ການປັບປຸງກົງຈັກການຈັດຕັ້ງຄຽງຄູ່ກັບການພັດທະນາບຸກຄະລາກອນ

ໃນວາລະເປີດກອງປະຊຸມເຜີຍແຜ່ເຊື່ອມຊຶມເອກະສານວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກ
ທາງດ້ານເສດຖະກິດ-ການເງິນ, ຊຶ່ງໄດ້ຈັດຂຶ້ນໃນທ້າຍເດືອນສິງຫາ 2021 ທີ່ຜ່ານມາ, ທ່ານ ບຸນປອນ ວັນນະຈິດ ຄະນະປະຈໍາພັກກະຊວງ, ຮອງລັດຖະມົນຕີກະຊວງການເງິນ, ໄດ້ຍົກໃຫ້ເຫັນຄວາມສໍາຄັນອັນເປັນບາດລ້ຽວໃໝ່ ໃນການປັບປຸງກົງຈັກການຈັດຕັ້ງ ແມ່ນຈະຕ້ອງໄປຄຽງຄູ່ກັນກັບການພັດທະນາບຸກຄະລາກອນຂະແໜງການເງິນ, ເພື່ອພ້ອມກັນກ້າວເຂົ້າສູ່ບາດລ້ຽວໃໝ່ ໃຫ້ມີປະສິດທິຜົນ ເຂັ້ມແຂງ, ໜັ້ກແໜ້ນ, ໂປ່ງໃສ, ທັນສະໄໝ ຮັບໃຊ້ປະຊາຊົນຢ່າງແທ້ຈິງ.

ເພື່ອພ້ອມກັນກ້າວເຂົ້າສູ່ບາດລ້ຽວໃໝ່ການປັບປຸງກົງຈັກການຈັດຕັ້ງຂອງຂະແໜງການເງິນ ໃຫ້ມີຄວາມກະທັດຮັດມີປະສິດທິຜົນ, ຄະນະພັກຄະນະນໍາກະຊວງການເງິນ, ໄດ້ມີການປັບປຸງຫຼາຍຂອດຂັ້ນເປັນຕົ້ນ: ດ້ານນະໂຍບາຍ, ກົນໄກ ແລະ ວິທີການຫຼາຍອັນທີ່ເປັນເຄື່ອງມືອັນຕົ້ນຕໍໃຫ້ແກ່ການຈັດຕັ້ງປະຕິບັດຢ່າງມີຈຸດສຸມໃນແຕ່ລະໄລຍະເພື່ອພ້ອມກັນເອກະພາບໃນເວລາທີ່ຈະພ້ອມກັບປັບປຸງກົງຈັກການຈັດຕັ້ງ, ສັບຊ້ອນບຸກຄະລາກອນກໍານົດຕໍາແໜ່ງງານໃຫ້ໄປຕາມທິດທາງ ແລະ ລວງດຽວກັນໃຫ້ມີຄວາມຄ່ອງຕົວເນັ້ນໃສ່ໃຫ້ມີປະສິດທິພາບຂອງວຽກງານໃນແຕ່ລະຂັ້ນ,ເພື່ອຍົກສູງປະສິດທິພາບຂອງການເຮັດວຽກໃນແຕ່ລະຂະແໜງການແມ່ນຕ້ອງໄດ້ມີການໄຂການເຮັດວຽກຂອງບຸກຄະລາກອນ ໃຫ້ຄົນໜຶ່ງສາມາດເຮັດໄດ້ຫຼາຍໜ້າວຽກໃນເງື່ອນໄຂທີ່ຍັງມີຄວາມຫຍຸ້ງຍາກຫຼາຍດ້ານໂດຍສະເພາະການທີ່ຈະຫັນເປັນວິຊາຊີບ, ຫັນເປັນຄວາມຊໍານານງານ, ແກ້ໄຂປະກົດການຄົນເຫຼືອບໍ່ພໍແມ່ນຈະໄດ້ມີການປັບປຸງຫຼາຍອັນ.

ສະນັ້ນ, ເພື່ອແກ້ໄຂບັນຫາດັ່ງກ່າວຕ້ອງໄດ້ກວດຄືນການກໍານົດຕໍາແໜ່ງງານຂອງການຈັດຕັ້ງໃນແຕ່ລະໄລ ຍະ ແລະ ປັບປຸງແກ້ບັນຫາທີ່ເຫັນວ່າຍັງບໍ່ທັນຖືກຕ້ອງໃຫ້ໄດ້ຢ່າງຂາດຕົວ ແລະ ໃຫ້ສອດຄ່ອງກັບວຽກງານຕົວຈິງ, ພ້ອມກັນກໍານົດຕໍາແໜ່ງງານກົງຈັກການຈັດຕັ້ງຂອງຕົນມີການວິເຄາະວິໄຈ ດັດສົມວຽກງານໃຫ້ຖືກຕ້ອງ ແລະ ເໝາະສົມບົນພື້ນຖານຄົນໜຶ່ງໃຫ້ເຮັດໄດ້ຫຼາຍວຽກ, ເພື່ອຫຼຸດຜ່ອນການເພີ່ມຂຶ້ນຂອງລັດຖະກອນ, ກວດກາຄືນ ແລະ ກໍານົດໃໝ່ໃນການສັບຊ້ອນບັນຈຸລັດຖະກອນເຂົ້າບັນດາກົມ, ກົງຈັກການຈັດຕັ້ງຂອງບັນດາພະແນກໃຫ້ມີລັດຖະ ກອນໃນຈໍານວນທີ່ເໝາະສົມ ແລະ ເອົາໃຈໃສ່ຝຶກອົບຮົມຍົກລະດັບໃຫ້ເຂັ້ມແຂງທາງດ້ານວິຊາສະເພາະມີທັດ ສະນະຫຼັກໝັ້ນທີ່ຖືກຕ້ອງ ແລະ ມີຄວາມຮັບຜິດຊອບສາມາດຈັດຕັ້ງປະຕິບັດວຽກງານໃຫ້ເດັດຂາດບໍ່ໃຫ້ມີຕໍາແໜ່ງງານ ຫຼື ຈໍານວນທີ່ບໍ່ຈໍາເປັນ ພາຍຫຼັງສໍາເລັດແລ້ວກໍ່ຕ້ອງໄດ້ມີການນໍາສະເໜີດ້ານຈໍານວນພົນ ແລະ ຕໍາແໜ່ງງານໄປຫາກະ ຊວງພາຍໃນ, ເດັດຂາດບໍ່ອະນຸຍາດໃຫ້ກໍານົດຕໍາແໜ່ງງານກົງຈັກການຈັດຕັ້ງໃໝ່.

ກະຊວງການເງິນ ໄດ້ເລີ່ມປັບປຸງກົງການຈັດຕັ້ງ ແລະ ການເຄື່ອນໄຫວ (ພາລະບົດບາດ) ຂອງ 3 ກົມສາຍຕັ້ງ (ພາສີ, ສ່ວຍສາອາກອນ ແລະ ຄັງເງິນແຫ່ງຊາດ) ໃນປີ 2019 ໂດຍໄດ້ສຸມໃສ່ການກວດກາ ແລະ ປະເມີນຜົນຄືນປະສິດທິພາບ ແລະ ຄຸນນະພາບການເຄື່ອນໄຫວຂອງກົງຈັກການຈັດຕັ້ງ 3 ກົມສາຍຕັ້ງນັບແຕ່ສູນກາງຮອດທ້ອງຖິ່ນ, ພ້ອມທັງກົນໄກຄຸ້ມຄອງວຽກງານຂອງຂະແໜງສາຍຕັ້ງ ແລະ ໄດ້ສໍາເລັດໃນເດືອນເມສາ 2021 ທີ່ຜ່ານມາ. ໃນນີ້, ໄດ້ປັບປຸງກົງຈັກຂອງກົມສ່ວຍສາອາກອນຢູ່ຂັ້ນສູນກາງໄດ້ກໍານົດໄປຕາມກົດໝາຍ 4 ສະບັບທີ່ໄດ້ອອກໃໝ່, ຊຶ່ງໄດ້ເພີ່ມຈາກ 7 ພະແນກມາເປັນ 10 ພະແນກ, ສ່ວນກົງຈັກຂອງສ່ວຍສາອາກອນປະຈໍາແຂວງ, ນະຄອນຫຼວງ ແລະ ເມືອງແມ່ນໄດ້ມີການກໍານົດໃຫ້ມີ 3-5 ຂະແໜງການ ແລະ ໜ່ວຍງານສ່ວຍສາອາກອນປະຈໍາເມືອງຂຶ້ນກັບແຕ່ລະແຂວງທີ່ມີມາດຖານເງື່ອນໄຂ, ສ່ວນສ່ວຍສາອາກອນຢູ່ຂັ້ນເມືອງກໍ່ໄດ້ມີການຄົ້ນຄວ້າມາດຖານເງື່ອນໄຂຂອງເມືອງທີ່ສາມາດສ້າງຕັ້ງເປັນສ່ວຍສາອາກອນປະຈໍາເມືອງ, ສ່ວນເມືອງທີ່ມາດຖານເງື່ອນໄຂບໍ່ຄົບຖ້ວນ ແມ່ນໄດ້ສ້າງຕັ້ງເປັນໜ່ວຍງານສ່ວຍສາອາກອນປະຈໍາເມືອງ.

ສໍາລັບກົງຈັກການຈັດຕັ້ງຂອງຄັງເງິນແຫ່ງຊາດ ແມ່ນຍັງຮັກສາຄືເກົ່າ, ສ່ວນຢູ່ຂັ້ນທ້ອງຖິ່ນໄດ້ປ່ຽນຊື່ຈາກຄັງເງິນແຫ່ງຊາດ ປະຈໍາແຂວງ, ນະຄອນຫຼວງ, ຄັງເງິນແຫ່ງຊາດ ປະຈໍາເມືອງ, ເທດສະບານ, ນະຄອນ ເປັນຄັງເງິນປະຈໍາແຂວງ, ນະຄອນຫຼວງ, ຄັງເງິນປະຈໍາເມືອງ, ເທດສະບານ, ນະຄອນ, ກົງຈັກຂອງຄັງເງິນແຫ່ງຊາດສູນກາງໄດ້ເພີ່ມຈາກ 7 ມາເປັນ 8 ພະແນກ, ສ່ວນກົງຈັກຂອງຄັງເງິນປະຈໍາແຂວງ, ນະຄອນຫຼວງ ປະກອບມີ 3 ຂະແໜງ ແລະ ໜ່ວຍງານຄັງເງິນປະຈໍາເມືອງ, ສໍາລັບຄັງເງິນປະຈໍາແຂວງ ແລະ ນະຄອນຫຼວງແມ່ນສາມາດເພີ່ມຂະແໜງໄດ້ຕາມຄວາມຮຽກຮ້ອງຕ້ອງການຂອງໜ້າທີ່ວຽກງານຕົວຈິງ, ໂດຍໄດ້ຮັບການແຕ່ງຕັ້ງຈາກລັດຖະມົນຕີກະຊວງການເງິນ, ສ່ວນຄັງເງິນຢູ່ຂັ້ນເມືອງ ແມ່ນຕ້ອງໄດ້ມີການຄົ້ນຄວ້າມາດຖານເງື່ອນໄຂຂອງເມືອງທີ່ສາມາດສ້າງຕັ້ງເປັນຄັງເງິນປະຈໍາເມືອງ, ສ່ວນເມືອງທີ່ມາດຖານເງື່ອນໄຂບໍ່ຄົບຖ້ວນແມ່ນໄດ້ສ້າງຕັ້ງເປັນໜ່ວຍງານຄັງເງິນປະຈໍາເມືອງ.

ສໍາລັບພາສີປ່ຽນຈາກ 3 ຂັ້ນຄື: ຂັ້ນກົມ, ກອງ, ດ່ານພາສີຊາຍແດນມາເປັນ 2 ຂັ້ນຄື: ຂັ້ນກົມ ແລະ ຂັ້ນແຂວງ, ກົງຈັກພາສີຂັ້ນກົມໄດ້ເພີ່ມຈາກ 8 ພະແນກມາເປັນ 9 ພະແນກ, ຢູ່ຂັ້ນທ້ອງຖິ່ນປ່ຽນຈາກກອງຄຸ້ມຄອງພາສີ ເປັນພາສີປະຈໍາແຂວງປະກອບມີ 17 ແຂວງ.

ການປັບປຸງການຈັດຕັ້ງ-ການເຄື່ອນໄຫວ (ພາລະບົດບາດ) ຂອງກະຊວງການເງິນແມ່ນໄດ້ເລີ່ມໃນເດືອນພຶດສະພາ 2021 ຊິ່ງໄດ້ແຕ່ງຕັ້ງຄະນະຮັບຜິດຊອບເພື່ອຄົ້ນຄວ້າປັບປຸງກົງຈັກການຈັດຕັ້ງຂອງກະຊວງການເງິນ ແຕ່ສູນກາງຮອດທ້ອງຖິ່ນ, ກໍານົດພາລະບົດບາດ, ໜ້າທີ່ ແລະ ຂອບເຂດສິດ ໃຫ້ສອດຄ່ອງກັບຫຼາຍກົດໝາຍ.

ນອກນີ້, ຍັງໄດ້ຄົ້ນຄວ້າຕາມຄໍາສັ່ງວ່າດ້ວຍການປັບປຸງຄຸນນະພາບການເຄື່ອນໄຫວກົງຈັກການຈັດຕັ້ງ ແລະ ການບັນຈຸລັດຖະກອນໃໝ່ ສະບັບເລກທີ 03/ນຍ, ລົງວັນທີ 09 ກຸມພາ 2018 ໂດຍເນັ້ນໃສ່ກົງຈັກຂອງການເງິນຂັ້ນເມືອງ, ຊຶ່ງໄດ້ດໍາເນີນເປັນແຕ່ລະບາດກ້າວ ແລະ ຂັ້ນຕອນ, ການປັບປຸງສັບຊ້ອນບຸກຄະລາກອນກໍ່ໄດ້ຈັດຕັ້ງປະຕິບັດເປັນປົກກະຕິຕາມຕໍາແໜ່ງງານທີ່ວ່າງລົງ. ສໍາລັບຂະແໜງສາຍຕັ້ງໄດ້ສໍາເລັດການປັບປຸງໃນຕົ້ນເດືອນສິງຫາ 2021 ນັບແຕ່ຂັ້ນຄະນະກົມຮອດຂັ້ນຄະນະພະແນກ ແລະ ປັດຈຸບັນກໍາລັງດໍາເນີນການສັບຊ້ອນພະນັກງານຂັ້ນວິຊາການ, ດ້ານການພັດທະນາບຸກຄະລາກອນກົມຈັດຕັ້ງ ແລະ ພະນັກງານ, ໄດ້ທົດລອງສ້າງແຜນບໍາລຸງສ້າງ ພະ ນັກງານ, ສໍາລັບພະນັກງານນໍາພາ-ຄຸ້ມຄອງໂດຍກໍານົດເອົາຈາກຫຼັກສູດທີ່ມີແລ້ວທາງດ້ານທິດສະດີ ແລະ ການບໍລິຫານຄຸ້ມຄອງລັດທີ່ເປັນຫຼັກສູດພາກບັງຄັບສໍາລັບພະນັກງານນໍາພາ-ຄຸ້ມຄອງແຕ່ລະຂັ້ນ.