ອຸຕຸແຈ້ງເຕືອນພາຍຸໂກນເຊິນ! ສະບັບທີ 2 ຈະເຮັດໃຫ້ມີຝົນຕົກໜັກ, ລົມພັດແຮງ ໄລຍະວັນທີ 11 ຫາ 15 ກັນຍາ 2021 ນີ້.
ວັນທີ 10 ກັນຍາ 2021 ນີ້, ກົມອຸຕຸນິຍົມ ແລະ ອຸທົກກະສາດ ໄດ້ອອກໜັງສືແຈ້ງເຕືອນ ພາຍຸເຂດຮ້ອນ ໂກນເຊີນ ມີສູນກາງຢູ່ເຂດທະເລຈີນໃຕ້ຕອນກາງຢູ່ເສັ້ນຂະໜານທີ 15.8 ອົງສາເໜືອ ແລະ ເສັ້ນແວງທີ 111.6 ອົງສາຕາເວັນອອກ ພວມເຄື່ອນທີ່ມາທິດຕາເວັນຕົກ ດ້ວຍຄວາມໄວ 15 ກິໂລແມັດຕໍ່ຊົ່ວໂມງ ແລະ ມີຄວາມໄວສູງສຸດຢູ່ໃກ້ຈຸດສູນກາງປະມານ 30 ແມັດຕໍ່ວິນາທີ. ຄາດວ່າພາຍຸຫົວນີ້ຍັງຈະສືບຕໍ່ເຄື່ອນຂຶ້ນຝັ່ງທາງພາກກາງຕອນເທິງ ຂອງ ສສ ຫວຽດນາມ ໃນຕອນເຊົ້າວັນທີ 13 ກັນຍາ 2021 ຫລັງຈາກນັ້ນ ຈະອ່ອນກຳລັງເປັນພາຍຸດິເປຣ່ຊັນ ແລະ ຈະເຄື່ອນທີ່ຜ່ານພາກກາງ ຫາ ພາກໃຕ້ ສປປ ລາວ ໃນໄລຍະວັນທີ 13 ຫາ 14 ກັນຍາ 2021 ນີ້, ຊຶ່ງຈະສົ່ງຜົນກະທົບຕໍ່ສະພາບອາກາດໃນ ສປປ ລາວ ດັ່ງນີ້:
– ໄລຍະວັນທີ 11-12 ກັນຍາ 2021 ຈະມີຝົນຕົກໜັກ ແລະ ລົມພັດແຮງ ຢູ່ເຂດພາກໃຕ້.
– ໄລຍະວັນທີ 13-15 ກັນຍາ 2021 ຈະມີຝົນຕົກໜັກ ແລະ ລົມພັດແຮງ ຢູ່ເຂດພາກກາງ ແລະ ພາກເໜືອ.
ແຈ້ງເຕືອນເຖິງ ປະຊາຊົນບັນດາເຜົ່າທີ່ອາໄສຢູ່ບັນດາແຂວງດັ່ງກ່າວ ໂດຍສະເພາະຜູ້ທີ່ອາໄສຢູ່ຕາມລຽບຮ່ອມພູ ແລະ ແຄມແມ່ນໍ້າຕ່າງໆ ເປັນຕົ້ນແມ່ນ: ແຂວງສາລະວັນ, ຈຳປາສັກ, ອັດຕະປື, ເຊກອງ, ຫົວພັນ, ຊຽງຂວາງ, ບໍ່ແກ້ວ, ຫລວງນ້ຳທາ, ໄຊສົມບູນ, ໄຊຍະບູລີ, ຫລວງພະບາງ, ວຽງຈັນ, ນະຄອນຫລວງວຽງຈັນ, ບໍລິຄຳໄຊ, ຄຳມ່ວນ ແລະ ສະຫວັນນະເຂດ ຈົ່ງມີສະຕິລະມັດລະວັງຕໍ່ສະພາບດິນເຈື່ອນ, ນໍ້າຖ້ວມຊຸ ແລະ ນ້ໍາຖ້ວມຍຶ່ງ ທີ່ຈະເກີດຂຶ້ນໄດ້ໃນໄລຍະນີ້ ພ້ອມທັງກະກຽມ ຍົກຍ້າຍວັດຖຸສິ່ງຂອງທີ່ມີຄ່າ ແລະ ສັດລ້ຽງໄປໄວ້ບ່ອນທີ່ສູງ ແລະ ປອດໄພ, ຕິດຕາມຂ່າວພະຍາກອນອາກາດ ຈາກກົມອຸຕຸນິຍົມ ແລະ ອຸທົກກະສາດ ໃນໄລຍະ 1- 4 ວັນຕໍ່ໜ້ານີ້.
