ສປປ ລາວ-ອົດສະຕຣາລີ ສືບຕໍ່ຮ່ວມມືດ້ານສິດທິມະນຸດ

ກອງປະຊຸມສົນທະນາດ້ານສິດທິມະນຸດຄັ້ງທີ 5 ລະຫວ່າງລາວ ແລະ ອົດສະຕຣາລີ, ໄດ້ຈັດຂຶ້ນໃນອາທິດທີ່ຜ່ານມານີ້ທີ່ນະຄອນຫລວງວຽງຈັນ, ຝ່າຍລາວນຳໂດຍທ່ານ ພູໂຂງ ສີສຸລາດ ຫົວໜ້າກົມສົນທິສັນຍາ ແລະ ກົດໝາຍ ກະຊວງການຕ່າງປະເທດ, ໂດຍມີເຈົ້າໜ້າທີ່ຂັ້ນສູງຈາກສະພາແຫ່ງຊາດ, ກະຊວງຍຸຕິທຳ, ກະຊວງປ້ອງກັນຄວາມສະຫງົບ, ສານປະຊາຊົນສູງສຸດ, ສານປະຊາຊົນນະຄອນຫລວງວຽງຈັນ, ກະຊວງພາຍໃນ, ສູນກາງແນວລາວສ້າງຊາດ, ສູນກາງສະຫະພັນແມ່ຍິງລາວ, ກະຊວງແຮງງານ ແລະ ສະຫວັດດີການສັງຄົມ, ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ແລະ ບັນດາກົມກ່ຽວຂ້ອງໃນກະຊວງການຕ່າງປະເທດ ແລະ ຝ່າຍອົດສະຕາລີນຳໂດຍທ່ານ ແລກລານ ສຕຣາຮັນ (Lachlan Strahan) ຜູ້ຊ່ວຍລັດຖະມົນຕີ, ຫົວໜ້າກົມນະໂຍບາຍຫລາຍຝ່າຍ ກະຊວງການຕ່າງປະເທດ ແລະ ການຄ້າ, ພ້ອມດ້ວຍເຈົ້າໜ້າທີ່ຂັ້ນສູງຈາກກະຊວງການຕ່າງປະເທດ ແລະ ການຄ້າ, ຄະນະກຳມາທິການສິດທິມະນຸດອົດສະຕຣາລີ, ທ່ານ ຈອນ ວິນລຽມ ເອກອັກຄະລັດຖະທູດອົດສະຕຣາປະຈຳລາວ ເຂົ້າຮ່ວມນໍາດ້ວຍ.

ໃນກອງປະຊຸມສອງຝ່າຍໄດ້ແລກປ່ຽນຫລາຍຫົວຂໍ້ກ່ຽວກັບການສົ່ງເສີມ ແລະ ປົກປ້ອງສິດທິມະນຸດ ທີ່ສອງຝ່າຍມີຄວາມສົນໃຈ ເຊັ່ນ: ຄວາມຄືບໜ້າໃນການປະຕິບັດສິດທິມະນຸດຢູ່ ສປປ ລາວ ແລະ ອົດສະຕຣາລີ, ຕ້ານການຈຳແນກເຊື້ອຊາດ, ສິດທິແມ່ຍິງ ແລະ ເດັກນ້ອຍ, ຄົນພິການ, ການເຂົ້າເຖິງຂະບວນຍຸຕິທຳ, ການປົກຄອງລັດດ້ວຍກົດໝາຍ, ເສລີພາບໃນການສະແດງຄວາມຄິດເຫັນ, ນະໂຍບາຍຊົນເຜົ່າ, ເສລີພາບດ້ານສາສະໜາ, ການປະຕິບັດຂໍ້ສະເໜີແນະການທົບທວນປະຈຳໄລຍະ UPR, ການສ້າງຕັ້ງສະມາຄົມ, ສິດທິຂອງຜູ້ອົບພະຍົບ, ຜູ້ເຄື່ອນຍ້າຍຖິ່ນຖານ, ສະພາບເງື່ອນໄຂຄ້າຍຄຸມຂັງ-ດັດສ້າງ ແລະ ສິດທິດ້ານທີ່ດິນຢູ່ ສປປ ລາວ ແລະ ອົດສະຕຣາລີ ແລະ ຫົວຂໍ້ອື່ນໆອີກ ກ່ຽວກັບການປົກປ້ອງ ແລະ ສົ່ງເສີມສິດທິມະນຸດ.

ກອງປະຊຸມສົນທະນາດັ່ງກ່າວໄດ້ດໍາເນີນໄປດ້ວຍບັນຍາກາດກົງໄປກົງມາ ກ່ຽວກັບການປະຕິບັດສິດທິມະນຸດອີງຕາມພັນທະສາກົນ, ລັດຖະທຳມະນູນ, ກົດໝາຍ ແລະ ບົນພື້ນຖານເງື່ອນໄຂຈຸດພິເສດຂອງແຕ່ລະປະເທດ, ໄດ້ເຮັດໃຫ້ສອງປະເທດມີຄວາມເຂົ້າອົກເຂົ້າໃຈເຊິ່ງກັນ ແລະ ກັນຫລາຍຂຶ້ນຕື່ມ ອັນເປັນການປະກອບສ່ວນເພີ່ມທະວີການພົວພັນ ແລະ ຮ່ວມມືລະຫວ່າງ ສອງປະເທດລາວ-ອົດສະຕຣາລີ, ເຊິ່ງໃນປີ 2017 ນີ້ເປັນປີສ້າງຕັ້ງສາຍພົວພັນການທູດລະຫວ່າງສອງປະເທດຄົບຮອບ 65 ປີ.