ສປປ ເກົາຫລີ ບໍ່ພໍໃຈ UNSC ສອງມາດຕະຖານເລື່ອງທົດລອງອາວຸດ ເມື່ອອາເມລິກາທົດລອງພັດງຽບ
ກອງປະຊຸມຂອງ UNSC ສ້າງຄວາມບໍ່ພໍໃຈໃຫ້ ສປປ ເກົາຫລີ ທີ່ອ້າງວ່າມີການທົດລອງອາວຸດເພື່ອປ້ອງກັນປະເທດ.
ວັນທີ 3 ຕຸລາ 2021, ສຳນັກຂ່າວຣອຍເຕີ (Reuters) ລາຍງານຄຳໃຫ້ສຳພາດຂອງທ່ານ ໂຈຊໍຊູ ຜູ້ອຳນວຍການຝ່າຍອົງກອນນາໆຊາດ ກະຊວງການຕ່າງປະເທດ ສປປ ເກົາຫລີ ທີ່ອອກມາໂຈມຕີຄະນະມົນຕີຄວາມໝັ້ນຄົງແຫ່ງສະຫະປະຊາຊາດ (UNSC) ວ່າມີທ່າທີສອງມາດຕະຖານ ໃນການສະແດງອອກຕໍ່ກິດຈະກຳທາງການທະຫານຂອງປະເທດສະມາຊິກ.
ພາຍຫລັງ ສປປ ເກົາຫລີ ປະກາດຢືນຢັນການທົດລອງອາວຸດຊະນິດໃໝ່ຢ່າງຕໍ່ເນື່ອງ, ທາງ UNSC ໄດ້ມີການຮຽກປະຊຸມເຖິງເລື່ອງດັ່ງກ່າວ ໂດຍມີອາເມລິກາ, ອັງກິດ ແລະ ຝຣັ່ງເປັນຜູ້ຮ້ອງຂໍ.
ເລື່ອງດັ່ງກ່າວເຮັດໃຫ້ ສປປ ເກົາຫລີ ຮູ້ສຶກບໍ່ພໍໃຈ ໂດຍທ່ານ ໂຈ ໄດ້ອອກມາເປີດເຜີຍຜ່ານສື່ຂອງລັດຖະບານ ສປປ ເກົາຫລີ KCNA ວ່າ: ກໍລະນີທີ່ UNSC ຈັດປະຊຸມໃນລັກສະນະນີ້ເປັນການສະແດງຄວາມເມີນເສີຍຢ່າງເປີດເຜີຍ ແລະ ເປັນການລຸກລ້ຳເອກະລາດຢ່າງປ່າເຖື່ອນ.
ທ່ານ ໂຈ ຍັງໄດ້ໂຈມຕີວ່າ: UNSC ມີພຶດຕິກຳສອງມາດຕະຖານ ເພາະເມື່ອອາເມລິກາມີການຝຶກປະສົມ ແລະ ທົດລອງອາວຸດຮ່ວມກັບປະເທດພັນທະມິດ ພັດບໍ່ສະແດງທ່າທີຫຍັງ, ແຕ່ພັດມີບັນຫາເວລາ ສປປ ເກົາຫລີ ພະຍາຍາມຝຶກຊ້ອມເພື່ອປ້ອງກັນຕົນເອງ.
ເຖິງຢ່າງໃດກໍຕາມ, ການອອກມາຕອບໂຕ້ໃນລັກສະນະດັ່ງກ່າວບໍ່ແມ່ນເລື່ອງໃໝ່ແຕ່ຢ່າງໃດສຳລັບ ສປປ ເກົາຫລີ ທີ່ຖືກອອກມາດຕະການຂວ້ຳບາດມາແຕ່ການທົດລອງນິວເຄຼຍຄັ້ງທຳອິດໃນປີ 2006 ແລະ ເພີ່ມຄວາມເຂັ້ມຂຸ້ນຂອງມາດຕະການຂຶ້ນຫລັງທົດລອງລູກສອນໄຟຂ້າມທະວີບ ທີ່ມີໄລຍະຍິງເຖິງອາເມລິກາໄດ້ໃນປີ 2017.
ຖ້າຢ້ອນກັບໄປເມື່ອຕົ້ນປີ ຕອນທີ່ ສປປ ເກົາຫລີ ທົດລອງລູກສອນໄຟຄັ້ງທຳອິດນັບແຕ່ປະທານາທິບໍດີ ໂຈ ໄບເດນ ເຂົ້າມາຮັບຕຳແໜ່ງ, ໃນຄັ້ງນີ້ ສປປ ເກົາຫລີ ໄດ້ອອກມາໂຈມຕີໂດຍໃຊ້ຄຳວ່າ: ສອງມາດຕະຖານ ຕໍ່ອົງການສະຫະປະຊາຊາດ (UN) ເຊັ່ນກັນ ພ້ອມຂູ່ວ່າຈະຕາມມາດ້ວຍຜົນລັບທີ່ຮຸນແຮງ.
ອ້າງອີງ:
https://www.reuters.com/…/nkorea-says-un-security…/
