ກອງປະຊຸມປະກອບຄຳເຫັນໃສ່ຮ່າງລັດຖະບັນຍັດວ່າດ້ວຍອັດຄ່າຊັບພະຍາກອນທໍາມະຊາດ

ວັນທີ 9 ກັນຍາ 2021 ທີ່ກະຊວງການເງິນ, ໄດ້ຈັດກອງປະຊຸມປຶກສາຫາລືກ່ຽວກັບການປະກອບຄຳຄິດຄຳເຫັນໃສ່ຮ່າງລັດຖະບັນຍັດຂອງປະທານປະເທດ ສະບັບເລກທີ 001/ປປທ, ວ່າດ້ວຍອັດຕາຄ່າຊັບພະຍາ ກອນທໍາມະຊາດ, ໂດຍການເປັນປະທານຂອງທ່ານ ບຸນປອນ ວັນນະຈິດ ຮອງລັດຖະມົນຕີກະຊວງການເງິນ, ມີຄະນະ, ພ້ອມດ້ວຍພະນັກງານຕາງໜ້າຈາກກະຊວງອ້ອມຂ້າງທີ່ກ້ຽວຂ້ອງເຂົ້າຮ່ວມ.

ຮ່າງລັດຖະບັນຍັດສະບັບນີ້, ກໍານົດຫຼັກການ,​ ວິທີການຄິດໄລ່ ແລະ ອັດຕາຄ່າຊັບພະຍາກອນທໍາມະຊາດ ເພື່ອຮັບປະກັນການເກັບຄ່າຊັບພະຍາກອນທຳມະຊາດໃຫ້ຖືກຕ້ອງ, ມີຄວາມເປັນເອກະພາບ ແລະ ມີປະສິດທິຜົນໃນຂອບເຂດທົ່ວປະເທດ, ແນ່ໃສ່ສ້າງລາຍຮັບເຂົ້າງົບປະມານແຫ່ງລັດຕາມກົດໝາຍ, ປະກອບສ່ວນພັດທະນາເສດ ຖະກິດ-ສັງຄົມຂອງຊາດໃຫ້ເຂັັ້ມແຂງ, ຄ່າຊັບພະຍາກອນທຳມະຊາດ ແມ່ນພັນທະດ້ານການເງິນຊຶ່ງບຸກຄົນ, ນິຕິບຸກ ຄົນທັງພາຍໃນ ແລະ ຕ່າງປະເທດທີ່ໄດ້ຮັບອະນຸຍາດດຳເນີນທຸລະກິດກ່ຽວກັບຊັບພະຍາກອນທຳມະຊາດ, ຊຶ່ງຕ້ອງເສຍໃຫ້ລັດຕາມອັດຕາທີ່ໄດ້ກຳນົດໄວ້ໃນລັດຖະບັນຍັດສະບັບນີ້.

ໃນກອງປະຊຸມໄດ້ປະກອບຄໍາເຫັນສະເໜີປັບປຸງໜວດທີ 2 ມາດຕາ 5 ອັດຕາຄ່າຊັບພະຍາກອນແຮ່ທາດ, ມາດຕາ 3 ຫຼັກການການກຳນົດອັດຕາຄ່າຊັບພະຍາກອນທຳມະຊາດ, ມາດຕາ 7 ອັດຕາຄ່າຊັບພະຍາກອນທໍາມະຊາດ, ເພື່ອຮັບໃຊ້ໂຄງການເຂື່ອນໄຟຟ້ານໍ້າຕົກໝວດທີ 4 ບົດບັນຍັດສຸດທ້າຍ, ເພື່ອກໍານົດໃຫ້ມີຄວາມຊັດເຈນຂຶ້ນຕື່ມກ່ຽວກັບການຈັດເກັບຄ່າຊັບພະຍາກອນແຮ່ທາດທີ່ຕ້ອງມອບເຂົ້າງົບປະມານຂອງລັດ ເປັນສະກຸນເງິນໂດລາສະ ຫະລັດ, ເພື່ອກໍານົດຄວາມຮັບຜິດຊອບຂອງກະຊວງການເງິນໃນການຄຸ້ມຄອງວຽກງານຊັບພະຍາກອນທໍາມະຊາດ ໃນການເປັນເຈົ້າການຄິດໄລ່ ແລະ ຈັດເກັບຄ່າຊັບພະຍາກອນທໍາມະຊາດ.