ໄພພິບັດຈາກໂລກຮ້ອນເພີ່ມຂຶ້ນ 5 ເທົ່າໃນຮອບ 50 ປີຜ່ານມາ
ອົງການອຸຕຸນິຍົມວິທະຍາໂລກ (WMO) ເປີດເຜີຍວ່າ: ໃນໄລຍະ 50 ປີຜ່ານມາ ໄພພິບັດທາງສະພາບອາກາດເຊັ່ນ: ນ້ຳຖ້ວມ, ຄື້ນຄວາມຮ້ອນ, ໄພແຫ້ງແລ້ງ ເນື່ອງມາຈາກການປ່ຽນແປງຂອງສະພາບອາກາດເກີດເພີ່ມຂຶ້ນ 5 ເທົ່າ ແລະ ສ້າງຄວາມເສຍຫາຍເພີ່ມຂຶ້ນ 7 ເທົ່າ ສົ່ງຜົນໃຫ້ມີຜູ້ເສຍຊີວິດລວມຫລາຍກວ່າ 2 ລ້ານຄົນ ແລະ ສ້າງຄວາມເສຍຫາຍທັງໝົດ 3,64 ພັນຕື້ໂດລາສະຫະລັດ.
WMO ກວດສອບການເສຍຊີວິດ ແລະ ຄວາມເສຍຫາຍທາງເສດຖະກິດຈາກສະພາບດິນຟ້າອາກາດ, ນ້ຳ ແລະ ສະພາບອາກາດສຸດຂົ້ວທີ່ເຄີຍເກີດຂຶ້ນກວ່າ 11.000 ຄັ້ງ ນັບແຕ່ປີ 1970-2019 ໂດຍໃຊ້ຂໍ້ມູນຈາກສູນວິໄຈລະບາດວິທະຍາດ້ານໄພພິບັດຂອງເບລຢ້ຽມ.
ພົບວ່າໃນໄລຍະທົດສະວັດ 1970 ໂລກຜະເຊີນໄພພິບັດດ້ານສະພາບອາກາດສະເລ່ຍປີລະ 711 ຄັ້ງ ແຕ່ນັບແຕ່ປີ 2000-2009 ຕົວເລກດັ່ງກ່າວເພີ່ມເປັນ 3.536 ຄັ້ງ ຫລື ສະເລ່ຍວັນລະ 10 ຄັ້ງ ໂດຍໄລຍະທົດສະວັດ 2010 ຕົວເລກຫລຸດລົງເລັກໜ້ອຍເຫລືອ 3.165 ຄັ້ງ ບົ່ງຊີ້ວ່າໄພພິບັດດັ່ງກ່າວເກີດຖີ່ຂຶ້ນ ເນື່ອງຈາກສະພາບໂລກຮ້ອນ.
ສ່ວນຄວາມເສຍຫາຍເປັນເງິນນັ້ນ ໃນໄລຍະທົດສະວັດ 1970 ໄພພິບັດທາງທຳມະຊາດສ້າງຄວາມເສຍຫາຍທົ່ວໂລກປະມານ 175.400 ລ້ານໂດລາສະຫະລັດ ແລະ ເພີ່ມຂຶ້ນເປັນ 1,38 ພັນຕື້ໂດລາສະຫະລັດ ໃນໄລຍະປີ 2010-2019 ເຊິ່ງເປັນໄລຍະທີ່ພາຍຸເຮີຣິເຄນຮາວີ, ມາເຣຍ, ເອີມາ ພັດຖະຫລົ່ມອາເມລິກາ, ແຕ່ວ່າມູນຄ່າຄວາມເສຍຫາຍ ແລະ ຄວາມຖີ່ຈະເພີ່ມຂຶ້ນ ແຕ່ຍອດຜູ້ເສຍຊີວິດຕໍ່ປີຫລຸດລົງຈາກ 50.000 ກວ່າຄົນໃນໄລຍະທົດສະວັດ 1970 ເຫລືອປະມານ 18.000 ຄົນໃນທົດສະວັດ 2010 ເຊິ່ງບົ່ງບອກວ່າການວາງແຜນຮັບມືທີ່ດີຂຶ້ນໄດ້ຜົນ.
ລາຍງານລະບຸອີກວ່າ: ຫລາຍກວ່າ 91% ຂອງຜູ້ເສຍຊີວິດກວ່າ 2 ລ້ານຄົນຢູ່ປະເທດກຳລັງພັດທະນາ ໂດຍມີພຽງເຄິ່ງໜຶ່ງຂອງປະເທດສະມາຊິກ WMO ເຊິ່ງມີທັງໝົດ 193 ປະເທດທີ່ມີລະບົບເຕືອນໄພລ່ວງໜ້າ.
ທ່ານ ເປດເຕຣິ ຕາລາສ ເລຂາທິການ WMO ເປີດເຜີຍວ່າ: “ຕ້ອງຂອບໃຈການປັບປຸງລະບົບການແຈ້ງເຕືອນລ່ວງໜ້າທີ່ຊ່ວຍໃຫ້ພວກເຮົາຫລຸດຈຳນວນຜູ້ເສຍຊີວິດຈາກໄພພິບັດເຫລົ່ານີ້ໄດ້, ແຕ່ຂ່າວຮ້າຍຄືຄວາມເສຍຫາຍທາງເສດຖະກິດເພີ່ມຂຶ້ນຢ່າງວ່ອງໄວ ແລະ ມີທ່າອ່ຽງຈະເພີ່ມຂຶ້ນຕໍ່ເນື່ອງ”.
ທັງນີ້ ໄພພິບັດທີ່ສ້າງຄວາມເສຍຫາຍເປັນເງິນຫລາຍທີ່ສຸດ 5 ອັນດັບນັບແຕ່ປີ 1970 ລ້ວນເປັນພາຍຸເຮີຣິເຄນໃນອາເມລິກາ ໂດຍເຮີຣິເຄນແຄທຣິນາໃນປີ 2005 ມີມູນຄ່າຄວາມເສຍຫາຍສູງທີ່ສຸດ 163.600 ລ້ານໂດລາສະຫະລັດ.
ສ່ວນໄພພິບັດທີ່ຂ້າຊີວິດຄົນຫລາຍທີ່ສຸດ 5 ອັນດັບທຳອິດຢູ່ອາຟຣິກາ ແລະ ອາຊີ ໂດຍໄພແຫ້ງແລ້ງໃນເອທິໂອເປຍໃນປີ 1983 ແລະ ພາຍຸໄຊໂຄນໂບລາຢູ່ບັງກະລາເທດໃນປີ 1970 ເປັນເຫດການທີ່ມີຄົນເສຍຊີວິດຫລາຍທີ່ສຸດຄື 300.000 ຄົນ.
