ສ.ເກົາຫລີ ຊ່ວຍເຫລືອລາວ 200.000 ໂດລາ ເພື່ອສະໜອງສະບຽງອາຫານແກ່ຜູ້ຈຳກັດບໍລິເວນ
29 ກັນຍາ 2021 ສ.ເກົາຫລີ ສືບຕໍ່ໃຫ້ຄວາມຊ່ວຍເຫລືອທາງດ້ານສະບຽງອາຫານ ໃຫ້ແກ່ແຮງງານທີ່ກັບຄືນມາໃນບັນດາສູນຈໍາກັດບໍລິເວນ.
ລັດຖະບານ ແຫ່ງສາທາລະນະລັດ ເກົາຫລີ ຖະແຫລງ ສືບຕໍ່ໃຫ້ການຊ່ວຍເຫລືອ ແກ່ກະຊວງສາທາລະນະສຸກ ແລະ ອົງການອາຫານໂລກ ປະຈໍາປະເທດລາວ ໃນການຊ່ວຍເຫລືອທາງດ້ານ ສະບຽງອາຫານ ໃຫ້ແກ່ແຮງງານທີ່ຈະຕ້ອງໄດ້ຢູ່ໃນສູນຈໍາກັດບໍລິເວນ ໂຄວິດ-19.
ກະຊວງການຕ່າງປະເທດ ຂອງ ສາທາລະນະລັດ ເກົາຫລີ ໄດ້ມອບເງິນຊ່ວຍເຫລືອທາງດ້ານມະນຸດສະທໍາ ເປັນມູນຄ່າ 200.000 ໂດລາສະຫະລັດ ໃຫ້ແກ່ ສປປ ລາວ ໃນການຮັບມືກັບການລະບາດຂອງ ພະຍາດ ໂຄວິດ-19. ການຊ່ວຍເຫລືອໃນຄັ້ງນີ້ຈະຊ່ວຍໃຫ້ ອົງການອາຫານໂລກ ສາມາດສືບຕໍ່ໃຫ້ຄວາມຊ່ວຍເຫລືອທາງດ້ານສະບຽງອາຫານ ໃຫ້ແກ່ບັນດາແຮງງານທີ່ກັບຄືນມາ ທີ່ຢູ່ໃນ 18 ສູນຈໍາກັດບໍລິເວນ ໃນທົ່ວ 7 ແຂວງ ຂອງ ສປປ ລາວ.
ອົງການອາຫານໂລກ ແລະ ບັນດາອົງການເພື່ອນຮ່ວມງານໄດ້ແກ່ – ອົງການກາແດງສະວີດສ, ອົງການກາແດງລາວ ແລະ ອົງການສຸພະນິມິດ ສາກົນ ຈະໄດ້ມອບອາຫານ ທີ່ມີໂພຊະນາການ ຈໍານວນ 3 ຄາບໃນແຕ່ລະມື້ ໃຫ້ແກ່ແຮງງານທີ່ກັບຄືນມາຫຼາຍກວ່າ 5.600 ຄົນ.
“ເຖິງແມ່ນວ່າ ຈໍານວນໂຕເລກຂອງແຮງງານທີ່ກັບຄືນມາແມ່ນໄດ້ຫຼຸດລົງຢ່າງຕໍ່ເນື່ອງ ນັບຕັ້ງແຕ່ກາງ ເດືອນສິງຫາເປັນ ຕົ້ນມາ, ແຕ່ຈໍານວນໂຕເລກຜູ້ທີ່ຕິດໂຄວິດ ໃນປະເທດເພື່ອນບ້ານຂອງ ສປປລາວ ຍັງເປັນສິ່ງຄຸກຄາມຢູ່, ໃນຂະນະທີ່ພວກເຮົາພວມເຮັດວຽກຢ່າງໜັກ ໃນການປ້ອງກັນການແພ່ລະບາດຢູ່ໃນປະເທດ. ດ້ວຍປະສົບ ການທີ່ຜ່ານມາໄດ້ເປັນບົດຮຽນໃຫ້ພວກເຮົາຮູ້ວ່າ ສູນຈໍາກັດບໍລິເວນ ມີຄວາມສໍາຄັນໃນການຊ່ວຍໃຫ້ພວກເຮົາ ທຸກຄົນປອດໄພ, ໃນຂະນະທີ່ຮັບປະກັນ ໃຫ້ຄົນລາວທຸກຄົນສາມາດກັບຄືນມາບ້ານເກີດເມືອງນອນຂອງພວກເຂົາໄດ້. ພວກເຮົາຂໍຂອບໃຈມາຍັງ ລັດຖະບານ ແຫ່ງ ສາທາລະນະລັດເກົາຫລີ ສໍາລັບການຊ່ວຍເຫລືອທີ່ສໍາຄັນນີ້,” ກ່າວໂດຍ ພະນະທ່ານ ປອ. ດຣ. ບຸນແຝງ ພູມມະໄລສິດ, ລັດຖະມົນຕີ ກະຊວງສາທາລະນະສຸກ.
“ການຊ່ວຍເຫລືອໃນຄັ້ງນີ້ ກໍ່ແມ່ນເພື່ອປະຕິບັດຕາມເນື້ອໃນ ຈາກກອງປະຊຸມຂອງລັດຖະມົນຕີກະຊວງການຕ່າງປະເທດ ແຫ່ງ ສາທາລະນະລັດ ເກົາຫລີ ແລະ ສປປ ລາວ ໃນເດືອນທີ່ຜ່ານມາ ທ່າມກາງການແພ່ລະບາດຂອງພະຍາດ ພ້ອມດຽວກັນກໍ່ແມ່ນ ຈາກການໃຫ້ການຊ່ວຍເຫລືອທາງດ້ານມະນຸດສະທໍາຂອງ ສາທາລະນະລັດເກົາຫລີ ໃນຮອບທີ່ 3 ໃຫ້ແກ່ ສປປ ລາວ ນັບຕັ້ງແຕ່ເລີ້ມມີການແພ່ລະບາດໃນປີທີ່ຜ່ານມາ, ເຊິ່ງສະທ້ອນໃຫ້ເຫັນເຖິງຄວາມຕັ້ງໃຈ ຂອງທັງສອງປະເທດໃນການທີ່ຈະຂ້າມຜ່ານຄວາມລໍາບາກນີ້ໄປດ້ວຍກັນ. ຂ້າພະເຈົ້າຫວັງວ່າ ການຊ່ວຍເຫລືອໃນຄັ້ງນີ້ ຈະສາມາດຊ່ວຍໃຫ້ພວກເຮົາຂ້າມຜ່ານເວລາແຫ່ງຄວາມທ້າທາຍເຫລົ່ານີ້ໄປໄດ້,” ທ່ານເອກອັກຄະລັດຖະທູດ ແຫ່ງ ສາທາລະນະລັດ ເກົາຫລີ ປະຈໍາ ສປປ ລາວ, ພະນະທ່ານ ມູຮອງ ອິມ ກ່າວ.
