ສ.ເກົາຫລີ ກຽມສັກວັກຊີນຕ້ານໂຄວິດໃຫ້ຜູ້ຍິງຖືພາ ທ່າມກາງຄວາມພະຍາຍາມບັນລຸເປົ້າໝາຍ ສັກວັກຊີນປະຊາກອນຜູ້ໃຫຍ່ 80%
ສ.ເກົາຫລີ ເດີນໜ້າຄວາມພະຍາຍາມໃນການເລັ່ງສັກວັກຊີນໃຫ້ປະຊາຊົນຜູ້ໃຫຍ່ຕາມເປົ້າໝາຍ 80% ພາຍໃນເດືອນຕຸລານີ້ ໂດຍກຽມເປີດໃຫ້ກຸ່ມຜູ້ຍິງຖືພາລົງທະບຽນຈອງຄິວເພື່ອເຂົ້າຮັບການສັກວັກຊີນໄດ້ນັບແຕ່ວັນທີ 8 ຕຸລາ.
ໂດຍສຳນັກງານຄວບຄຸມ ແລະ ປ້ອງກັນພະຍາດລະບາດແຫ່ງ ສ.ເກົາຫລີ (Korea Disease Control and Prevention Agency: KDCA) ເປີດເຜີຍວ່າ: ຜູ້ຍິງຖືພາຈະສາມາດລົງທະບຽນຈອງສັກວັກຊີນຕ້ານໂຄວິດໄດ້ໃນວັນທີ 8 ຕຸລາ ກ່ອນຈະເລີ່ມຕົ້ນການສັກວັກຊີນນັບແຕ່ວັນທີ 18 ຕຸລາ ເຊິ່ງວັກຊີນທີ່ນຳມາໃຊ້ມີທັງວັກຊີນ Pfizer ແລະ Moderna ເຊິ່ງ KDCA ເຊື່ອໝັ້ນວ່າມີຄວາມປອດໄພ ແລະ ສາມາດຫລຸດຄວາມສ່ຽງໃນການຕິດເຊື້ອໂຄວິດ.
ທັງນີ້, ໜ່ວຍງານສາທາລະນະສຸກ ສ.ເກົາຫລີ ເປີດເຜີຍວ່າ: ກຸ່ມຜູ້ຍິງຖືພານັ້ນມີຄວາມສຳຄັນ ແລະ ເປັນກຸ່ມສ່ຽງທີ່ອາດມີອາການຮຸນແຮງ ຫລື ເຖິງຂັ້ນເສຍຊີວິດ ຖ້າໄດ້ຮັບເຊື້ອໂຄວິດ ເຊິ່ງທາງການພະຍາຍາມຊຸກຍູ້ໃຫ້ເຂົ້າຮັບການສັກວັກຊີນ ໂດຍໄດ້ມີການດຳເນີນງານ ທັງປະກາດແຈ້ງ ແລະ ຖະແຫລງຂ່າວ.
ຈົນຮອດເດືອນສິງຫາຜ່ານມາ, ມີຜູ້ຍິງຖືພາໃນ ສ.ເກົາຫລີ ຕິດເຊື້ອໂຄວິດແລ້ວ 731 ຄົນ ໃນຈຳນວນນີ້ປະມານ 2% ມີອາການຮຸນແຮງ ເຊິ່ງຫລາຍກວ່າກຸ່ມຜູ້ຍິງອາຍຸ 20-45 ປີເຖິງ 6 ເທົ່າ.
ເຖິງຢ່າງໃດກໍຕາມ, ເຈົ້າໜ້າທີ່ແນະນຳວ່າ: ຜູ້ທີ່ມີອາຍຸຄັນນ້ອຍກວ່າ 12 ອາທິດ ຄວນປຶກສາແພດກ່ອນເຂົ້າຮັບການສັກວັກຊີນ.
ປັດຈຸບັນມີປະຊາກອນຜູ້ໃຫຍ່ໃນ ສ.ເກົາຫລີ ໄດ້ຮັບການສັກວັກຊີນຄົບໂດສແລ້ວປະມານ 63% ຈາກຈຳນວນປະຊາກອນທັງໝົດປະມານ 52 ລ້ານຄົນ ເຊິ່ງທາງການ ສ.ເກົາຫລີ ຕັ້ງເປົ້າໃຫ້ກຸ່ມປະຊາກອນຜູ້ໃຫຍ່ໄດ້ຮັບການສັກວັກຊີນຄົບໂດສເຖິງ 80% ພາຍໃນເດືອນຕຸລານີ້.
ຂະນະທີ່ໃນເດືອນພະຈິກນີ້ ລັດຖະບານ ສ.ເກົາຫລີ ຍັງມີແຜນເລີ່ມຕົ້ນການສັກວັກຊີນຕ້ານໂຄວິດໃຫ້ເດັກອາຍຸ 12-17 ປີ ແລະ ສັກວັກຊີນເຂັມກະຕຸ້ນໃຫ້ກຸ່ມຜູ້ສູງອາຍຸ ທີ່ອາຍຸແຕ່ 75 ປີຂຶ້ນໄປ ລວມທັງກຸ່ມສ່ຽງສູງອື່ນໆເຊັ່ນ: ບຸກຄະລາກອນທາງການແພດ ແລະ ເຈົ້າໜ້າທີ່ແນວໜ້າ.
ອ້າງອີງ:
