WHO ຮຽກຮ້ອງໃຫ້ໂຈະການສັກວັກຊີນເຂັມກະຕຸ້ນໄປຈົນຮອດທ້າຍປີນີ້ ຫລັງປະເທດຮັ່ງມີບໍລິຈາກວັກຊີນໄດ້ພຽງ 15% ຈາກທີ່ໃຫ້ຄຳໝັ້ນສັນຍາໄວ້
ວັນທີ 8 ກັນຍາ 2021, ທ່ານ ດຣ. ທີໂດຣສ ອັດຮານອມ ກີບຣີເຢຊຸສ ຜູ້ອຳນວຍການອົງການອະນາໄມໂລກ (WHO) ຮຽກຮ້ອງໃຫ້ປະຊາຄົມໂລກ ໂດຍສະເພາະປະເທດຮັ່ງມີໂຈະການສັກວັກຊີນເຂັມກະຕຸ້ນ (Booster Dose) ອອກໄປຈົນຮອດທ້າຍປີນີ້ ຫລັງຈາກບໍລິຈາກວັກຊີນໄດ້ພຽງ 15% ຈາກທີ່ເຄີຍໃຫ້ຄຳໝັ້ນສັນຍາໄວ້ ແລະ ມີພົນລະເມືອງໂລກໃນປະເທດລາຍໄດ້ໜ້ອຍຍັງບໍ່ໄດ້ຮັບວັກຊີນຕ້ານໂຄວິດເຂັມທຳອິດອີກເປັນຈຳນວນຫລາຍ.
ກ່ອນໜ້ານີ້, ເຖິງວ່າ WHO ຈະພະຍາຍາມຮຽກຮ້ອງໃຫ້ມີການໂຈະການສັກວັກຊີນເຂັມກະຕຸ້ນອອກໄປຈົນຮອດເດືອນກັນຍານີ້, ແຕ່ບັນດາປະເທດຮັ່ງມີເຊັ່ນ: ອັງກິດ, ເດນມາກ, ຝຣັ່ງ, ກຣີດ, ສະເປນ ລວມທັງອິດສະລາແອນ ແລະ ອາເມລິກາ ທີ່ເລີ່ມຕົ້ນ ຫລື ກຳລັງວາງແຜນຈະສັກວັກຊີນເຂັມກະຕຸ້ນໃຫ້ພົນລະເມືອງຂອງຕົນແລ້ວ ໂດຍສະເພາະໃນກຸ່ມຜູ້ສູງອາຍຸ ແລະ ຜູ້ທີ່ມີບັນຫາດ້ານພູມຕ້ານທານ.
“ຂ້າພະເຈົ້າກຳລັງຮຽກຮ້ອງໃຫ້ມີການຂະຫຍາຍໄລຍະເວລາໂຈະການສັກວັກຊີນເຂັມກະຕຸ້ນອອກໄປຈົນຮອດທ້າຍປີນີ້ ເພື່ອໃຫ້ທຸກໆປະເທດສາມາດສັກວັກຊີນໃຫ້ໄດ້ຢ່າງໜ້ອຍ 40% ຂອງຈຳນວນປະຊາກອນທັງໝົດ”.
ປັດຈຸບັນ ທົ່ວໂລກສັກວັກຊີນຕ້ານໂຄວິດແລ້ວ 5,5 ພັນລ້ານກວ່າໂດສ ໂດຍ 80% ຂອງຈຳນວນວັກຊີນທີ່ສັກໄປລ້ວນແລ້ວແຕ່ຢູ່ໃນປະເທດທີ່ມີລາຍໄດ້ສູງເຖິງລາຍໄດ້ປານກາງ, ບັນດາປະເທດຮັ່ງມີໃຫ້ຄຳໝັ້ນຈະຊ່ວຍກັນບໍລິຈາກວັກຊີນ 1 ພັນລ້ານໂດສໃຫ້ປະເທດອື່ນໆ, ແຕ່ປັດຈຸບັນມີບໍ່ເຖິງ 15% ທີ່ເກີດຂຶ້ນແທ້.
ທ່ານ ເຈນ ຊາກີ ໂຄສົກທຳນຽບຂາວອາເມລິກາ ຊີ້ແຈງວ່າ: ຜ່ານມາລັດຖະບານອາເມລິກາບໍລິຈາກ ແລະ ສົ່ງມອບວັກຊີນຕ້ານໂຄວິດໄປແລ້ວປະມານ 140 ລ້ານໂດສ ເພື່ອຊ່ວຍເຫລືອ 90 ກວ່າປະເທດທົ່ວໂລກ ຫລາຍກວ່າປະເທດອື່ນໆທີ່ບໍລິຈາກລວມກັນ.
ອ້າງອີງ:
https://apnews.com/…/business-health-coronavirus…
https://www.usnews.com/…/who-chief-urges-halt-to…
https://abcnews.go.com/…/chief-urges-halt-booster-shots…
