ເຈົ້າໜ້າທີ່ຕຳຫລວດ ຈັບເປົ້າໝາຍ ຄ້າ-ຂາຍ ຢາເສບຕິດໄດ້ ໃນຂະນະທີ່ຕັ້ງດ່ານກວດກາການສັນຈອນໄປ-ມາ

ອີງຕາມກອງບັນຊາການ ປກສ ນະຄອນຫລວງວຽງຈັນລາຍງານວ່າ: ເຈົ້າໜ້າທີ່ຕຳຫລວດ ສະຖານນີຮັບແຈ້ງ ແລະ ແກ້ໄຂເຫດສຸກເສີນ 1191 ຫົວເມືອງ ສົມທົບກັບ ປກສ ກຸ່ມສີຖານເໜືອ ແລະ ເຈົ້າໜ້າທີ່ຕຳຫລວດຈະລາຈອນ ປກສ ເມືອງສີໂຄດຕະບອງ ນະຄອນຫລວງວຽງຈັນ ໄດ້ຕັ້ງຈຸດກວດກາ ຢູ່ຕໍ່ໜ້າສວນເຈົ້າຟ້າງຸ່ມ  ໃນວັນທີ 8 ຕຸລາ 2021, ໄດ້ພົບເຫັນລົດຈັກ ເວບໄອສີຟ້າປອນ ໝາຍເລກທະບຽນ ຍຫ 5754 ກຳແພງນະຄອນ ຂັບຂີ່ໂດຍ ນາງ ສົມຈິດ ອາຍຸ 38 ປີ ອາຊີບ ຫວ່າງງານ ບ້ານໜອງດ້ວງທົ່ງ ເມືອງສີໂຄດຕະບອງ ນະຄອນຫລວງວຽງຈັນ ຂັບຂີ່ມາແຕ່ທາງຂຸນຕາ ມຸ້ງໜ້າຈະຜ່ານດ່ານກວດກາ ໄປທາງວິທະຍໄລປາກປາສັກ ດັ່ງນັ້ນ, ເຈົ້າໜ້າທີ່ ຈິ່ງຂໍກວດກາຜູ້ກ່ຽວແຕ່ຜູ້ກ່ຽວເຮັດທ່າທາງມີພິລຸດ ເຈົ້າໜ້າທີ່ຈຶ່ງຂໍຄົ້ນຕົວ ພົບເຫັນຢາບ້າຈຳນວນ 210 ເມັດ ຢູ່ໃນກະເປົາພາຍຂອງຜູ້ກ່ຽວ.

ຈາກນັ້ນ, ເຈົ້າໜ້າທີ່ປະຈຳຈຸດດັ່ງກ່າວ ຈິ່ງໄດ້ນຳສົ່ງຕົວຜູ້ກ່ຽວໃຫ້ ກອງບັນຊາການ ປກສ ເມືອງສີໂຄດຕະບອງ ນະຄອນຫລວງວຽງຈັນ ເພື່ອສືບຕໍ່ເປີດກວ້າງຂະຫຍາຍຜົນຫາກຸ່ມແກ້ງພັກພວກ ມາດຳເນີນຄະດີ.

ກອງບັນຊາການ ປກສ ນະຄອນຫລວງວຽງຈັນ ຮຽກຮ້ອງມາຍັງພົນລະເມືອງທຸກຄົນ ໃຫ້ມີສ່ວນຮ່ວມເຂົ້າໃນວຽກງານຮັກສາຄວາມສະຫງົບ ເພື່ອຊ່ວຍສະກັດກັ້ນການກະທຳທີ່ແຕະຕ້ອງສາຍພົວພັນສັງຄົມ ທີ່ກົດໝາຍກຳນົດໄວ້ ຖ້າພົບເຫັນປະກົດການຫຍໍ້ທໍ້ຕ່າງໆເກີດຂຶ້ນສາມາດ ແຈ້ງມາທາງເບີວອ໋ດແອັບ 020 28899774.