ຜະດຸງຄັນທີ່ໄດ້ຜ່ານການຝຶກອົບຮົມ ຈະຊ່ວຍຫລຸດຜ່ອນການຕາຍຂອງແມ່ໄດ້ ໃນໄລຍະການລະບາດໂຄວິດ-19

ຜະດຸງຄັນມີບົດບາດທີ່ສຳຄັນຫລາຍໃນການປ້ອງກັນ ແລະ ຫລຸດຜ່ອນອັດຕາການຕາຍເຫລົ່ານັ້ນ ເຖິງຈະຢູ່ໃນໄລຍະການລະບາດຂອງພະຍາດໂຄວິດ-19 ກໍຕາມ, ພ້ອມທັງຕ້ອງໝັ້ນໃຈວ່າຄຸນນະພາບການສຶກສາດ້ານຜະດຸງຄັນ ແມ່ນຢູ່ໃນລະດັບທີ່ສູງ, ສ້າງກຸ່ມບຸກຄະລາກອນຜະດຸງຄັນໃໝ່ ທີ່ມີທັກສະສູງ ແລະ ພັດທະນາທັກສະໃໝ່ໃຫ້ແກ່ຜະດຸງຄັນ ທີ່ພວມປະຕິບັດວຽກງານໃນປັດຈຸບັນ. ພຽງເທົ່ານັ້ນ ສປປ ລາວ ຈຶ່ງຈະສາມາດຫລຸດຜ່ອນການຕາຍຂອງແມ່ ແລະ ປັບປຸງຄຸນນະພາບການດູແລສຸຂະພາບຂອງແມ່.

ການລົງທຶນໃນການສ້າງຄວາມເຂັ້ມແຂງ ໃຫ້ແກ່ຄຸນນະພາບການບໍລິການຂອງຜະດຸງຄັນ ໄດ້ສົ່ງຜົນດີໃຫ້ແກ່ສຸຂະພາບແມ່, ເດັກເກີດໃໝ່ ແລະ ເດັກ. ຫລັກຖານຫລ້າສຸດໄດ້ສະແດງໃຫ້ເຫັນວ່າ 83% ຂອງການຕາຍທັງໝົດໃນກຸ່ມແມ່, ເດັກເກີດກ່ອນກຳນົດ ແລະ ເດັກເກີດໃໝ່ ແມ່ນສາມາດຫລີກລ້ຽງໄດ້ ຖ້າໄດ້ຮັບການດູແລດ້ານຜະດຸງຄັນແບບເຕັມຮູບແບບ ລວມເຖິງການວາງແຜນຄອບຄົວອີກດ້ວຍ. ເພື່ອໃຫ້ໝັ້ນໃຈວ່າແມ່ຍິງທຸກຄົນ ໃນຊ່ວງອາຍຸຂອງການຈະເລີນພັນ ສາມາດຮັບການດູແລດ້ານການແພດພະດຸງຄັນທີ່ມີຄຸນນະພາບສູງ ເຮົາຕ້ອງຖືເອົາປັດໄຈສຳຄັນດັ່ງນີ້: ໃຫ້ຈັດຕັ້ງມາດຕະ ຖານການສຶກສາຂອງຜະດຸງຄັນໃຫ້ຢູ່ໃນລະດັບທີ່ສູງ, ສ້າງ ແລະ ຈັດຕັ້ງຈຳນວນຜະດຸງຄັນໃຫ້ຢູ່ໃນເກນທີ່ເໝາະສົມ, ຈັດຕັ້ງແຜນງານດ້ານນະໂຍບາຍ ແລະ ກົດໝາຍໃຫ້ມີຄວາມເຂັ້ນແຂງ ແລະ ໃຫ້ມີຄວາມຈະແຈ້ງໃນດ້ານການນຳໃຊ້.

ລັດຖະບານແຫ່ງ ສປປ ລາວ ໄດ້ໃຫ້ຄຳໝັ້ນສັນຍາ ໃນການບັນລຸເປົ້າໝາຍ ທີ່ໄດ້ຕົກລົງໃນກອງປະຊຸມສາກົນວ່າດ້ວຍປະຊາກອນ ແລະ ການພັດທະນາ 25 (ICPD25) ວ່າ ພາຍໃນປີ 2030 ຈະບໍ່ໃຫ້ມີການຕາຍຂອງແມ່ (MMR) ໂດຍນຳໃຊ້ການດູແລທີ່ມີຄຸນນະພາບ ແລະ ການນຳໃຊ້ແຜນຍຸດທະສາດດ້ານສຸຂະພາບຈະເລີນພັນ, ສຸຂະພາບແມ່, ເດັກເກີດໃໝ່, ເດັກນ້ອຍ ແລະ ໄວໜຸ່ມ ແລະ ໃຫ້ໝັ້ນໃຈວ່າມີການສະໜອງການບໍລິການ ດ້ານສຸຂະພາບທີ່ສາມາດເຂົ້າເຖິງໄດ້, ລາຄາບໍ່ແພງ ແລະ ມີຄຸນນະພາບສູງ. ເປົ້າໝາຍໄດ້ຖືກຈັດຕັ້ງ, ເພື່ອເພີ່ມຈຳນວນແມ່ຍິງ ທີ່ຜ່ານການເກີດລູກ ໂດຍມີການຊ່ວຍເຫລືອຈາກຜູ້ຊ່ຽວຊານສະເພາະດ້ານການເກີດລູກໃຫ້ຂຶ້ນເປັນ 90%. ອີງຕາມສະຖິຕິຫລ້າສຸດ (LSIS II, 2017) ມີພຽງ 65% ຂອງແມ່ຍິງທັງໝົດ ທີ່ໄດ້ເກີດລູກ ໂດຍມີການຊ່ວຍເຫລືອຈາກຜູ້ຊ່ວຍເກີດລູກທີ່ຊຽວຊານ. ພ້ອມກັນນີ້, ການບໍລິການດ້ານຜະດຸງຄັນທີ່ມີຄຸນນະພາບ ແລະ ໄດ້ຮັບຄວາມເຊື່ອໃຈຈາກປະຊາຊົນ ແມ່ນມີຄວາມສຳຄັນໃນການບັນລຸເປົ້າໝາຍ ICPD25.

ຂໍ້ມູນ: ອົງການ UNFPA