ກອງທັບອາເມລິກາຍອມຮັບ ລະເບີດລົດຜິດຄັນ-ສັງຫານພົນລະເຮືອນບໍລິສຸດ 10 ຄົນ ໃນປະຕິບັດການໂຈມຕີທາງອາກາດທີ່ຄາບູລ
ພົນເອກ ແຟຣງ ແມກເຄນຊີ ຜູ້ບັນຊາການກອງບັນຊາການກາງອາເມລິກາ ຖະແຫລງຕໍ່ສື່ມວນຊົນຢູ່ເພນຕາກອນ ຍອມຮັບວ່າຈາກການສືບສວນຂອງກອງທັບອາເມລິກາ ຕໍ່ເຫດການທີ່ກອງທັບອາເມລິກາສົ່ງໂດຣນຍິງຈະຫລວດຈະກັດລະເບີດໃກ້ສະໜາມບິນຄາບູລໃນເດືອນສິງຫາຜ່ານມາ ສົ່ງຜົນໃຫ້ຄົນຂັບລົດຄັນດັ່ງກ່າວເສຍຊີວິດ ແລະ ມີພົນລະເຮືອນເສຍຊີວິດອີກ 10 ຄົນ ເຊິ່ງເປັນເດັກນ້ອຍເຖິງ 7 ຄົນນັ້ນ ເກີດຈາກຄວາມຜິດພາດ ໂດຍລົດຍົນ ແລະ ຄົນຂັບລົດທີ່ຕົກເປັນເປົ້າໝາຍການໂຈມຕີບໍ່ມີການກ່ຽວຂ້ອງກັບກຸ່ມລັດອິສລາມໃນອັບການິດສະຖານ ຫລື ກຸ່ມໄອຊິສ-ເຄ (ISIS-K) ຕາມທີ່ໜ່ວຍຂ່າວລັບເຊື່ອກ່ອນໜ້ານີ້.
ພົນເອກ ແມກເຄນຊີ ກ່າວຕໍ່ນັກຂ່າວວ່າ: ການໂຈມຕີດັ່ງກ່າວເປັນ “ຄວາມຜິດພາດ” ພ້ອມກ່າວຄຳຂໍໂທດ.
ເຖິງຢ່າງໃດກໍດີ, ເຖິງຍອມຮັບວ່າການໂຈມຕີດັ່ງກ່າວເປັນຄວາມຜິດພາດຮ້າຍແຮງ, ແຕ່ ພົນເອກ ແມກເຄນຊີ ລະບຸວ່າ: ປະຕິບັດການທັງໝົດບໍ່ຖືເປັນຄວາມລົ້ມເຫລວ “ຂ້າພະເຈົ້າເຫັນພ້ອມວ່າການໂຈມຕີຄັ້ງນີ້ບໍ່ໄດ້ເປັນໄປຕາມມາດຕະຖານຂອງເຮົາຢ່າງແນ່ນອນ ແລະ ຂ້າພະເຈົ້າເສຍໃຈຢ່າງຊຸດຊຶ້ງ, ແຕ່ຂ້າພະເຈົ້າບໍ່ຖືວ່າປະຕິບັດການທັງໝົດເປັນຄວາມລົ້ມເຫລວ”.
ເມື່ອວັນທີ 29 ສິງຫາ, ກອງທັບອາເມລິກາ ໄດ້ເປີດສາກຍິງຈະຫລວດ Hellfire ຈາກໂດຣນ Reaper ໂຈມຕີລົດຍົນຄັນໜຶ່ງ ທີ່ເຊື່ອວ່າບັນທຸກລະເບີດໄວ້ກຽມກໍ່ເຫດລະເບີດຢູ່ໃນນັ້ນ ໂດຍເຫດການດັ່ງກ່າວເກີດຂຶ້ນໃນຂະນະທີ່ກອງທັບອາເມລິກາຢູ່ໃນສະພາບເຝົ້າລະວັງຂັ້ນສູງ ເນື່ອງຈາກເມື່ອ 3 ມື້ກ່ອນໜ້ານັ້ນ ມືລະເບີດຂ້າຕົວຕາຍໄດ້ກໍ່ເຫດສັງຫານພົນລະເຮືອນຫລາຍກວ່າ 100 ຄົນ ແລະ ທະຫານອາເມລິກາ 13 ຄົນ ຢູ່ນອກສະໜາມບິນຄາບູລ ໃນຂະນະທີ່ອາເມລິກາກຳລັງເລັ່ງອົບພະຍົບພົນລະເຮືອນ ແລະ ເຈົ້າໜ້າທີ່ອອກຈາກອັບການິດສະຖານ ຫລັງຈາກກຸ່ມຕາລີບັນໄດ້ບຸກຢຶດຄອງເມືອງຫລວງຂອງປະເທດໄດ້ສຳເລັດ.
ກອງທັບອາເມລິກາ ເປີດເຜີຍວ່າ: ທາງກອງທັບໄດ້ຕິດຕາມລົດເກັ່ງສີຂາວຄັນໜຶ່ງ ເຊິ່ງເຊື່ອວ່າຂັບອອກມາຈາກບ່ອນລີ້ຊ້ອນຂອງ IS ແລະ ລົດຄັນດັ່ງກ່າວໄດ້ຢຸດຈອດຢ່າງໜ້າສົງໄສຫລາຍເທື່ອ ເພື່ອຮັບ ແລະ ສົ່ງມອບເຄື່ອງ ໂດຍເຈົ້າໜ້າທີ່ອາເມລິກາ ລະບຸວ່າ: ໜຶ່ງໃນເຄື່ອງທີ່ຊາຍຄົນດັ່ງກ່າວຢຸດຮັບເບິ່ງຄືຈະເປັນຂອງໜັກ ເຊິ່ງອາດເປັນວັດຖຸລະເບີດ.
ທັງນີ້ ກອງບັນຊາການກາງອາເມລິກາ ພະຍາຍາມຊີ້ໄປທີ່ການລະເບີດຄັ້ງໃຫຍ່ທີ່ຕາມມາຫລັງຈາກລົດຖືກຈະຫລວດໂຈມຕີ ເພື່ອເປັນຫລັກຖານວ່າມີວັດຖຸລະເບີດຈຳນວນມະຫາສານຢູ່ໃນລົດແທ້. ເຖິງຢ່າງໃດກໍຕາມ, ໃນວັນທີ 10 ກັນຍາຜ່ານມາ ແຫລ່ງຂ່າວທາງທະຫານຂອງອາເມລິກາ ຍອມຮັບວ່າ: ຫລັງຈາກກວດສອບພາບຈາກເຊັນເຊີອິນຟຣາເຣດແລ້ວ ພົບວ່ານັ້ນບໍ່ແມ່ນການລະເບີດ ແຕ່ອາດຈະເກີດຈາກເປວໄຟທີ່ລຸກໄໝ້ຂຶ້ນຫລາຍກວ່າ.
ເຈົ້າໜ້າທີ່ອາເມລິກາຄົນໜຶ່ງທີ່ມີຄວາມຮູ້ ແລະ ປະສົບການກ່ຽວກັບການໂຈມຕີໃນລັກສະນະນີ້ ກ່າວກັບ CNN ໃນຕົ້ນເດືອນນີ້ວ່າ: ພົນລະເຮືອນເສຍຊີວິດ 10 ຄົນຖືເປັນຕົວເລກທີ່ “ສູງຫລາຍ” ແລະ ກອງທບຄວນຈະປະເມີນຄວາມເສຍຫາຍຂ້າງຄຽງໄວ້ລ່ວງໜ້າ ເຊິ່ງໝາຍຄວາມວ່າຜູ້ບັງຄັບບັນຊາຮູ້ດີວ່າມີຄວາມເປັນໄປໄດ້ທີ່ຈະເກີດການບາດເຈັບລົ້ມຕາຍຂອງພົນລະເຮືອນ.
ຂະນະດຽວກັນມີລາຍງານວ່າ: ປະທານາທິບໍດີ ໂຈ ໄບເດນ ໄດ້ຮັບຟັງການບັນຍາຍສະຫລຸບກ່ຽວກັບລາຍລະອຽດຂອງການສອບສວນໃນວັນທີ 17 ກັນຍາແລ້ວ ໂດຍຄາດວ່າການປະກາດຂອງເພນຕາກອນອາດຈະເຮັດໃຫ້ເກີດສຽງວິພາກວິຈານໃນວົງກວ້າງຫລາຍຂຶ້ນຕໍ່ການເຮັດວຽກຂອງຝ່າຍບໍລິຫານຂອງ ໄບເດນ ກ່ຽວກັບການອົບພະຍົບທີ່ວຸ້ນວາຍໃນຄາບູລ ແລະ ການຖອນທະຫານອອກຈາກອັບການິດສະຖານ.
ໂດຍໃນເດືອນຜ່ານມາ, ໄບເດນ ໄດ້ກ່າວຍົກຍ້ອງການໂຈມຕີດັ່ງກ່າວວ່າເປັນຕົວຢ່າງທີ່ສະແດງໃຫ້ເຫັນເຖິງຄວາມສາມາດຂອງອາເມລິກາໃນການເລັ່ງເປົ້າໝາຍການໂຈມຕີໄປໃສ່ ISIS-K.
ເຖິງຢ່າງໃດກໍຕາມ, ທຳນຽບຂາວຍັງບໍ່ໄດ້ໃຫ້ຄວາມເຫັນກ່ຽວກັບຜົນການສອບສວນຫລ້າສຸດຂອງກອງທັບອາເມລິກາ.
ອ້າງອີງ:
