ພະຍາດວັນນະໂລກສາມາດປິ່ນປົວໄດ້ ແລະ ບໍ່ເສຍຄ່າບໍລິການ
ເນື່ອງໃນໂອກາດວັນຕ້ານພະຍາດວັນນະໂລກ ຄົບຮອບ 135 ປີ (24 ມີນາ 1982- 24 ມີນາ 2017), ກະຊວງສາທາລະນະສຸກ ໄດ້ຈັດກອງປະຊຸມການສ້າງຈິດສຳນຶກໃຫ້ມວນຊົນຫັນມາປ້ອງກັນ ແລະ ປິ່ນປົວພະຍາດວັນນະໂລກໃຫ້ມີປະສິດທິຜົນຂຶ້ນ, ໃນວັນທີ 23 ມີນານີ້, ທີ່ນະຄອນຫລວງວຽງຈັນ, ໂດຍການເປັນປະທານຂອງທ່ານ ດຣ. ພູວັງ ຫວ່າງວິຈິດ ຮອງຫົວໜ້າສູນຄວບຄຸມວັນນະໂລກ, ກະຊວງສາທາລະນະສຸກ, ມີບັນດາສື່ມວນຊົນ ແລະ ພາກສ່ວນກ່ຽວຂ້ອງເຂົ້າຮ່ວມເປັນຈຳນວນຫລາຍ.
ຮອງຫົວໜ້າສູນຄວບຄຸມວັນນະໂລກ ຍົກໃຫ້ເຫັນວ່າ: ໃນແຕ່ລະປີມີຜູ້ເສຍຊີວິດຈາກພະຍາດວັນນະໂລກສະເລ່ຍແລ້ວ 3.300 ຄົນ ແລະ ມີຜູ້ຕິດເຊື້ອເປັນຈຳນວນຫລວງ ຫລາຍ. ປັດຈຸບັນ ລັດຖະບານລາວ ໄດ້ປັບປຸງຕາໜ່າງການບໍລິການ, ໂດຍສະເພາະວຽກງານຄວບຄຸມພະຍາດດັ່ງກ່າວ, ຊຶ່ງສາມາດຕອບສະໜອງໄດ້ທົ່ວປະເທດ, ນັບແຕ່ສຸກສາລາ, ໂຮງໝໍເມືອງ, ແຂວງ ແລະ ສູນກາງ, ຊຶ່ງຈະໄດ້ເສຍຄ່າບໍລິການແຕ່ຢ່າງໃດ.
ສູນຄວບຄຸມວັນນະໂລກ ໃຫ້ຮູ້ວ່າ: ພະຍາດວັນນະໂລກ ສາມາດຕິດແປດໄດ້ຜ່ານທາງລະບົບຫາຍໃຈຂອງຄົນເປັນພະຍາດນີ້, ໂດຍການໄອ-ຈາມ, ຊຶ່ງທຸກຄັ້ງຈະມີລະອອງເຊື້ອພະຍາດປິວໄປຕາມອາກາດ. ໃນກໍລະນີທີ່ມີຄົນເຈັບທີ່ມີເຊື້ອຢູ່ໃນເຮືອນດຽວກັນແມ່ນມີຄວາມສ່ຽງສູງທີ່ຈະຕິດແປດເຊື້ອພະຍາດດັ່ງກ່າວ, ນອກນີ້ ເດັກນ້ອຍ ແລະ ຜູ້ອາວຸໂສ ທີ່ມີພູມຕ້ານທານຕ່ຳ, ຄົນເປັນພະຍາດເບົາຫວານ, ພະຍາດທາງລະບົບຫາຍໃຈ ແລະ ຂາດສານອາຫານ ກໍມີຄວາມສ່ຽງຕິດແປດເຊັ່ນກັນ. ສຳລັບອາການຜູ້ເປັນພະຍາດວັນນະໂລກແມ່ນຈະມີອາການໄອອອກເລືອດ, ນ້ຳໜັກຫລຸດ, ເປັນໄຂ້, ເຫື່ອອອກຍາມກາງຄືນ, ອິດເມື່ອຍ, ເຈັບໜ້າເອີກ, ຫັນໃຈຝຶດເປັນຕົ້ນ. ສ່ວນການປິ່ນປົວທຳອິດ ແມ່ນການກວດຫາພະຍາດຜ່ານເຄື່ອງສ່ອງລັງສີ ດີຈິຕອນ ແລະ ເຄື່ອງເອັກສເປີດ GeneXpert ແລະ ການບົ່ງມະຕິຈາກທ່ານໝໍທີ່ເຊື່ອຖືໄດ້ ແລະ ການປິ່ນປົວທັງໝົດແມ່ນບໍ່ເສຍຄ່າບໍລິການໃດໆ, ໂດຍສາມາດຮັບການບໍລິການດັ່ງກ່າວໄດ້ຢູ່ທຸກໂຮງໝໍໃນນະຄອນຫລວງວຽງຈັນ, ໃນກໍລະນີປິ່ນປົວແມ່ນຈະແບ່ງອອກເປັນ 3 ປະເພດໃຫຍ່ຄື: ຄົນເຈັບວັນນະໂລກກໍລະນີໃໝ່ ແມ່ນມີໄລຍະປິ່ນປົວປະມານ 6 ເດືອນ, ຄົນທີ່ເຄີຍເປັນມາກ່ອນແລ້ວກັບມາເປັນອີກ ກໍຈະປິ່ນປົວປະມານ 8 ເດືອນ ແລະ ກໍລະນີຄົນເຈັບວັນນະໂລກດື້ຢາ ແມ່ນຈະປິ່ນປົວປະມານ 9 ເດືອນ.
ພະຍາດວັນນະໂລກເປັນບັນຫາ ແລະ ໄພຂົ່ມຂູ່ຕໍ່ສຸຂະພາບຂອງປະຊາຊົນບັນດາເຜົ່າ, ຊຶ່ງອົງການອະນາໄມໂລກໄດ້ສະຫລຸບ ແລະ ຄາດຄະເນວ່າ: ໃນແຕ່ລະປີ ປະຊາກອນໃນທົ່ວໂລກປະມານ 10,4 ລ້ານກວ່າຄົນ ເປັນພະຍາດວັນນະໂລກ ແລະ ມີຜູ້ເສຍຊີວິດເຖິງ 1,8 ລ້ານຄົນ. ນອກນີ້ ຍັງມີອີກຫລາຍຄົນທີ່ບໍ່ສາມາດເຂົ້າເຖິງການປິ່ນປົວຈາກສາທາລະນະສຸກ, ຍ້ອນຄວາມຫຍຸ້ງຍາກທາງດ້ານເສດຖະກິດ ແລະ ຄົມມະນາຄົມ, ຂາດຂໍ້ມູນຂ່າວສານ ແລະ ການບໍລິການຍັງບໍ່ມີຄຸນນະພາບອີກດ້ວຍ.
