ເປີດແນວທາງສິງກະໂປ ດຳລົງຊີວິດຮ່ວມກັບໂຄວິດ ເຮັດໄດ້ແທ້ ຫລື ບໍ່ ?

ມາຮອດປັດຈຸບັນ ຈຳນວນຜູ້ເສຍຊີວິດສະສົມຈາກໂຄວິດຢູ່ສິງກະໂປຍັງມີພຽງ 60 ຄົນ ນັບແຕ່ເກີດການແຜ່ລະບາດຮອບທຳອິດໃນປີຜ່ານມາ ແລະ ຕອນນີ້ມີປະຊາກອນຫລາຍກວ່າ 82% ຈາກທັງໝົດປະມານ 5,9 ລ້ານຄົນ ທີ່ໄດ້ຮັບການສັກວັກຊີນຄົບ 2 ໂດສ ສົ່ງຜົນໃຫ້ພາບລວມການຄວບຄຸມສະຖານະການໂຄວິດຂອງສິງກະໂປເອີ້ນໄດ້ວ່າຂ້ອນຂ້າງ “ຄຸມໄດ້” ເຖິງວ່າຫລ້າສຸດສະຖານະການຈະເຂົ້າສູ່ການລະບາດຮອບໃໝ່ ຈາກຈຳນວນຜູ້ຕິດເຊື້ອໃໝ່ສູງເຖິງວັນລະ 1.000 ຄົນໃນອາທິດຜ່ານມາ.

ເຊິ່ງລັດຖະບານສິງກະໂປບໍ່ປະໝາດ ແລະ ພະຍາຍາມດຳເນີນມາດຕະການຕ່າງໆ ດ້ວຍແນວຄິດທີ່ວ່າ ພະຍາດລະບາດຮ້າຍແຮງນີ້ຈະບໍ່ຫາຍໄປງ່າຍໆ ແລະ ຕ້ອງປັບຕົວເພື່ອເລີ່ມ “ດຳລົງຊີວິດຮ່ວມກັບໂຄວິດ”.

ແຕ່ໂມເດລການດຳລົງຊີວິດຮ່ວມກັບໂຄວິດນັ້ນຈະເຮັດໄດ້ແທ້ຫລາຍໜ້ອຍສໍ່າໃດ ຕ້ອງເບິ່ງຈາກສິ່ງທີ່ກຳລັງເກີດຂຶ້ນ ເຊິ່ງລັດຖະບານສິງກະໂປມີການປັບປ່ຽນແນວທາງ ແລະ ການຮັບມືກັບສະຖານະການ ເພື່ອໃຫ້ວິຖີຊີວິດຂອງປະຊາຊົນ ແລະ ສະພາບເສດຖະກິດດຳເນີນໄປໄດ້ທ່າມກາງການລະບາດທີ່ຍັງບໍ່ສິ້ນສຸດ.

ຈຸດເລີ່ມຕົ້ນແນວຄິດ “ດຳລົງຊີວິດຮ່ວມກັບໂຄວິດ”

• ຢ້ອນກັບໄປໃນເດືອນມິຖຸນາ ເປັນຄັ້ງທຳອິດທີ່ສິງກະໂປປະກາດຍຸດທະສາດໃໝ່ ຄືການ “ດຳລົງຊີວິດຮ່ວມກັບໂຄວິດ” ເຊິ່ງມຸ່ງເນັ້ນການຕິດຕາມ, ປິ່ນປົວ ແລະ ໃຫ້ວັກຊີນຜູ້ທີ່ກ່ຽວຂ້ອງກັບກໍລະນີແຜ່ລະບາດແບບກຸ່ມກ້ອນ ໂດຍບໍ່ຈຳເປັນຕ້ອງລັອກດາວ, ປິດຊຸມຊົນ ຫລື ປິດຊາຍແດນ ເພື່ອປ້ອງກັນການລະບາດແບບທີ່ບັນດາປະເທດເລືອກປະຕິບັດ.
• ຕົວເລກຜູ້ຕິດເຊື້ອໃນເດືອນມິຖຸນາທີ່ຫລຸດຕໍ່າຢູ່ໃນຫລັກສິບຕໍ່ວັນ ເຮັດໃຫ້ລັດຖະບານຕັດສິນໃຈຜ່ອນຄາຍມາດຕະການຄວບຄຸມ ແລະ ວາງແຜນເປີດປະເທດ, ແຕ່ສະຖານະການຫລັງຈາກນັ້ນພັດຮ້າຍແຮງອີກ ຈຳນວນຜູ້ຕິດເຊື້ອເພີ່ມຂຶ້ນອີກຮອບໃໝ່ ສູງເຖິງຫລັກຮ້ອຍໃນເດືອນກໍລະກົດ ແລະ ຫລັກ 1.000 ຄົນໃນເດືອນກັນຍາ ເຊິ່ງສູງສຸດນັບແຕ່ເດືອນເມສາປີຜ່ານມາ ເຮັດໃຫ້ແຜນທຸກຢ່າງຕ້ອງຢືດອອກໄປ ແລະ ແທນທີ່ດ້ວຍການຍົກລະດັບມາດຕະການຮັບມືອີກເທື່ອໃໝ່.
• ການລະບາດຮອບໃໝ່ທີ່ຮຸນແຮງຂຶ້ນ ເຊື່ອວ່າເປັນຜົນຈາກໄວຣັສໂຄວິດສາຍພັນເດວຕາທີ່ແຜ່ລະບາດໄດ້ງ່າຍ ແລະ ໄວກວ່າປົກກະຕິ ເຊິ່ງລັດຖະບານສິງກະໂປໄດ້ເພີ່ມມາດຕະການຄວບຄຸມແບບ “ເຄິ່ງລັອກດາວ” ພ້ອມເລັ່ງສັກວັກຊີນໃຫ້ປະຊາຊົນທົ່ວປະເທດ.
• ລັດຖະບານສິງກະໂປເອີ້ນການລະບາດທີ່ເພີ່ມຂຶ້ນຫລ້າສຸດ ວ່າເປັນ “ພິທີການແຫ່ງການປ່ຽນຜ່ານ”. ໃນຂະນະທີ່ພະຍາຍາມປັບປ່ຽນແນວທາງຮັບມື ດ້ວຍຄວາມຫວັງທີ່ຈະຂັບເຄື່ອນປະເທດດ້ວຍໂມເດວການດຳລົງຊີວິດຢູ່ຮ່ວມກັບໂຄວິດ ແທນການກຳຈັດເຊື້ອໂຄວິດ ແລະ ໄວຣັສໂຄວິດກາຍພັນຕ່າງໆໃຫ້ໝົດຈາກປະເທດ.

“ເຮົາຢູ່ບົນເສັ້ນທາງແຫ່ງການປ່ຽນຜ່ານໄປສູ່ຄວາມປົກກະຕິໃໝ່ໃນການດຳລົງຊີວິດກັບໂຄວິດ, ມັນຄືການເດີນທາງທີ່ບໍ່ແນ່ນອນ ແລະ ເຕັມໄປດ້ວຍການພິກຜັນ” ອອງ ຢີ ຄຸງ ລັດຖະມົນຕີວ່າການກະຊວງສາທາລະນະສຸກຂອງສິງກະໂປກ່າວ.

• ເຖິງຢ່າງໃດກໍຕາມ, ສະຖານະການການລະບາດຫລ້າສຸດ ເຮັດໃຫ້ໂຮງໝໍໃນສິງກະໂປເລີ່ມຜະເຊີນສະພາບເຄັ່ງຕຶງຈາກຈຳນວນຜູ້ຕິດເຊື້ອເພີ່ມສູງຂຶ້ນ ເຊິ່ງກະຊວງສາທາລະນະສຸກສິງກະໂປພະຍາຍາມຊ່ວຍຫລຸດຄວາມແອອັດ ດ້ວຍການແນະນຳໃຫ້ກຸ່ມຜູ້ຕິດເຊື້ອໃໝ່ ເຊິ່ງຫລາຍກວ່າ 98% ເປັນຜູ້ຕິດເຊື້ອທີ່ອາການບໍ່ຮຸນແຮງ ຫລື ບໍ່ມີອາການ ປຶກສາແນວທາງປິ່ນປົວກັບແພດໝໍທົ່ວໄປ ຫລື ໄປຄລີນິກ ແທນການເຂົ້າມາປິ່ນປົວຢູ່ໂຮງໝໍ ແລະ ປ່ຽນແນວທາງໃຫ້ຜູ້ຕິດເຊື້ອທີ່ສັກວັກຊີນຄົບໂດສແລ້ວ ອາຍຸລະຫວ່າງ 12-69 ປີ ແລະ ບໍ່ມີອາການຮຸນແຮງ ປິ່ນປົວຢູ່ເຮືອນ.
• ໂດຍນອກຈາກການຫລຸດຄວາມແອອັດໃນໂຮງໝໍ ທາງການສິງກະໂປຍັງຂະຫຍາຍການໃຫ້ຄຳປຶກສາ ແລະ ຊ່ວຍເຫລືອປະຊາຊົນ ໃນການຮັບມືກັບສຸຂະພາບຈິດ ແລະ ຄວາມຄຽດທີ່ເກີດຈາກຄວາມກັງວົນຕໍ່ສະຖານະການແຜ່ລະບາດ ແລະ ມາດຕະການຮັບມືໂຄວິດ.

ກັບສູ່ພື້ນຖານ

• ດຣ. ອອງ ຢູ ຈິນ ຣອຍ ແພດເວດຊະສາດຄອບຄົວໃນສິງກະໂປ ໃຫ້ສຳພາດຕໍ່ສຳນັກຂ່າວ Al Jazeera ຊີ້ວ່າ: ສະຖານະການລະບາດໃນປັດຈຸບັນຍັງບໍ່ໄປເຖິງຈຸດທີ່ໂຄວິດກາຍພັນເປັນພະຍາດປະຈຳຖິ່ນ (Endemic Stage) ເຊິ່ງປະຊາຊົນທຸກຄົນສາມາດພົບໄດ້ເປັນປົກກະຕິ ເຊັ່ນດຽວກັບພະຍາດຫວັດ.
• ແຕ່ເຖິງຕອນນີ້ເຊື້ອໂຄວິດຈະເປັນອັນຕະລາຍຮ້າຍແຮງສຳລັບປະຊາຊົນໃນກຸ່ມເບາະບາງ ຫລື ກຸ່ມສ່ຽງ ແລະ ກຸ່ມທີ່ຍັງບໍ່ໄດ້ຮັບການສັກວັກຊີນ, ການດຳລົງຊີວິດກັບໂຄວິດບໍ່ແມ່ນສິ່ງທີ່ຈະປະໝາດ ເຊິ່ງ ດຣ. ອອງ ຊີ້ວ່າ: ໃນອະນາຄົດອັນໃກ້ນີ້ ຊາວສິງກະໂປອາດຕ້ອງພົບມາດຕະການປ້ອງກັນເຊື້ອທີ່ຫລາກຫລາຍໃນຊີວິດປະຈຳວັນເຊັ່ນ: ການໃສ່ຜ້າປິດປາກ-ດັງ ແລະ ຮັກສາໄລຍະຫ່າງໃນສະຖານທີ່ສາທາລະນະ, ການໃຫ້ເຮັດວຽກຢູ່ເຮືອນ, ກິນເຂົ້າຢູ່ເຮືອນ ແລະ ຈຳກັດການເດີນທາງທ່ອງທ່ຽວ.
• ສຳລັບຄຳຖາມທີ່ວ່າ: “ເຮົາຈະດຳລົງຊີວິດກັບໂຄວິດແນວໃດ ?” ດຣ. ອອງ ໃຫ້ຄຳຕອບງ່າຍໆຄື: “ກັບໄປສູ່ແນວທາງພື້ນຖານ” ເຊິ່ງເປັນສິ່ງທີ່ປະຊາຊົນທົ່ວໄປຄວນເຮັດເຊັ່ນ: ໝັ່ນການລ້າງມື, ໃສ່ຜ້າປິດປາກ-ດັງ, ລວມຕົວກັນໃນກາງແຈ້ງ, ຮັກສາໄລຍະຫ່າງລະຫວ່າງກັນ ແລະ ຖ້າບໍ່ຮູ້ສຶກປອດໄພໃຫ້ຢູ່ເຮືອນ.
• ການເລັ່ງສັກວັກຊີນໃຫ້ປະຊາຊົນຂອງສິງກະໂປ ຊ່ວຍໃຫ້ການຂັບເຄື່ອນເສດຖະກິດ ແລະ ການໃຊ້ຊີວິດຂອງປະຊາຊົນທ່າມກາງໂຄວິດເຮັດໄດ້ງ່າຍຂຶ້ນ ໂດຍປະຊາຊົນທີ່ສັກວັກຊີນຄົບໂດສແລ້ວສາມາດໄປກິນເຂົ້າໃນຮ້ານອາຫານ ຫລື ເດີນທາງໄປສະຖານທີ່ສາທາລະນະຕ່າງໆໄດ້.
• ຂະນະທີ່ທ່ານ ເຈນເນັດ ອິກໂຄວິດ ສາສະດາຈານດ້ານສາທາລະນະສຸກ ແລະ ຈິດຕະວິທະຍາຊາວອາເມລິກາ ຈາກວິທະຍາໄລ Yale-NUS ໃນສິງກະໂປ ກ່າວຍ້ອງຍໍລັດຖະບານສິງກະໂປ ທີ່ເຮັດໄດ້ດີ ທັງການກວດ ແລະ ຕິດຕາມຜູ້ສຳຜັດເຊື້ອວົງກວ້າງ ຕະຫລອດຈົນການເລັ່ງສັກວັກຊີນໃຫ້ປະຊາຊົນ ເຊິ່ງມາດຕະການເຫລົ່ານີ້ຈະຍັງດຳເນີນຕໍ່ໄປ ເນື່ອງຈາກສະຖານະການລະບາດທົ່ວໂລກຍັງມີຢູ່ ແລະ ເປັນໄປຕາມຫລັກການປະຕິບັດພື້ນຖານດ້ານສາທາລະນະສຸກທີ່ “ທຸກຄົນຍັງມີຄວາມສ່ຽງ ຖ້າຄວາມສ່ຽງນັ້ນຍັງຢູ່” ດັ່ງນັ້ນ ເຮົາທຸກຄົນຈຶ່ງຍັງຕ້ອງລະວັງຕົວໄວ້.

ປະຕິບັດຕາມກົດ

• ນາງ ຈູເລຍນາ ຊານ ຜູ້ປະກອບການທຸລະກິດສື່ ເຜີຍຕໍ່ Al Jazeera ເຖິງຄວາມປະທັບໃຈໃນການດຳເນີນງານຂອງທາງການສິງກະໂປ ເພື່ອຢັບຢັ້ງການລະບາດຂອງໂຄວິດ ໂດຍເລົ່າວ່າ: ລູກສາວຂອງນາງນັ້ນຖືກກັກຕົວຫລັງຈາກໝູ່ຮ່ວມຫ້ອງຮຽນຕິດເຊື້ອ. ຂະນະທີ່ລູກຊາຍຂອງນາງຕ້ອງຢຸດໄປໂຮງຮຽນເຊັ່ນກັນ ເຊິ່ງທາງການສິງກະໂປໃຫ້ການເບິ່ງແຍງໂດຍມີການຕິດຕາມ ແລະ ໃຫ້ຄຳປຶກສາ ທັງໄປຢາມຢູ່ເຮືອນ ແລະ ວິດີໂອຄໍ ແລະ ຍັງໄດ້ຮັບຂໍ້ຄວາມ ແລະ ໂທລະສັບກວດສອບຈາກເຈົ້າໜ້າທີ່ເປັນປະຈຳທຸກວັນ.
• ຢູຈີນ ຕັນ ຮອງສາສະດາຈານດ້ານກົດໝາຍຈາກມະຫາວິທະຍາໄລການຈັດການສິງກະໂປ ກ່າວວ່າ: ການເປັນຜູ້ນຳທີ່ເດັດຂາດຂອງລັດຖະບານສິງກະໂປ ໄດ້ຮັບການຊ່ວຍເຫລືອຈາກປະຊາຊົນທີ່ເຕັມໃຈປະຕິບັດຕາມຄຳແນະນຳຂອງລັດຖະບານເຊັ່ນ: ການໃສ່ຜ້າປິດປາກ-ດັງ ເຊິ່ງເປັນສິ່ງປົກກະຕິທີ່ເກີດຂຶ້ນມາແລ້ວໃນການລະບາດຂອງພະຍາດຊາຣ໌ສ (SARS) ໃນປີ 2003.
• ນອກຈາກການຮ່ວມມືຂອງປະຊາຊົນ, ລັດຖະບານສິງກະໂປເອງກໍໃຊ້ເຕັກໂນໂລຊີຊ່ວຍໃນການຕິດຕາມຜູ້ສຳຜັດເຊື້ອ ເຊິ່ງເປັນອີກເຄື່ອງມືສຳຄັນທີ່ຊ່ວຍໃນການຄວບຄຸມສະຖານະການແຜ່ລະບາດ.
• ທັງນີ້ ເຖິງວ່າຈະມີຜູ້ປະກອບທຸລະກິດບາງຄົນເບິ່ງວ່າ: ລັດຖະບານສິງກະໂປຄວນໃຫ້ເສລີພາບໃນການເດີນທາງຫລາຍຂຶ້ນ ເພື່ອຜົນດີຕໍ່ສະພາບເສດຖະກິດ, ແຕ່ຫລາຍຄົນຍັງເຊື່ອວ່າມາດຕະການຮັບມືສະຖານະການລະບາດຂອງສິງກະໂປ ຊ່ວຍຮັກສາສະຖານະຂອງສິງກະໂປໃຫ້ເປັນສູນກາງ ຫລື Hub ທີ່ສຳຄັນສຳລັບທຸລະກິດລະດັບໂລກ.
• ສະຕີເຟນ ໂອກຸນ ຈາກບໍລິສັດທີ່ປຶກສາ McLarty Associates ເຜີຍວ່າ: ໃນໄລຍະ 2 ປີຜ່ານມາ ຜົນຈາກການລະບາດຂອງໂຄວິດທີ່ກະທົບຕໍ່ຕ່ອງໂສ້ອຸປະທານ ແລະ ສົງຄາມການຄ້າລະຫວ່າງຈີນ ແລະ ອາເມລິກາ ເຮັດໃຫ້ສິງກະໂປກາຍເປັນປະເທດທີ່ໜ້າສົນໃຈຫລາຍຂຶ້ນ ໃນຖານະສູນກາງທຸລະກິດການຄ້າລະດັບໂລກ ແລະ ລະດັບພາກພື້ນ.
• ນອກຈາກນີ້, ເຖິງວ່າອັດຕາການສັກວັກຊີນປ້ອງກັນໂຄວິດຂອງສິງກະໂປຈະສູງເປັນອັນດັບຕົ້ນໆຂອງໂລກ, ແຕ່ທາງການສິງກະໂປຍັງພະຍາຍາມຊຸກຍູ້ໃຫ້ມີການສັກວັກຊີນເຂັມ 3 ຫລື ເຂັມກະຕຸ້ນ (Booster Shot) ສຳລັບປະຊາຊົນກຸ່ມສ່ຽງທີ່ໄດ້ຮັບການສັກວັກຊີນ 2 ໂດສແລ້ວເກີນ 8 ເດືອນ ເຊິ່ງນາຍົກລັດຖະມົນຕີ ລີຊຽນລຸງ ກໍໄດ້ຮັບການສັກໄປເມື່ອວັນທີ 17 ກັນຍາຜ່ານມາ ທ່າມກາງຄວາມໝັ້ນໃຈວ່າຈະຊ່ວຍປ້ອງກັນການຕິດເຊື້ອ ແລະ ຫລຸດອາການຮຸນແຮງໄດ້ຫລາຍຂຶ້ນ.

“ກໍລະນີການຕິດເຊື້ອກຳລັງເພີ່ມຂຶ້ນຢ່າງວ່ອງໄວ ການສັກວັກຊີນເຂັມກະຕຸ້ນຈະຊ່ວຍເສີມສ້າງການປ້ອງກັນຂອງທ່ນຕໍ່ໂຄວິດ” ນາຍົກລັດຖະມົນຕີ ລີຊຽນລຸງ ກ່າວ.

ອ້າງອີງ:

• https://www.aljazeera.com/news/2021/9/20/can-we-live-with-covid-19-singapore-tries-to-show-how
• https://en.wikipedia.org/wiki/COVID-19_pandemic_in_Singapore#Delta_wave_of_COVID-19