ຜົນວິເຄາະຊີ້ວ່າ ປະເທດຮັ່ງມີຈະມີວັກຊີນໂຄວິດເຫລືອໃຊ້ຫລາຍກວ່າ 1,2 ພັນລ້ານໂດສ ໃນທ້າຍປີນີ້
ບໍລິສັດວິເຄາະຂໍ້ມູນ Airfinity ຂອງອັງກິດ ເປີດເຜີຍລາຍງານວິເຄາະຂໍ້ມູນການຈັດຫາວັກຊີນໂຄວິດ-19 ຫລ້າສຸດຂອງບັນດາປະເທດຮັ່ງມີ ທັງອາເມລິກາ, ອັງກິດ, ສະຫະພາບເອີຣົບ, ການາດາ ແລະ ຍີ່ປຸ່ນ ໂດຍຄາດວ່າປະເທດເຫລົ່ານີ້ອາດມີວັກຊີນສ່ວນເກີນເຫລືອຢູ່ຫລາຍກວ່າ 1,2 ພັນລ້ານໂດສໃນທ້າຍປີນີ້.
ຂໍ້ມູນໃນລາຍງານສະບັບນີ້ທີ່ກຽມເຜີຍແຜ່ໃນວັນທີ 7 ກັນຍານີ້ ພົບວ່າ: ພາຍໃນເດືອນນີ້ກຸ່ມປະເທດຮັ່ງມີຈະມີວັກຊີນສະສົມໄວ້ໃນສາງສູງເຖິງ 500 ລ້ານໂດສ ເຊິ່ງໃນຈຳນວນນີ້ 360 ລ້ານໂດສ ບໍ່ໄດ້ຖືກຈັດສັນໄວ້ສຳລັບການບໍລິຈາກໃຫ້ປະເທດທຸກຍາກ.
ຂະນະທີ່ໃນທ້າຍປີນີ້ ປະເທດເຫລົ່ານີ້ຈະມີວັກຊີນໂຄວິດສ່ວນເກີນສູງເຖິງ 1,2 ພັນລ້ານໂດສ ເຊິ່ງສ່ວນຫລາຍ 1,06 ພັນລ້ານໂດສນັ້ນ ບໍ່ໄດ້ກຳນົດໄວ້ສຳລັບບໍລິຈາກ.
ຂໍ້ມູນດັ່ງກ່າວສະທ້ອນເຖິງບັນຫາຄວາມບໍ່ເທົ່າທຽມໃນການຈັດຫາວັກຊີນ ເຊິ່ງຜ່ານມາມີຜູ້ຊ່ຽວຊານ ແລະ ບຸກຄະລາກອນດ້ານສາທາລະນະສຸກໃນຫລາຍປະເທດອອກມາສະແດງທ່າທີຕໍ່ຕ້ານ ແລະ ປະນາມຄວາມບໍ່ເທົ່າທຽມໃນການຈັດຫາວັກຊີນໂຄວິດຂອງປະເທດຕ່າງໆ.
ໂດຍທ່ານ ທີໂດຣສ ອັດຮານອມ ກີບຣີເຢຊຸສ ຜູ້ອຳນວຍການອົງການອະນາໄມໂລກ ຫລື WHO ກ່າວໃນກອງປະຊຸມລັດຖະມົນຕີສາທາລະນະສຸກຂອງກຸ່ມປະເທດ G20 ໃນວັນທີ 5 ກັນຍາວ່າ: ບັນຫາຄວາມບໍ່ເທົ່າທຽມດ້ານວັກຊີນນັ້ນເປັນສິ່ງທີ່ຍອມຮັບບໍ່ໄດ້.
ເຊິ່ງທ່ານເປີດເຜີຍວ່າ: ອັດຕາການສັກວັກຊີນທົ່ວໂລກທີ່ສັກໄປແລ້ວຫລາຍກວ່າ 5 ພັນລ້ານໂດສນັ້ນ ເກືອບ 75% ເປັນວັກຊີນທີ່ຖືກດຳເນີນການສັກໃນ 10 ປະເທດ, ສ່ວນປະເທດເຂດທະວີບອາຟຣິການັ້ນມີອັດຕາສັກວັກຊີນຄວບຄຸມພຽງປະມານ 2%.
ຂະນະທີ່ທ່ານ ກໍດອນ ບຣາວ ອະດີດນາຍົກລັດຖະມົນຕີອັງກິດ ກ່າວປະນາມກຸ່ມປະເທດຮັ່ງມີທີ່ກຳລັງກັກຕຸນວັກຊີນໂຄວິດ. ຂະນະທີ່ປະເທດທຸກຍາກປະສົບບັນຫາຄວາມລຳບາກໃນການຈັດຫາວັກຊີນວ່າເປັນການກະທຳທີ່ “ໄຮ້ຄຸນນະທຳ”.
ທັງນີ້ ໂຄງການແບ່ງປັນວັກຊີນ COVAX ທີ່ໄດ້ຮັບການສະໜັບສະໜູນຈາກ WHO ເປັນໜຶ່ງໃນແນວທາງແກ້ໄຂບັນຫາຄວາມບໍ່ເທົ່າທຽມດ້ານວັກຊີນ ໂດຍພະຍາຍາມຊ່ວຍເຫລືອໃຫ້ປະເທດທຸກຍາກເຂົ້າເຖິງວັກຊີນໂຄວິດ ແລະ ມີເປົ້າໝາຍຈັດຫາວັກຊີນ 2 ພັນລ້ານໂດສ ເພື່ອແຈກຢາຍໃຫ້ 190 ປະເທດພາຍໃນປີນີ້ ເຊິ່ງໃນຈຳນວນນີ້ລວມທັງ 92 ປະເທດລາຍໄດ້ໜ້ອຍ ແລະ ຄາດວ່າຈະຊ່ວຍໃຫ້ປະຊາກອນໃນປະເທດເຫລົ່ານີ້ໄດ້ຮັບການສັກວັກຊີນຢ່າງໜ້ອຍ 20%.
ເຖິງຢ່າງໃດກໍຕາມ, ການເຮັດຂໍ້ຕົກລົງສັ່ງຊື້ວັກຊີນລະຫວ່າງປະເທດຮັ່ງມີກັບບໍລິສັດຜູ້ຜະລິດວັກຊີນຕ່າງໆ ຍັງສົ່ງຜົນໃຫ້ການຈັດຫາວັກຊີນສຳລັບໂຄງການ COVAX ເປັນໄປຢ່າງຈຳກັດ ແລະ ນຳໄປສູ່ບັນຫາການກັກຕຸນວັກຊີນ.
ອ້າງອີງ:
https://www.aljazeera.com/…/rich-countries-will-have-1…
