ອົດສະຕຣາລີຍັງບໍ່ຜ່ານຈຸດສູງສຸດ ໂຄວິດຮອບຫລ້າສຸດ ຂະນະທີ່ເມລເບິນ ກຽມສ້າງສະຖິຕິເປັນເມືອງທີ່ລັອກດາວ ຍາວນານທີ່ສຸດໃນໂລກ

ວັນທີ 4 ຕຸລາ 2021, ອົດສະຕຣາລີຍັງບໍ່ຜ່ານພົ້ນຈຸດສູງສຸດຂອງການແຜ່ລະບາດໂຄວິດຮອບຫລ້າສຸດ ຜູ້ຕິດເຊື້ອໃໝ່ຍັງເພີ່ມສູງຂຶ້ນຢ່າງຕໍ່ເນື່ອງ ຜະຕິດເຊື້ອສະເລ່ຍໃນໄລຍະ 7 ວັນຫລ້າສຸດມີ 1.800 ຄົນ. ຂະນະທີ່ເມວເບິນກຽມສ້າງສະຖິຕິເປັນເມືອງທີ່ລັອກດາວຍາວນານທີ່ສຸດໃນໂລກ.

ໂດຍໃນວັນທີ 5 ຕຸລາ, ເມວເບິນຈະສ້າງສະຖິຕິແຊງນະຄອນຫລວງບົວໂນດໄອເຣສຂອງອາເຈນຕິນາທີ່ມີສະຖິຕິລັອກດາວ 245 ວັນ ໂດຍເມວເບິນຈະລັອກດາວໄປຈົນຮອດວັນທີ 28 ຕຸລານີ້ (ລວມ 270 ວັນ).

ຫລ້າສຸດ ອົດສະຕຣາລີມີຍອດຜູ້ຕິດເຊື້ອສະສົມ 1,1 ແສນຄົນ, ເສຍຊີວິດແລ້ວ 1.334 ຄົນ ທາງການເດີນໜ້າສັກວັກຊີນຕ້ານໂຄວິດໃຫ້ພົນລະເມືອງແລ້ວ 28,6 ລ້ານໂດສ, ກວ່າ 46% ຂອງພົນລະເມືອງທົ່ວປະເທດເຂົ້າຮັບການສັກວັກຊີນຄົບໂດສແລ້ວ.

ທາງການລັດຕ່າງໆໃນອົດສະຕຣາລີກຽມບັງຄັບໃຊ້ມາດຕະການໃຫ້ທຸລະກິດ ແລະ ອົງກອນຕ່າງໆເບິ່ງແຍງເລື່ອງການເຂົ້າຮັບການສັກວັກຊີນຕ້ານໂຄວິດ ເພື່ອສະໜັບສະໜູນການສ້າງພູມຕ້ານທານກຸ່ມພາຍໃນອົດສະຕຣາລີ ເພື່ອຮັບມືກັບພະຍາດລະບາດທີ່ແຜ່ລະບາດມາເກືອບ 2 ປີ. ອີກທັງອາດຈຳເປັນຕ້ອງໃຊ້ QR Code ຫລື ເອກະສານຈາກທາງການທີ່ຮັບຮອງການເຂົ້າຮັບວັກຊີນໃນການເຂົ້າເຮັດວຽກ ຫລື ເຂົ້າໃຊ້ບໍລິການໃນບາງສະຖານທີ່, ຜູ້ໃດບໍ່ປະຕິບັດຕາມອາດມີໂທດປັບໃໝ 1.000 ໂດລາສະຫະລັດ ຫລື 5.000 ໂດລາສະຫະລັດ ສຳລັບອົງກອນທີ່ຝ່າຝືນ.

ອ້າງອີງ:

https://www.theguardian.com/…/nsw-reports-dramatic-drop…

https://www.9news.com.au/…/e159d5b5-2d0f-452a-adb3…

https://coronavirus.jhu.edu/region/australia