ຫາກມີກໍລະນີທີ່ຄົນເຈັບລົ້ນໂຮງໝໍ ແມ່ນຈະໃຫ້ຈໍາກັດບໍລິເວນຢູ່ເຮືອນ ແລະ ປິ່ນປົວຢູ່ເຮືອນສໍາລັບຜູ້ບໍ່ມີອາການ

ທ່ານ ດຣ ຣັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່ ລາຍງານໃນວັນທີ 4 ຕຸລາ 2021 ນີ້ວ່າ: ປັດຈຸບັນສະພາບຂອງການແພ່ລະບາດໂຄວິດ-19 ໃນປະເທດເຮົາແມ່ນພົບຢູ່ໃນຊຸມຊົນ, ເຊິ່ງເຮັດໃຫ້ມີຈໍານວນຜູ້ຕິດເຊື້ອຈໍານວນຫລວງຫລາຍທີ່ຈະຕ້ອງໄດ້ເຂົ້າໄປນອນຮັກສາປິ່ນປົວໃນໂຮງໝໍຕ່າງໆໃນນະຄອນຫລວງວຽງຈັນ ກໍຄືຫລາຍແຂວງທີ່ກໍາລັງປະເຊີນໜ້າຕໍ່ການລະບາດ ຕໍ່ສະພາບການດັ່ງກ່າວ ທາງກະຊວງສາທາລະນະສຸກ ກໍຄື ພະແນກສາທາລະນະສຸກໃນແຕ່ລະແຂວງໄດ້ຄົ້ນຄວ້າ ແລະ ຈັດສັນໂຮງໝໍພາກສະໜາມຂື້ນຢູ່ຫລາຍແຫ່ງ ແຕ່ກໍຍັງບໍ່ສາມາດຕອບສະໜອງໄດ້ຕໍ່ຄວາມຮຽກຮ້ອງຕ້ອງການຂອງສັງຄົມ ຄືການມາຮັບຄົນເຈັບໄວ, ການຈັດຫາຕຽງນອນໃຫ້ແກ່ຄົນເຈັບໃນໄລຍະຮີບດ່ວນ.

ຕໍ່ສະພາບດັ່ງກ່າວຈຶ່ງຂໍແຈ້ງມູນເບື້ອງຕົນກ່ຽວກັບການຈໍາກັດບໍລິເວນຢູ່ເຮືອນ ແລະ ການປິ່ນປົວຢູ່ກັບເຮືອນສໍາລັບຜູ້ບໍ່ມີອາການໃນກໍລະນີທີ່ຄົນເຈັບລົ້ນໂຮງໝໍ, ໂດຍມາດຕະການດັ່ງກ່າວນີ້ຍັງບໍ່ທັນໄດ້ຖືກຈັດຕັ້ງເທື່ອເນື່ອງຈາກ ສູນຈໍາກັດບໍລິເວນ ແລະ ສະຖານທີບໍລິການປິ່ນປົວໃນປັດຈຸບັນກໍຍັງຮອງຮັບໄດ້ຢູ່.

ເຊິ່ງການຈໍາກັດບໍລິເວນຢູ່ເຮືອນ ແມ່ນສໍາລັບຜູ້ທີ່ເປັນຜູ້ສໍາຜັດໃກ້ຊິດກັບຜູ້ຕິດເຊື້ອ ແລະ ມີຫ້ອງສໍາລັບຈໍາກັດບໍລິເວນ ລວມທັງຫ້ອງນໍ້າ ທີ່ ແຍກອອກເປັນຂອງຕົນເອງ: ສິ່ງທີ່ທ່ານຄວນປະຕິບັດແມ່ນ: ຢູ່ເຮືອນ 14 ວັນ ນັບຫລັງຈາກມື້ທີ່ເລີມສໍາຜັດ; ເຝົ້າລະວັງອາການຕົນເອງ ວ່າມີອາການໄຂ້ 37,5 ຂຶ້ນເມື່ອ, ມີອາການໄອ, ຫາຍໃຈຍາກ, ດັງບໍ່ໄດ້ກິ່ນ, ລີ້ນບໍ່ຮູ້ລົດຊາດ; ໃຫ້ທ່ານຢູ່ຫ່າງຈາກຄົນໃນຄອບຄົວທີ່ອາໃສຢູ່ນໍາກັນ ໂດຍສະເພາະຜູ້ທີ່ມີປັດໃຈສ່ຽງສູງທີ່ຈະຕິດເຊື້ອ ໂຄວິດ-19; ຫລັງຈາກການຈໍາກັດບໍລິເວນແລ້ວ: ແມ່ນໃຫ້ທ່ານເຝົ້າລະວັງອາການທ່ານຕື່ມອີກ 14 ວັນ; ຖ້າທ່ານມີອາການ ໃຫ້ທ່ານແຍກປ່ຽວຕົນເອງທັນທີ ແລະ ຕິດຕໍ່ຫາ ສາຍດ່ວນ 165/166 ຫລື ເຂົ້າໄປປືກສາແພດໝໍທີ່ຢູ່ໃກ້ບ້ານທ່ານ.

ສ່ວນການປິ່ນປົວຕົນເອງຢູ່ເຮືອນ ແມ່ນອະນຸຍາດສະເພາະຄົນເຈັບທີ່ຕິດເຊື້ອ ໂຄວິດ-19 ບໍ່ມີອາການຫຍັງ ຫລື ເບົາບາງ, ແຕ່ຕ້ອງມີຫ້ອງນອນ ແລະ ຫ້ອງນໍ້າໃຊ້ສະເພາະຕົນເອງ, ສິ່ງທີ່ທ່ານຄວນປະຕິບັດແມ່ນ: ຕິດຕາມອາການຕົນເອງ, ຖ້າທ່ານມີອາການຮຸນແຮງ ເຊັນ ຫາຍໃຈຍາກ ແມ່ນໃຫ້ໂທຫາແພດຫລືໄປໂຮງໝໍທັນທີ; ແຍກຫ້ອງຢູ່ ຈາກສະມາຊິກພາຍໃນເຮືອນ; ໃຊ້ຫ້ອງນໍ້າແຍກກັນ; ບໍ່ໃຫ້ໃຊ້ສິ່ງຂອງຮ່ວມກັນ; ຕ້ອງໃສ່ຜ້າປິດປາກ-ດັງ.

ການອະນຸຍາດໃຫ້ຄົນເຈັບທີ່ບໍ່ມີອາການ ສາມາດປິ່ນປົວຕົນເອງໄດ້ຢູເຮືອນກໍແມ່ນເພື່ອຫລຸດຜ່ອນຄົນເຈັບທີ່ຕິດເຊື້ອແຕ່ມີອາການເບົາບາງ ແລະ ສຸມໃສ່ການດູແລ ປິ່ນປົວກໍລະນີໜັກ, ຄົນເຈັບທີ່ມີພະຍາດປະຈໍາຕົວ. ຄົນເຈັບທີ່ສູງອາຍຸ ເພື່ອບໍ່ຫລຸດຜ່ອນການເສຍຊິວິດໃຫ້ໜ້ອຍທີ່ສຸດ