ສະຖາບັນເສດຖະກິດ-ການເງິນກຳນົດ 8 ແຜນງານ57 ວຽກຈຸດສຸມໃນ 5 ປີຕໍ່ໜ້າ 2021-2025

ສະຖາບັນເສດຖະກິດ-ການເງິນ (ສສງ) ເປັນສະຖາບັນການສຶກສາຊັ້ນສູງຂຶ້ນກັບກະຊວງການເງິນ ໂດຍມີພາລະບົດບາດເປັນເສນາທິການໃຫ້ກະຊວງການເງິນ, ຊຶ່ງໃນ 5 ປີຕໍ່ໜ້າໄດ້ກຳນົດແຜນວຽກຈຸດສຸມທັງໝົດ 8 ແຜນງານ 57 ໜ້າວຽກຈຸດສຸມ, ເພື່ອກໍ່ສ້າງ-ພັດທະນາຊັບພະຍາກອນມະນຸດທາງດ້ານບັນຊີ-ການເງິນທີ່ມີຄຸນນະພາບ.

ທ່ານ ນາງ ກະເສີມສີ ພົມມະວົງສາ ຫົວໜ້າສະຖາບັນເສດຖະກິດ-ການເງິນ ກະຊວງການເງິນ ໃຫ້ສຳພາດກັບທິມຂ່າວການເງິນວ່າ: ແຜນພັດທະນາສະຖາບັນເສດຖະກິດ-ການເງິນໄລະຍະ 5 ປີ (2021-2025) ໄດ້ກໍານົດຄາດໝາຍສູ້ຊົນໃນການພັດທະນາໃຫ້ເປັນສູນກາງ ດ້ານການສ້າງບຸກຄະລາກອນການເງິນ-ການບັນຊີທີ່ມີຄຸນນະພາບການສ້າງພະນັກງານ-ລັດຖະກອນຂະແໜງການເງິນ ທີ່ກຳລັງປະຈໍາການໃຫ້ມີຄຸນທາດການເມືອງ ໜັກແໜ້ນ, ມີຈັນຍາບັນ, ຈັນຍາທໍາທີ່ດີ, ມີຄວາມເຂັ້ມແຂງທາງດ້ານວິຊາສະເພາະ, ຄົ້ນຄວ້າຈັດຕັ້ງຜັນຂະຫຍາຍນະໂຍບາຍ, ຍຸດທະສາດ, ກົດໝາຍ, ມີຄວາມສາມາດນໍາໃຊ້ເຕັກໂນໂລຊີ ແລະ ພາສາຕ່າງປະເທດເຂົ້າໃນການປະຕິບັດໜ້າາທີ່ວຽກງານທີ່ຕົນຮັບຜິດຊອບຢ່າງມີປະສິດທິພາບປະສິດທິຜົນ.

ປັດຈຸບັນສະຖາບັນເສດຖະກິດ-ການເງິນປະກອບມີ 6 ພະແນກ, 5 ພາກວິຊາ ແລະ 1 ສູນຝຶກອົບຮົມ, ມີພະນັກງານ-ຄູອາຈານທັງໝົດ 96 ຄົນ, ຍິງ 35 ຄົນ. ໃນນັ້ນ, ລະດັບການສຶກສາປະລິນຍາເອກ 1 ຄົນ,ຍິງ 1ຄົນ, ປະລິນຍາໂທ 53 ຄົນ, ຍິງ 19 ຄົນ, ປະລິນຍາຕີ 41 ຄົນ, ຍິງ 16 ຄົນ, ຊັ້ນສູງ 1 ຄົນ, ຍິງ 1ຄົນ ແລະ ບໍ່ມີຊັ້ນ 1ຄົນ, ຍິງ 1ຄົນ, ກຳລັງສຶກສາຕໍ່ປະລິນຍາເອກ 4 ຄົນ, ຍິງ 1ຄົນ, ປະລິນຍາໂທ 3 ຄົນ, ໂດຍມີພາລະບົດບາດໃນການກໍ່ສ້າງ ແລະ ພັດທະນາຊັບພະຍາກອນມະນຸດທາງດ້ານເສດຖະກິດ-ການເງິນ, ຄົ້ນຄ້ວາວິທະຍາສາດດ້ານວິຊາການ ກ່ຽວກັບວຽກງານເສດຖະກິດ-ການເງິນ.

ສຳລັບແຜນງານທີ1 ແຜນງານປັບປຸງກົງຈັກການຈັດຕັ້ງ ແລະ ພັດທະນາບຸກຄະລາກອນປະກອບມີໜ້າວຽກຈຸດສຸມ, ປັບປຸງພາລະບົດບາດໂຄງປະກອບການຈັດຕັ້ງຂອງສະຖາບັນ ແລະ ວິທະຍາໄລການເງິນພາກເໜືອ,ພາກໃຕ້ ເພື່ອຮັບປະກັນການຈັດວາງໜ້າວຽກລະຫວ່າງພະແນກ, ສູນຝຶກແລະພາກວິຊາການ; ສ້າງສະຖາບັນເສດຖະກິດ-ການເງິນ, ວິທະຍາໄລການເງິນພາກເໜືອ-ພາກໃຕ້ໃຫ້ກາຍເປັນສູນກາງສ້າງ ແລະ ພັດທະນາບຸກຄະລາກອນຂະແໜງການເງິນພວມປະຈຳການທີ່ມີຄຸນນະພາບ, ພັດທະນາບຸກຄະລາກອນຄູຂອງສະຖາບັນໃຫ້ມີຄຸນນະພາບ, ເພື່ອກຽມຄວາມພ້ອມໃຫ້ແກ່ການສົ່ງຄວາມຮູ້ໃນການປະຕິບັດວຽກງານການຮຽນ-ການສອນ ແລະ ການຝຶກອົບຮົມພະນັກງານພວມປະຈຳການໃຫ້ມີຄຸນທາດການເມືອງໜັກແໜ້ນ,ມີຈັນຍາບັນ, ຈັນຍາທຳ, ມີຄວາມສາມາດໃນການຜັນຂະຫຍາຍແນວທາງນະໂຍບາຍ, ລະບຽບກົດໝາຍ,ຮູ້ນຳໃຊ້ເຕັກໂນໂລຊີ ແລະ ພາສາຕ່າງປະເທດເຂົ້າໃນການປະຕິບັດວຽກງານວິຊາສະເພາະ.

ແຜນງານທີ 2 ແຜນງານການສ້າງ ແລະ ພັດທະນາຫຼັກສູດການຮຽນ-ການສອນ, ຫຼັກສູດຝຶກອົບຮົມ ແລະ ປັບປຸງຮູບແບບການຮຽນ-ການສອນໃຫ້ແທດເໝາະກັບສະພາບການໃໝ່ປະກອບມີບັນດາໜ້າວຽກ, ການສ້າງ ແລະ ປັບປຸງຫຼັກສູດການຮຽນ-ການສອນ ແລະ ຫຼັກສູດຝຶກອົບຮົມໂດຍເນັ້ນໃສ່ຫຼັກສູດທີ່ຢູ່ໃນເປົ້າໝາຍສ້າງພະນັກງານພວມປະຈຳການໃນຂົງເຂດວຽກງານການເກັບລາຍຮັບເປັນຕົ້ນຕໍ ແລະ ວຽກງານປິ່ນອ້ອມອື່ນໆເຊັ່ນ: ຫຼັກສູດພາສີ, ສ່ວຍສາອາກອນ, ຫຼັກສູດບັນຊີ ແລະ ຫຼັກສູດໄອທີ.

ສຳລັັບຫຼັກສູດຝຶກອົບຮົມໄດ້ຈັດເປັນສາມຫຼັກສູດ (ຂັ້ນກົມ, ຂັ້ນພະແນກ ແລະ ຂັ້ນວິຊາການ) ແລະ ແຕ່ລະຫຼັກສູດ ປະກອບມີ: ຄວາມຮູ້ກ່ຽວກັບການເຊື່ອມຊືມແນວທາງ, ນະໂຍບາຍ, ຈັນຍາບັນ,ຈັນຍາທຳ, ຄວາມຮູ້ທົ່ວໄປເປັນຕົ້ນ: ການຄຸ້ມຄອງບໍລິຫານລັດ, ເຕັກນິກການສຳພາດ, ເຕັກນິກການນຳສະເໜີ, ການຮ່າງເອກະສານລາຍງານ, ປັບປຸງຮູບແບບການຮຽນ-ການສອນໃຫ້ສອດຄ່ອງກັບມາດຖານຫຼັກສູດແຫ່ງຊາດສະບັບປັບປຸງໃໝ່ ໂດຍເອົານັກສຶກສາເປັນໃຈກາງ, ຄູເປັນຜູ້ນຳພາ, ຈາກຄູເປັນຄົນເວົ້າ 75% ຫັນມາໃຫ້ນັກສຶກສາເປັນຜູ້ຄົ້ນຄ້ວາເປັນຜູ້ເວົ້າ 75% ແລະ ຫັນການຮຽນ-ການສອນໃນຮູບແບບທັນສະໄໝຂຶ້ນໃນສະພາບການແຜ່ລະບາດຂອງພະຍາດໂຄວິດ-19 ເພື່ອຮັບປະກັນດຳເນີນການຮຽນ-ການສອນໄປຕາມຫຼັກສູດ ແລະ ທັນກຳນົດເວລາ.

ແຜນງານທີ 3 ແຜນງານຝຶກອົບຮົມຍົກລະດັບພະນັກງານພວມປະຈຳການເພື່ອປະຕິບັດຄາດໝາຍສູ້ຊົນ, ສ້າງພະນັກງານ-ລັດຖະກອນຂະແໜງການເງິນໃຫ້ມີຄຸນທາດການເມືອງໜັກແໜ້ນ, ມີຈັນຍາບັນ, ຈັນຍາທຳທີ່ດີ, ມີຄວາມເຂັ້ມແຂງດ້ານວິຊາສະເພາະ, ມີຄວາມສາມາດຄົ້ນຄ້ວາ, ຈັດຕັ້ງຜັນຂະຫຍາຍນະໂຍບາຍ, ຍຸດທະສາດ, ກົດໝາຍໄດ້ດີ, ມີຄວາມສາມາດນຳໃຊ້ເຕັກໂນໂລຊີ ແລະ ພາສາຕ່າງປະເທດ ຕາມທີ່ກຳນົດໃນແຜນດຳເນີນງານ 5 ປີຂອງກະຊວງການເງິນ ໂດຍຈະເນັ້ນໃນສອງຮູບແບບການຝຶກອົບຮົມຄື: ຝຶກອົບຮົມເປັນຫົວຂໍ້ສະເພາະ ແລະ ຝຶກອົບຮົມເປັນຫຼັກສູດໃນສາມຫຼັກສູດທີ່ກຳນົດ.

ແຜນງານທີ 4 ແຜນງານຄົ້ນຄ້ວາວິໄຈວິທະຍາສາດດ້ານການເງິນ ແລະ ການບັນຊີປະກອບມີບັນດາໜ້າວຽກ ຄົ້ນຄ້ວາຫົວຂໍ້ຕິດພັນກັບນະໂຍບາຍຂະແໜງການເງິນ ແລະ ພັດທະນາເສດຖະກິດ-ສັງຄົມ, ບັນດາຫົວຂໍ້ທີ່ຕິດພັນກັບມາດຕະການຄຸ້ມຄອງເກັບລາຍຮັບ-ລາຍຈ່າຍງົບປະມານ ແລະ ຫົວຂໍ້ຕິດພັນວຽກງານການເງິນ-ການບັນຊີ ແລະ ອື່ນໆ.

ແຜນງານທີ 5 ແຜນງານພັດທະນາລະບົບຄຸ້ມຄອງບໍລິຫານການສຶກສາເປັນທັນສະໄໝປະກອບມີໜ້າວຽກ ລະບົບຂຶ້ນທະບຽນ, ເກັບກຳຂໍ້ມູນສະຖິຕິນັກສຶກສາ, ຄູ-ອາຈານ, ການຕິດຕາມການຮຽນ-ການສອນຂອງຄູ-ອາຈານ ແລະ ນັກສຶກສາ, ການຈັດຕາຕະລາງແຜນການຮຽນ-ການສອນ, ການຝຶກອົບຮົມ, ການສັງລວມ ແລະ ຄຸ້ມຄອງຂໍ້ມູນຂ່າວສານ, ປື້ມຕຳລາຮຽນ, ການຕິດຕາມການຊຳລະຄ່າຮຽນ, ການຄຸ້ມຄອງຊັບພະຍາກອນຫໍສະໝຸດ, ການຄຸ້ມຄອງຊັບສິນ, ຫ້ອງຮຽນໄອທີ ແລະ ຫ້ອງຈຳລອງການມອບພັນທະ ແລະ ໜ້າວຽກອື່ນໆ.

ແຜນງານທີ 6 ແຜນງານພັດທະນາພື້ນຖານໂຄງລ່າງ, ປະກອບວັດຖຸເຕັກນິກ ແລະ ຄຸ້ມຄອງນຳໃຊ້ແຫຼ່ງທຶນທີ່ມີປະສິດທິຜົນປະກອບມີລະບົບການຄຸ້ມຄອງພັດທະນາພື້ນຖານໂຄງລ່າງໄລຍະ 3 ໂດຍນຳໃຊ້ແຫຼ່ງທຶນຊ່ວຍເຫຼືອຈາກລັດຖະບານ ສສ ຫວຽດນາມ ແລະ ທຶນສົມທົບລັດຖະບານ ສປປ ລາວ, ການປະກອບວັດຖຸອຸປະກອນໃສ່ຫ້ອງຈຳລອງ, ຫ້ອງຮຽນໄອທີ ແລະ ຫ້ອງສະໝຸດ, ຄຸ້ມຄອງການເງິນ ແລະ ນຳໃຊ້ແຫຼ່ງທຶນຢ່າງມີປະສິດທິຜົນ.

ແຜນງານທີ 7 ແຜນງານຈັດຕັ້ງປະຕິບັດວຽກງານກວດກາ ແລະ ປະກັນຄຸນນະພາບປະກອບມີໜ້າວຽກຕິດຕາມກວດກາການປະຕິບັດວຽກງານຂອງບັນດາພະແນກ, ສູນຝຶກ ແລະ ພາກວິຊາເພື່ອຮັບປະກັນໃຫ້ແກ່ການຈັດຕັ້ງປະຕິບັດແຜນພັດທະນາສະຖາບັນໃນ 5 ປີຕໍ່ໜ້າໃຫ້ມີການເຄື່ອນໄຫວຢ່າງຕໍ່ເນື່ອງ,ມີປະສິດທິຜົນ,ໂປ່ງໃສ ແລະ ໄດ້ຮັບຜົນສຳເລັດ.

ແຜນງານທີ 8 ແຜນງານຈັດຕັ້ງປະຕິບັດສັນຍາຮ່ວມມືກັບບັນດາສະຖາບັນການສຶກສາທັງພາຍໃນ ແລະ ຕ່າງປະເທດ ເພື່ອຊ່ວຍເຫລືອ ແລະ ແລກປ່ຽນດ້ານວິຊາຮ່ວມກັນ ປະກອບມີສັນຍາຮ່ວມມືກັບມະຫາວິທະຍາໄລສຸພານຸວົງ, ມະຫາວິທະຍາໄລຈຳປາສັກ, ວິທະຍາໄລການເງິນພາກເໜືອ, ພາກໃຕ້, ສະຖາບັນການເງິນ ສສ ຫວຽດນາມ, ໂຮງຮຽນບຳລຸງພະນັກງານການເງິນ ສສ ຫວຽດນາມ, ສຳນັກງານຄວາມຮ່ວມມືພັດທະນາເສດຖະກິດ(NEDA) ມະຫາວິທະຍາໄລລາດສະພັດຊຽງລາຍ ແລະ ສະຖາບັນການບັນຊີນະຄອນຊຽງໄຮກະຊວງການເງິນ ສປຈີນ ແລະ ຈະຂະຫຍາຍການຮ່ວມມື ກັບສະຖາບັນການສຶກສາອື່ນໆຕື່ມອີກ.

ຄຽງຄູ່ກັນນີ້, ເພື່ອຕອບສະໜອງຄວາມຮຽກຮ້ອງຕ້ອງການຂອງຂະແໜງການເງິນ ແລະ ຕະຫຼາດແຮງງານ ສະຖາບັນເສດຖະກິດ-ການເງິນ, ຍັງຈະໄດ້ສຸມໃສ່ສ້າງ-ປັບປຸງຫຼັກສູດການຮຽນ-ການສອນຫຼັກສູດການຮຽນ-ການສອນໃໝ່ 3 ສາຂາວິຊາຮຽນຄື: ສາຂາພາສີ (ປະລິນຍາຕີຕໍ່ເນື່ອງ), ສາຂາການບັນຊີ (ປະລິນຍາຕີຕໍ່ເນື່ອງ) ແລະ ສາຂາໄອທີ (ອະນຸປະລິນຍາຕີ ແລະ ປະລິນຍາຕີຕໍ່ເນື່ອງ). ນອກຈາກນັ້ນ, ຍັງໄດ້ປັບປຸງລາຍວິຊາໃນຫຼັກສູດທີ່ມີແລ້ວໃຫ້ສອດຄ່ອງກັບສະພາບການສ້າງ ແລະ ປັບປຸງນິຕິກຳແລະຄູ່ມືຂອງຂະແໜງການໃນແຕ່ລະສາຂາວິຊາຮຽນ ນຳອີກດ້ວຍ.