ລັອກດາວ ບໍ່ຢາກໃຫ້ຍືດຍາວຕໍ່ໄປອີກ ຕ້ອງຮ່ວມກັນປະຕິບັດ

ນະຄອນຫຼວງວຽງຈັນ ປະກາດການເຂົ້າສູ່ ການປະຕິບັດມາດຕະການປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ 19 ໃນລະດັບສູງສຸດ ພາຍຫຼັງການຕິດເຊື້ອໃນຊຸມຊົນສູງກວ່າ 200 ກໍລະນີພາຍໃນນີ້ມື້ດຽວ ແຕ່ປານນັ້ນ ການໄປມາຫາສູ່ກັນ ກໍປານກັບວ່າ ສະພາບຍັງປົກກະຕິ.

ພາຍຫຼັງການເພີ່ມຂຶ້ນຂອງຈຳນວນຜູ້ຕິດເຊື້ອໃນຊຸມຊົນຫຼາຍກວ່າ 200 ຕໍ່ມື້ນັບແຕ່ວັນທີ 18 ກັນຍາ 2021 ທີ່ຜ່ານມາ ເຮັດໃຫ້ ນະຄອນຫຼວງວຽງຈັນ ປະກາດເພີ່ມການຈັດຕັ້ງປະຕິບັດ ມາດຕະການ ປ້ອງກັນ, ຄວບຄຸມ ແລະ ແກ້ໄຂ ໃນຂັ້ນສູງສຸດ ໂດຍອີງໃສ່ ແຈ້ງການ ທິດຊີ້ນຳຂອງ ຫ້ອງການສຳນັກງານນາຍົກ ສະບັບເລທີ 1187/ຫສຍນ ລົງວັນທີ 18 ​ກັນຍາ 2021.

ໂດຍຕາມແຈ້ງການ ດັ່ງກ່າວນັ້ນ ໄດ້ອະນຸມັດໃຫ້ ນະຄອນຫຼວງວຽງຈັນເພີ່ມມາດຕະການໃນການປ້ອງກັນ, ຄວບຄຸມ ແລະ ແກ້ໄຂ ການລະບາດຂອງພະຍາດໂຄວິດ 19 ເລີ່ມແຕ່ວັນທີ 19-30 ກັນຍາ 2021. ພ້ອມນັ້ນ, ໃນມື້ຕໍ່ມາ ຄືວັນທີ 19 ກັນຍາ 2021 ທ່ານເຈົ້າຄອງນະຄອນຫຼວງວຽງຈັນ ກໍໄດ້ອອກ ຄຳສັ່ງ ສະບັບເລກທີ 016/ຈນວ ວ່າດ້ວຍການ ປ້ອງກັນ, ຄວບຄຸມ ແລະ ແກ້ໄຂ ການລະບາດຂອງພະຍາດໂຄວິດ 19 ຢູ່ນະຄອນຫຼວງວຽງຈັນ ເຊິ່ງໄດ້ ມີລາຍລະອຽດຕ່າງໆ ໂດຍສະເພາະ ແຈ້ງໃຫ້ປະຊາຊົນ ຫ້າມເດີນທາງໄປມາ ຫາສູ່ກັນ ເດັດຂາດນອກຈາກ ກໍລະນີຈຳເປັນ ເຊັ່ນໄປໂຮງໝໍ, ໄປຊື້ອາຫານການກິນ ເປັນຕົ້ນ.

ແຕ່ແນວໃດກໍຕາມ ມາຮອດວັນທີ 20 ກັນຍາ 2021 ປະຊາຊົນ ແລະເຈົ້າໜ້າທີ່ຕຳຫຼວດໄດ້ ເຜີຍແຜ່ ບັນດາຮູບພາບຕາມທ້ອງຖະໜົນສາຍຕ່າງໆ ຢູ່ໃນນະຄອນຫຼວງວຽງຈັນ ເຫັນວ່າ ການເດີນທາງໄປມາຂອງ ພໍ່ແມ່ປະຊາຊົນ ຍັງເຮັດຄືກັນກັບວ່າ ປົກກະຕິ ມີລົດຕໍ່ກັນເປັນສາຍຍາວ ຕາມເສັ້ນທາງ, ເຫັນຜູ້ເດີນທາງໄປມາຢ່າງໜາແໜ້ນ, ຕະຫຼາດ ຍັງຄັບຄາໜາແໜ້ນໄປດ້ວຍຜູ້ຄົນ ເຊິ່ງຕັດພາບໄປໃສ່ ການລ໋ອກດາວ ຢູ່ປະເທດເພື່ອນບ້ານເຮົາ ເຊັ່ນ ສສ ຫວຽດນາມ ນັ້ນເຫັນວ່າແຕກຕ່າງກັນຫຼາຍ ທີ່ບໍ່ເຫັນລົດພໍຄັນ.

ເມື່ອພາບນີ້ປະກົດອອກມາທັນໃດນັ້ນ ພວກເຮົາກໍຄິດອອກໂລດວ່າ ປະຊາຊົນບໍ່ໃຫ້ການຮ່ວມມື, ຍັງດື້ດ້ານຫົວແຂງ ບໍ່ປະຕິບັດຕາມ ບັນດາມາດຕະການຂອງຂັ້ນເທີງ ກໍຄືເຈົ້າໜ້າທີວາງອອກ, ເຮັດໃຫ້ເປັນອຸປະສັກ ຕໍ່ການປະຕິບັດໜ້າທີ່ຂອງເຈົ້າໜ້າທີ່ ທີ່ໃນເວລານີ້ ແມ່ນໄດ້ເຮັດວຽກໜັກ ກວ່າເວລາອື່ນໃດ ບໍ່ວ່າ ຈະເປັນ ຕຳຫຼວດ, ທະຫານ, ແພດໝໍ, ຄະນະສະເພາະກິດ, ລົດກູ້ໄພ ແລະ ພາກສ່ວນອື່ນໆ ທີ່ກ່ຽວຂ້ອງ ເຊິ່ງເຂົາເຈົ້າເຫຼົ່ານັ້ນ ແມ່ນຄວາມຫວັງຂອງພວກເຮົາ ທີ່ຈະເອົາຊະນະ ພະຍາດຮ້າຍນີ້ໄດ້

ແຕ່ຮູ້ຫຼືບໍ່ວ່າ ກະໂຕປະຊາຊົນ ພວກເຮົານີ້ລະຈະເປັນກຳລັງສຳຄັນໜຶ່ງໃນການປ້ອງກັນ, ຄວບຄຸມ ແລະ ແກ້ໄຂ ສະຖານະການທີ່ກັງວົນໃຈເປັນຢ່າງຍິ່ງໃນປັດຈຸບັນ ໂດຍການກັກຕົວ, ບໍ່ອອກຈາກບ້ານ ຕາມຄຳແນະນຳເພິ່ນ ແຕ່ເປັນຫຍັງ ພວກເຮົາຍັງເຮັດບໍ່ໄດ້ຄືແນວນັ້ນ?

ປະຊາຊົນກໍ ຈົ່ມວ່າ ຊິໃຫ້ຢູ່ເຮືອນໄດ້ແນວໃດ ບໍ່ມີອັນຈະກິນ, ບ່ອນເຮັດວຽກບໍ່ພັກ ຖ້າບໍ່ໄປ ກໍຢ້ານຫົວໜ້າໄລ່ອອກ, ຕ້ອງໄດ້ດິ້ນຮົນ ເພື່ອຊອກຫາອາຫານມາໃຫ້ຄອບຄົວ, ເສຍຄ່ານໍ້າ ຄ່າໄຟ, ໃຊ້ໜີ້ສິນຕ່າງໆ ທີ່ປະຊາຊົນກໍມີເຫດຜົນຫຼາຍຮ້ອຍປະການ ເຊິ່ງຄວນຄູ່ແກ່ການພິຈາລະນາແກ້ໄຂ ຮອງຮັບໃນກໍລະນີ ຈຳເປັນຕ່າງໆ.

ບໍ່ວ່າຄວາມຫຍຸ້ງຍາກພຽງໃດ ການເຫັນແກ່ຄວາມປອດໄພ ໃນສັງຄົມໃນວົງກວ້າງຄວນເປັນບູລິມະສິດອັນດັບໜຶ່ງ, ການຮ່ວມມືນຳເຈົ້າໜ້າທີ່ ເປັນເລື່ອງທີ່ເຫັນແກ່ຜົນປະໂຫຍດລວມຂອງຊາດ. ພ້ອມນັ້ນ ທາງການກໍຄວນສືບຕໍ່ຄົ້ນຄວ້າແກ້ໄຂ ຊີວິດການເປັນຢູ່ຂອງປະຊາຊົນ ໂດຍສະເພາະ ຜູ້ທີ່ມີຄວາມຫຍຸ້ງຍາກ ແລະ ບອບບາງທີ່ສຸດໃນສັງຄົມພວກເຮົາ, ແບ່ງຮັບ ແບ່ງສູ້ ຈຶ່ງຈະຊູໄດ້ຄວາມປອດໄພ ແລະຄວາມສະຫງົບ.