ວັນທີ 17 ກັນຍາ 2021 ພົບຜູ້ລະເມີດການສັນຈອນໃນເວລາຕ້ອງຫ້າມເກືອບ 700 ຄົນ
September 18, 2021 - 5:14 PM
ວັນທີ 17 ກັນຍາ 2021, ເຈົ້າໜ້າທີ່ຕໍາຫລວດຈະລາຈອນ ນະຄອນຫລວງວຽງຈັນ ໃຫ້ຮູ້ວ່າ: ການຕັ້ງດ່ານກວດກາ ທົ່ວນະຄອນຫລວງວຽງຈັນ ມີທັງໝົດ 13 ຈຸດ; ໃນນີ້ ຈຸດກວດກາຕະຫລອດ 24 ຊົ່ວໂມງມີ 6 ຈຸດ ແລະ ຈຸດກວດກາ ແຕ່ເວລາ 22:00 ໂມງ-05:00 ໂມງເຊົ້າ ມີຢູ່ 7 ຈຸດ. ຜ່ານການຕັ້ງດ່ານກວດກາ ຕະຫລອດ 24 ຊົ່ວໂມງ ພົບເຫັນຜູ້ລະເມີດ 2.032 ຄົນ, ຍິງ 758 ຄົນ.
ໃນນັ້ນ, ກວດພົບຢູ່ດ່ານກວດກາໃນເວລາຫ້າມການສັນຈອນ 22:00 ໂມງ-05:00 ໂມງເຊົ້າ ມີ 695 ຄົນ, ຍິງ 222 ຄົນ ຈຶ່ງໃຊ້ມາດຕະການສຶກສາອົບຮົມກ່າວເຕືອນ.
ໂດຍການນໍາພາຂອງ ພັທ ສັງຄົມ ພົມມະລາດ ຮອງຫົວໜ້າພະແນກຕໍາຫລວດຈະລາຈອນ ນະຄອນຫລວງວຽງຈັນ ພ້ອມຄະນະ, ໄດ້ສົມທົບກັບກໍາລັງຈະລາຈອນ ປກສ 9 ຕົວເມືອງ ໄດ້ສືບຕໍ່ຕັ້ງດ່ານກວດກາພາຫະນະສັນຈອນໄປ-ມາ ຕາມທ້ອງຖະໜົນ ເພື່ອເຕືອນສະຕິນັກຂັບຂີ່ ໃຫ້ຮັບຮູ້ ແລະ ເຂົ້າໃຈກົດລະບຽບການສັນຈອນ ພ້ອມກັນປະຕິບັດຕາມຄໍາສັ່ງເລກທີ 015/ຈນວ ລົງວັນທີ 30 ສິງຫາ 2021, ວ່າດ້ວຍການເພີ່ມທະວີການປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ຢູ່ນະຄອນຫຼວງວຽງຈັນ ໃຫ້ເຂັ້ມງວດ.
ດັ່ງນັ້ນ, ກອງບັນຊາການ ປກສ ນະຄອນຫລວງວຽງຈັນ ຮຽກຮ້ອງນັກຂັບຂີ່ຜູ້ໃຊ້ລົດໃຊ້ຖະໜົນ ເອົາໃຈໃສ່ປະຕິບັດກົດລະບຽບຈະລາຈອນຢ່າງເຂັ້ມງວດ; ພ້ອມທັງປະຕິບັດຕາມຄໍາສັ່ງ, ແຈ້ງການຂອງຄະນະສະເພາະກິດວາງອອກ, ຖ້າບໍ່ມີຄວາມຈໍາເປັນກໍໃຫ້ຢູ່ບ້ານ-ເຮືອນ ເພື່ອປ້ອງກັນການເກີດອຸປະຕິເຫດ ແລະ ຕ້ານການແພ່ລະບາດຂອງພະຍາດໂຄວິດ-19 ທີ່ພວມລະບາດ ຢູ່ໃນປັດຈຸບັນນີ້.
