ກັກຕົວປົວໂຄວິດ: ຮ່ວມມືນຳເຈົ້າໜ້າຈະບໍ່ມີມື້ເສຍໃຈ

ໂດຍ: ມຶກບໍ່ແຫ້ງ

ການສະຫງົບເສິກກັບພະຍາດໂຄວິດ-19 ນັ້ນຈະບໍ່ມີມື້ເກີດຂຶ້ນໄດ້ຖ້າເມື່ອໃດພວກເຮົາຍັງບໍ່ໃຫ້ການຮ່ວມມືກັບເຈົ້າໜ້າທີ່ ໂດຍສະເພາະບັນດາທ່ານທີ່ຖືກກັກຕົວເພື່ອປິ່ນປົວໂຄວິດ-19 ຢູ່ຕາມບັນດາສູນຕ່າງໆທົ່ວປະເທດ.

ການເພີ່ມຂຶ້ນຂອງຜູ້ຕິດເຊື້ອໂຄວິດ-19 ໃນ ສປປ ລາວ ບໍ່ມີທ່າທີ່ຈະຫລຸດໜ້ອຍລົງບໍ່ ວ່າທັງກໍລະນີຊຸມຊົນ ກໍຄືນຳເຂົ້າ ເຊິ່ງພວກເຮົາກໍກ້າວເຂົ້າເດືອນທີ 6 ຂອງການປະຕິບັດມາດຕະການຄວບຄຸມ ແລະ ປ້ອງພະຍາດໂຄວິດພາຍຫຼັງການລະບາດຄັ້ງທີສອງ ໃນກາງເດືອນເມສາ 2021 ທີ່ຜ່ານມາ.

ສິ່ງດັ່ງກ່າວແມ່ນເພີ່ມຄວາມກົດດັນຕໍ່ເຈົ້າໜ້າໃນການປະຕິບັດວຽກງານທີ່ມີຄົນໄຂ້ນັບມື້ນັບສູງຂຶ້ນ ເຊິ່ງທ້າທາຍຕໍ່ກຳລັງບຸກຄະລາກອນ, ງົບປະມານ, ສະຖານທີ່ຮອງຮັບ, ຢາ ແລະ ເຄື່ອງຈຳເປັນອື່ນໆເພື່ອໃຫ້ພຽງພໍໃນການຮັກສາໃຫ້ທັນກັບເວລາປ້ອງກັນການເສຍຊີວິດໃຫ້ໜ້ອຍທີ່ສຸດ.

ນອກຈາກສິ່ງທີ່ກ່າວມາຂ້າງເທິງນັ້ນ ເຈົ້າໜ້າທີ່ຍັງໄດ້ພົບພໍ້ກັບສິ່ງທ້າທາຍອັນໜຶ່ງກໍຄືຄວາມບໍ່ເຊື່ອຟັງ, ບໍ່ປະຕິບັດຕາມມາດຕະການທີ່ເຈົ້າໜ້າທີ່ວາງອອກຂອງຜູ້ກັກຕົວໃນບັນດາສູນຕ່າງໆ, ຍິ່ງຈຳນວນຂອງຜູ້ກັກຕົວເພີ່ມສູງຂຶ້ນການຄວບຄຸມ, ຄຸ້ມຄອງ ແລະ ເບິ່ງແຍງກໍອາດພົບຄວາມທ້າທາຍຫຼາຍປະການ.

ບາງພ່ອງກໍຈົ່ມວ່າຜ່ານສື່ອອນລາຍ ກ່ຽວກັບການອຳນວຍຄວາມສະດວກຂອງເຈົ້າໜ້າທີ່ ກໍຄືສະຖານທີ່ບ່ອນກັກຕົວບໍ່ດີພຽງພໍ, ບາງພ່ອງກໍປະທ້ວງຢາກກັບບ້ານກ່ອນ ຈະໄດ້ຮັບການອະນຸຍາດຈາກເຈົ້າໜ້າທີ່, ບາງຈຳນວນກໍບໍ່ປະຕິບັດມາດຕະການປ້ອງກັນເຊັ່ນ ເລາະທ່ຽວໄປມາບໍລິເວນສູນກັກຕົວທີ່ຈະພາໃຫ້ເກີດຄວາມສ່ຽງໃນການແພ່ເຊື້ອໄປສູ່ວົງກວ້າງ, ບາງຄົນກໍລັກເອົາເຄື່ອງໃຊ້ໃນສູນໄປນຳ ແລະ ບັນຫາອື່ນໆທີ່ເກີດຂຶ້ນກັບຜູ້ກັກຕົວບາງຈຳນວນທີ່ສ້າງຄວາມປັ່ນປ່ວນ, ສ້າງຄວາມຫຍຸ້ງຍາກແກ່ເຈົ້າໜ້າທີ່ຕື່ມ.

ແນ່ນອນ, ເມື່ອມີຄົນຈຳນວນຫຼາຍແລ້ວຄວາມສະດວກສະບາຍ ໃນການກັກຕົວ ກໍອາດບໍ່ເປັນດັ່ງເຮົາຄາດຫວັງໄວ້ ດ້ວຍຄວາມຈຳກັດໃນດ້ານຕ່າງໆທີ່ເຈົ້າທີ່ເພິ່ນກະກຽມໄວ້ໃຫ້, ແຕ່ພວກເຮົາກໍຈົ່ງຄິດສະເໝີວ່າ ເມື່ອໃດທີ່ເຈົ້າໜ້າທີ່ເພິ່ນຮັບເອົາມາເພື່ອປິ່ນປົວນັ້ນ ກໍຖືວ່າໂຊກດີກວ່າຫລາຍປະເທດໃນໂລກນີ້ແລ້ວ.

ທ່ານ ພັນຄຳ ວິພາວັນ ນາຍົກລັດຖະມົນຕີແຫ່ງ ສປປ ລາວ ໄດ້ກ່າວຈະແຈ້ງໃນກອງປະຊຸມ ສະໄໝວິສາມັນ ຂອງສະພາແຫ່ງຊາດ ຊຸດ 9 ຜ່ານມາວ່າ “ສປປ ລາວ ຈະຮັບເອົາຄົນລາວ ທີ່ໄປເຮັດຢູ່ຕ່າງປະເທດ ແລ້ວກັບຄືນປະເທດທັງໝົດ ເພາະເຂົາເຈົ້າເຫລົ່ານັ້ນ ເປັນພົນລະເມືອງລາວ ບໍ່ວ່າໄປໂດຍຖືກກົດໝາຍ ຫລື ຜິດກົດໝາຍ” ເຊິ່ງສະແດງເຖິງຄວາມເປັນມະນຸດສະທຳ ແລະ ເຫັນອົກເຫັນໃຈຕໍ່ພົນລະເມືອງລາວເຮົາທັງໝົດ. ເພາະສະນັ້ນພວກເຮົາກໍຄວນເຫັນອົກເຫັນໃຈນຳການປະຕິບັດໜ້າທີ່ຂອງເຈົ້າໜ້າທີ່ເພິ່ນນຳ.

ໃນຍາມວິກິດເຊັ່ນນີ້ ມີແຕ່ຄວາມສາມັກຄີ, ເປັນຈິດໜຶ່ງໃຈດຽວກັນ, ພ້ອມພຽງກັນປະຕິບັດຕາມມາດຕະການຢ່າງເຄັ່ງຄັດທີ່ເຈົ້າໜ້າທີ່ວາງອອກນັ້ນແມ່ນວິທີທາງທີ່ພວກເຮົາຈະຫລຸດພົ້ນອອກຈາກວົງຈອນຂອງພະຍາດຮ້າຍອັນນີ້ໄດ້. ບົດຮຽນຂອງຫຼາຍປະເທດດັ່ງເຊັ່ນ ສສ ຫວຽດນາມ ປະເທດເພື່ອນມິດເຮົານັ້ນສິ່ ງໜຶ່ງທີ່ສ້າງຄວາມເຂັ້ມແຂງຂອງເຂົາເຈົ້າໃນການຄວບຄຸມ ແລະ ປ້ອງກັນພະຍາດໂຄວິດ19 ນີ້ກໍແມ່ນຄວາມເປັນເຈົ້າການ ໃນການປະຕິບັດລະບຽບວິໄນ, ມາດຕະການຕ່າງໆທີ່ເຈົ້າໜ້າທີ່ວາງອອກ ແລະ ແນະນຳຂອງປະຊາຊົນທີ່ຖືກກັກຕົວໃນສູນຕ່າງໆນັ້ນເອງ.

ການປະຕິບັດຕາມມາດຕະການຕ່າງໆນັ້ນບໍ່ແມ່ນໝາຍວ່າ ການຖືກບັງຄັບ ແຕ່ມັນຈະເຮັດໃຫ້ພວກເຮົາປອດໄພນັບທັງຕົນເອງ, ຄອບຄົວ ແລະ ສັງຄົມໃນວົງກວ້າງ, ຖ້າພວກເຮົາສາມາດປະຕິບັດມາດຕະການໄດ້ດີເທົ່າໃດ ໂອກາດທີ່ຈະເຮັດໃຫ້ພວກເຮົາກັບຄືນສູ່ຄວາມປົກກະຕິ ກໍຍິ່ງໄວເທົ່ານັ້ນ.

ເພາະສະນັ້ນ, ພາກັນເຊົາສາເທາະໃນການສ້າງປະກົດການຫຍໍ້ທໍ້ຕ່າງໆ ທີ່ຂັດຂວາງຕໍ່ແນວທາງການຄວບຄຸມ ແລະ ປ້ອງກັນພະຍາດຮ້າຍນີ້, ມີຄວາມຫຍຸ້ງຍາກພຽງໃດພວກເຮົາກໍຈົ່ງອົດທົນໄປນຳກັນ.