ຟີລິບປິນຍົກເລີກຫ້າມການເດີນທາງຈາກ 10 ປະເທດເລີ່ມມື້ນີ້ ແຕ່ຍັງຕ້ອງກັກຕົວ 14 ວັນ
ວັນທີ 4 ກັນຍາ 2021, ທ່ານ ແຮຣີ ໂຣເກ ໂຄສົກປະທານາທິບໍດີຟີລິບປິນ ເປີດເຜີຍວ່າ: ປະທານາທິບໍດີ ໂຣດຣິໂກ ດູເຕີເຕ ໄດ້ຍົກເລີກມາດຕະການຫ້າມການເດີນທາງຈາກ 10 ປະເທດ ຫລັງຈາກເລີ່ມປະກາດໃຊ້ມາດຕະການດັ່ງກ່າວແຕ່ເດືອນເມສາຜ່ານມາ ກ່ອນຈະອັບເດດລາຍຊື່ປະເທດອີກໃນເດືອນກໍລະກົດ ເພື່ອຄວບຄຸມການແຜ່ລະບາດຂອງເຊື້ອເດວຕາ ໂດຍການປ່ຽນແປງຄັ້ງຫລ້າສຸດນີ້ຈະມີຜົນເລີ່ມແຕ່ວັນທີ 6 ກັນຍານີ້.
ໂດຍຜູ້ທີ່ເດີນທາງມາຈາກອິນເດຍ, ສີລັງກາ, ປາກິດສະຖານ, ບັງກະລາເທດ, ເນປານ, ສະຫະລັດອາຣັບເອມິເຣດ, ໂອມານ, ໄທ, ມາເລເຊຍ ແລະ ອິນໂດເນເຊຍ ຈະໄດ້ຮັບອະນຸຍາດໃຫ້ເດີນທາງເຂົ້າຟີລິບປິນໄດ້ ແຕ່ຍັງຈະຕ້ອງກັກຕົວ 14 ວັນເມື່ອເດີນທາງມາເຖິງ.
ປັດຈຸບັນ ຟີລິບປິນກຳລັງຜະເຊີນການແຜ່ລະບາດຂອງໂຄວິດຮອບໃໝ່ ສົ່ງຜົນໃຫ້ມີຜູ້ຕິດເຊື້ອສະສົມແລ້ວ 2,04 ລ້ານຄົນ ຫລາຍທີ່ສຸດເປັນອັນດັບ 2 ຮອງຈາກອິນໂດເນເຊຍ, ມີຜູ້ຕິດເຊື້ອໃໝ່ສະເລ່ຍໃນໄລຍະ 7 ວັນຜ່ານມາປະມານ 1,8 ໝື່ນຄົນ, ມີຜູ້ເສຍຊີວິດແລ້ວ 33.873 ຄົນ ໂດຍຟີລິບປິນຖືເປັນປະເທດທີ່ມີອັດຕາສ່ວນປະຊາກອນເຂົ້າຮັບວັກຊີນໜ້ອຍເປັນອັນດັບທ້າຍໆຂອງອາຊຽນ ເຊິ່ງມີພຽງ 13,05% ຂອງປະຊາກອນທັງໝົດທົ່ວຟີລິບປິນເທົ່ານັ້ນທີ່ເຂົ້າຮັບວັກຊີນຄົບໂດສແລ້ວ.
ອ້າງອີງ:
- https://www.channelnewsasia.com/asia/philippines-lift-covid-19-travel-ban-malaysia-indonesia-thailand-2156311
- https://www.hindustantimes.com/world-news/philippines-to-lift-travel-ban-on-india-uae-and-8-other-countries-from-monday-101630747052928.html
- https://coronavirus.jhu.edu/region/philippines
