງພວກມັນຜັນຜວນຫລາຍ.
“ມັນອາດຈະເປັນເລື່ອງຫລອກລວງກໍໄດ້ ໃຜຈະຮູ້ວ່າ ຄວາມຈິງແລ້ວພວກມັນຄືຫຍັງ, ມູນຄ່າແທ້ຈິງເທົ່າໃດ, ປອດໄພ ຫລື ບໍ່ ແນ່ນອນວ່າເປັນສິ່ງທີ່ຄົນບໍ່ຄ່ອຍຮູ້ຈັກຫລາຍ”
ນອກຈາກນີ້ ຍັງມີການ “ປັ່ນ” ຄວາມສົນໃຈໃນການລົງທຶນແບບບ້າຄັ່ງ ເຊິ່ງສົ່ງຜົນຕໍ່ການຜັນຜວນຂອງລາຄາ ໂດຍ Bitcoin ແລະ ຄຣິບໂຕເຄີເຣນຊີອື່ນໆ ເໝືອນສິນຊັບທົ່ວໄປທີ່ມີການລົງທຶນ ແລະ ເກັງກຳໄລ ຈຶ່ງບໍ່ອາດຫລຸດພົ້ນພາວະຟອງສະບູໄປໄດ້.
ໂດຍ Gabriel Makhlouf ຜູ້ວ່າການທະນາຄານກາງໄອແລນ ໄດ້ນຳໄປປຽບທຽບກັບ Tulip Mania ໃນປີ 1636 ກໍລະນີສຶກສາພາວະຟອງສະບູແຕກຄັ້ງທຳອິດຂອງໂລກ ທີ່ຜູ້ຄົນທຸ້ມເງິນໄປກັບການຊື້ທິວລິບ ເພາະພວກເຂົາເຊື່ອວ່າມັນຄືການລົງທຶນ.
ນອກຈາກການຜັນຜວນທີ່ບໍ່ສາມາດຄາດການໄດ້ແລ້ວ Hanke ຍັງເບິ່ງວ່າ: Bitcoin ມີຄວາມສ່ຽງຕໍ່ການຖືກສໍ້ໂກງນຳອີກ ໂດຍກ່ອນໜ້ານີ້ Bitcoin ຖືກນຳມາໃຊ້ໃນເລື່ອງຜິດກົດໝາຍ ເຊັ່ນການແຮັກລະບົບຄອມພິວເຕີ ເພື່ອຮຽກຄ່າໄຖ່ຫລາຍເທື່ອ ແລະ ຫລາຍຝ່າຍຍັງກັງວົນວ່າ: Bitcoin ຈະຖືກຄວບຄຸມໂດຍລັດຖະບານໃນອະນາຄົດ.
ໃນທາງກົງກັນຂ້າມ Anthony Scaramucci ຜູ້ບໍລິຫານຂອງ SkyBridge Capital ບໍລິສັດລົງທຶນລະດັບໂລກເບິ່ງວ່າ: ການຜັນຜວນນັ້ນເປັນເລື່ອງປົກກະຕິ ເຊິ່ງ Bitcoin ມີການຜັນຜວນສູງ ເນື່ອງຈາກຍັງຢູ່ໃນໄລຍະເລີ່ມຕົ້ນ.
ພ້ອມຍົກຕົວຢ່າງ Amazon ທີ່ຕອນນີ້ເປັນບໍລິສັດຍັກໃຫຍ່ທີ່ມີອິດທິພົນ, ແຕ່ຖ້າຢ້ອນກັບໄປເມື່ອ 20 ກວ່າປີກ່ອນ ກໍມີການຜັນຜວນເຊັ່ນກັນ, ແຕ່ຖ້າທ່ານເອົາເງິນ 10.000 ໂດລາສະຫະລັດ ໄປຊື້ຫຸ້ນ Amazon ທ່ານຈະມີເງິນປະມານ 30 ລ້ານໂດລາສະຫະລັດ ໃນຕອນນີ້.
ຂະນະທີ່ຍັງມີບັນດາບໍລິສັດ ແລະ ນັກລົງທຶນອີກຈຳນວນຫລາຍທີ່ສະໜັບສະໜູນ Bitcoin ລວມທັງລັດຖະບານ ຄືປະເທດເອຊັນວາດໍທີ່ປະກາດໃຫ້ Bitcoin ເປັນສະກຸນເງິນທີ່ສາມາດຊຳລະໜີ້ໄດ້ຕາມກົດໝາຍ.
ຫລ້າສຸດ ມູນຄ່າຂອງ Bitcoin ສ້າງສະຖິຕິສູງສຸດໃນຮອບ 5 ເດືອນ ເມື່ອມີຂ່າວວ່າກອງທຶນຂອງພໍ່ມົດການເງິນ George Soros ເຂົ້າລົງທຶນໃນ Bitcoin ແລ້ວ. ຂະນະທີ່ນັກລົງທຶນເລີ່ມຄຸ້ນເຄີຍກັບການຜັນຜວນໃນຕະຫລາດຄຣິບໂຕເຄີເຣນຊີ.
ອ້າງອີງ:
