ສປປ ເກົາຫລີ ທົດລອງລູກສອນໄຟຕໍ່ສູ້ເຮືອບິນລຸ້ນໃໝ່ ເນັ້ນການເລັ່ງພັດທະນາອາວຸດທີ່ມີເຕັກໂນໂລຊີສັບຊ້ອນ
KCNA ສື່ທາງການຂອງ ສປປ ເກົາຫລີ ລາຍງານໃນວັນທີ 1 ຕຸລາວ່າ: ສປປ ເກົາຫລີ ຍິງລູກສອນໄຟຕໍ່ສູ້ເຮືອບິນ ເຊິ່ງເປັນອາວຸດທີ່ພັດທະນາຂຶ້ນໃໝ່ໃນວັນທີ 30 ກັນຍາ ເຊິ່ງຖືເປັນການທົດລອງອາວຸດຄັ້ງທີ 2 ໃນຮອບອາທິດນີ້ ຫລັງຈາກທົດລອງລູກສອນໄຟໄຮເປີໂຊນິກໄປໃນວັນທີ 30 ກັນຍາ.
ກ່ອນໜ້ານີ້ ສປປ ເກົາຫລີ ຍັງມີການທົດລອງລູກສອນໄຟໄລຍະໃກ້ ແລະ ຈະຫລວດທີ່ສາມາດຕິດຕັ້ງຫົວຮົບນິວເຄຼຍໄດ້ ເຊິ່ງເຮັດໃຫ້ແຫລມເກົາຫລີກັບມາເຄັ່ງຮ້ອນອີກ. ຂະນະທີ່ ສ.ເກົາຫລີ ຫາກໍທົດລອງລູກສອນໄຟຈາກເຮືອດຳນ້ຳໃນໄລຍະເວລາໄລ່ລຽງກັນ.
ການເຄື່ອນໄຫວໃນຫລາຍອາທິດຜ່ານມາ ເນັ້ນໃຫ້ເຫັນການເລັ່ງພັດທະນາອາວຸດທີ່ມີເຕັກໂນໂລຊີສັບຊ້ອນຂອງ ສປປ ເກົາຫລີ ໂດຍສະຖາບັນວິທະຍາສາດການປ້ອງກັນ ເຊິ່ງເປັນຜູ້ພັດທະນາອາວຸດກອງທັບຂອງ ສປປ ເກົາຫລີ ເປີດເຜີຍວ່າ: ການທົດລອງຄັ້ງນີ້ມີຈຸດມຸ່ງໝາຍເພື່ອຢືນຢັນການນຳໃຊ້ຕົວຈິງຂອງເຄື່ອງຍິງລູກສອນໄຟ, ລະບົບເຣດາ ແລະ ຍານບັນຊາການຮົບ ລວມທັງປະສິດທິພາບໃນການສູ້ຮົບ.
ນອກຈາກນີ້, ສະຖາບັນດັ່ງກ່າວຍັງລະບຸອີກວ່າ: ລູກສອນໄຟຕໍ່ສູ້ເຮືອບິນລຸ້ນໃໝ່ນີ້ມີລະບົບຄວບຄຸມທີ່ແນ່ນອນ. ອີກທັງຕອບສະໜອງໄດ້ວ່ອງໄວ ແລະ ສາມາດເພີ່ມໄລຍະທາງໃນການໂຈມຕີເປົ້າໝາຍທາງອາກາດໄດ້ນຳອີກ.
ອ້າງອີງ:
