ຕ້ານສົງຄາມຮຸກຮານຈາກໂຄວິດແມ່ນພາລະກິດຂອງທຸກຄົນໃນຊາດ

ໂດຍ: ທິດກໍ່າ

ມາຮອດໄລຍະປັດຈຸບັນນີ້ ເຮົາເຫັນວ່າເຊື້ອພະຍາດໂຄວິດ-19 ຍັງເດີນໜ້າແຜ່ລະບາດໄປທົ່ວພາກພື້ນ ແລະ ໃນໂລກ, ຊ້ຳບໍ່ໜຳ ມັນຍັງພັດທະນາເປັນຊະນິດໃໝ່ກາຍພັນ ແລະ ອັນຕະລາຍໄປເລື້ອຍໆ. ອີກປະການໜຶ່ງ ການຊອກຫາຂໍ້ມູນຕົ້ນເຫດ, ທີ່ໄປທີ່ມາຂອງເຊື້ອພະຍາດຊະນິດນີ້ກໍຍັງບໍ່ທັນມີນັກວິທະຍາສາດ ແລະ ອົງກອນສາກົນໃດອອກມາຢັ້ງຢືນວ່າເຊື້ອພະຍາດໂຄວິດ-19 ແມ່ນເກີດມາຈາກໃສ, ຢູ່ປະເທດໃດ ທັງປັດໄຈ ແລະ ເງື່ອນໄຂແມ່ນແນວໃດ, ມັນເກີດມາຈາກທຳມະຊາດ ຫລື ມາຈາກເງື່ອມມືຂອງມະນຸດຜູ້ໃຈດຳອຳມະຫິດທີ່ສ້າງມັນຂຶ້ນມາ ເພື່ອທຳລາຍລ້າງຜານຊີວິດອິນຊີຂອງມວນມະນຸດໃນທົ່ວໂລກ.

ແຕ່ແນວໃດກໍຕາມ, ເພື່ອປ້ອງກັນສະກັດກັ້ນ, ຕ້ານ ແລະ ຄວບຄຸມແກ້ໄຂການລະບາດທີ່ແສນໂຫດໃນທົ່ວໂລກ ໃນບັນດາປະເທດທີ່ພັດທະນາແລ້ວກໍເລັ່ງຜະລິດວັກຊີນເພື່ອມາສ້າງຄວາມຄຸ້ມກັນ ເຮັດໃຫ້ຮ່າງກາຍຂອງມະນຸດສາມາດຕໍ່ສູ້ກັບເຊື້ອພະຍາດດັ່ງກ່າວໄດ້ເປັນສ່ວນໃຫຍ່ ແລະ ມີຫລາຍຮ້ອຍລ້ານຄົນໄດ້ສັກວັກຊີນເປັນທີ່ຮຽບຮ້ອຍ.

ການລະບາດຄັງນີ້ຖືໄດ້ວ່າ ເປັນການລະບາດຄັ້ງທີສາມແມ່ນຊ່ວງໄລຍະຮັບເອົາແຮງງານລາວທີ່ຕິດເຊື້ອມາຈາກປະເທດໄທ ແລະ ຄັ້ງນີ້ລັດຖະບານໄດ້ຖືເປັນຄັ້ງຮ້າຍແຮງທີ່ສຸດໃນປີ 2021 ຈົນມາຮອດໄລຍະນີ້ສະຖິຕິຄົນຕິດນຳເຂົ້າກັບໃນຊຸມຊົນໄລ່ເລ່ຍກັນແລ້ວ ດັ່ງວັນທີ 10 ກັນຍາ 2021 ມີຄົນຕິດເຊື້ອທັງໝົດ 194 ຄົນ ໃນນີ້ຄົນຕິດເຊື້ອນຳເຂົ້າ 108 ຄົນ ລາມໄປຕິດເຊື້ອໃນຊຸມຊົນມີ 86 ຄົນ. ສ່ວນການເສຍຊີວິດແມ່ນຫຍັບຂຶ້ນມາເປັນ 16 ຄົນແລ້ວ. ນີ້ຄືສະພາບຄົນຕິດໂຄວິດ-19 ຢູ່ປະເທດເຮົາ.

ເຖິງຢ່າງໃດກໍດີ, ເມື່ອສົມທຽບໃສ່ໄລຍະທີ່ແຮງງານລາວພາກັນຫລັ່ງໄຫລກັບຄືນບ້ານໃນຊ່ວງເດືອນສິງຫາຫາຕົ້ນເດືອນກັນຍານີ້ ເຫັນວ່າສະຖິຕິຄົນຕິດເຊື້ອໃນແຕ່ລະວັນມີທ່າອ່ຽງຫລຸດລົງ. ແຕ່ກໍເຫັນວ່າຄົນຕິດເຊື້ອໃນຊຸມຊົນພັດມີທ່າອ່ຽງເພີ່ມຂຶ້ນ. ເພາະສະນັ້ນ ເຮົາເຫັນວ່າເພື່ອເປັນການຕ້ານ ແລະ ສະກັດກັ້ນຢ່າງແຂງແຮງ ແລະ ເດັດຂາດ ຕ້ອງພ້ອມກັນເປັນຈິດໜຶ່ງໃຈດຽວກາຍເປັນພະລັງອັນມະຫາສານ ເພື່ອຕ້ານກັບສົງຄາມຊີວະພາບຄັ້ງນີ້ໃຫ້ເຖິງກົກເຖິງຮາກ. ໃນການຕ້ານນີ້ ມັນກໍບໍ່ໜັກໜາສາຫັດຫຍັງ ພຽງຢຸດການຊຸມແຊວ, ປະຕິບັດຕາມຫລັກການທີ່ເພິ່ນແນະນຳ ຢູ່ໃນເຮືອນ ຖ້າບໍ່ຈຳເປັນຢ່າໄປໃສມາໃສ. ສ່ວນຜູ້ຖືກກັກກັນຕົນເອງກໍຕ້ອງປະຕິບັດກົດລະບຽບຂອງສູນໃຫ້ເຂັ້ມງວດ, ສະເພາະຜູ້ທີ່ຊອກຢູ່ຫາກິນ, ໄປວຽກໄປງານ ຫລື ໄປທຸລະອັນຈຳເປັນກໍຕ້ອງໃຊ້ຜ້າປິດປາກ, ໃຊ້ຄວາມຫ່າງ, ໝັ່ນລ້າງມືດ້ວຍສະບູ ຫລື ເຈວຂ້າເຊື້ອເປັນປົກກະຕິ ກໍເປັນອັນວ່າຈົບເລື່ອງ. ສະພາບດຽວນີ້ ທາງແພດໝໍຜູ້ປິ່ນປົວກໍມີການຕິດເຊື້ອ, ຕຳຫລວດ, ທະຫານກໍຕິດເຊື້ອໄປຫລາຍຄົນແລ້ວ, ຜູ້ຕິດເຊື້ອໃນຊຸມຊົນກໍເພີ່ມຂຶ້ນແຕ່ລະມື້ ຖ້າບໍ່ເປັນເຈົ້າການຮ່ວມກັນ ການເຮັດສົງຄາມຕ້ານພະຍາດຈັງໄຮຕາຍຮ່າໂຄວິດ-19 ກໍຈະປະລາໄຊ. ກົງກັນຂ້າມ ຖ້າພວກເຮົາຖືເປັນພາລະກິດຂອງທົ່ວປວງຊົນ ໄຊຊະນະຕ້ອງມາຢູ່ໃນກຳມືຢ່າງແນ່ນອນ.