ຄວນປາບປາມຢ່າງຈິງຈັງ ແລະ ເດັດຂາດ ເລື່ອງນຳເຂົ້າສານເຄມີຕ້ອງຫ້າມ

ການນຳໃຊ້ສານເຄມີທີ່ອັນຕະລາຍໃນສປປ ລາວ ຍັງມີຫຼາຍ ເຊິ່ງເປັນອັນຕະລາຍຕໍ່ສຸຂະພາບຂອງຄົນ ແລະ ສິ່ງແວດລ້ອມ ເພາະສະນັ້ນ ພວກເຮົາ ຈະສາມາດສະກັດກັ້ນການນຳໃຊ້ສານເຄມີນີ້ໄດ້ແນວໃດ?

ການຂະຫຍາຍຕົວຂອງອຸດສາຫະກຳ, ພະລັງງານ, ກະສິກຳ ແລະ ອື່ນໆໄດ້ເຮັດໃຫ້ ການນຳໃຊ້ສານເຄມີຫຼາຍຂຶ້ນໃນນັ້ນການລັກລອບການນຳໃຊ້ສານເຄມີທີ່ຕ້ອງຫ້າມຍັງມີໃຫ້ເຫັນ ທີ່ກຳລັງເປັນໄພຂົ່ມຂູ່ສຳຄັນຕໍ່ສຸຂະພາບຂອງຄົນ, ສັດສາວາສິ່ງ ແລະ ສິ່ງແວດລ້ອມພວກເຮົາ.

ເວົ້າສະເພາະໃນຂົງເຂດກະສິກຳ, ຍ້ອນການຂະຫຍາຍຕົວການຜະລິດກະສິກຳເພື່ອການຄ້າ ທີ່ມີປະລິມານຄວາມຕ້ອງການ ຂອງຕະຫຼາດທັງພາຍໃນ ແລະ ພາຍນອກ ນັບມື້ນັບເພີ່ມຂຶ້ນ ໂດຍສະເພາະບັນປະເທດອ້ອມຂ້າງພວກເຮົາ ເຊັ່ນ ສປ ຈີນ, ຫວຽດນາມ, ໄທ ແລະ ອື່ນໆ ເຮັດໃຫ້ ການຜະລິດກະສິກຳຕ້ອງເລັ່ງອັດຕາຄວາມໄວຂຶ້ນ ໂດຍການອີງອາໄສບັນດາສານເຄມີຕ່າງໆ ລວມທັງບັນດາສານເຄມີທີ່ຕ້ອງຫ້າມ.

ການນຳໃຊ້ສານເຄມີໃນຂະແໜງກະສິກຳແມ່ນຮັບຮູ້ຫຼາຍກວ່າໝູ່ໂດຍສະເພາະ ສວນປູກກ້ວຍ ທີ່ໃນປັດຈຸບັນເປັນພືດສົ່ງອອກທີ່ສ້າງລາຍຮັບແກ່ປະເທດຫຼາຍກວ່າ ພືດຊະນິດອື່ນ, ນອກນັ້ນ ການປູກສາລີ, ອ້ອຍ ແລະ ອື່ນໆ ແມ່ນມີການນຳໃຊ້ເຄມີຢ່າງຫຼວງຫຼາຍ ເຊິ່ງໄລຍະຜ່ານມາ ພວກເຮົາ ກຈະເຫັນຂ່າວຄາວການຕາຍຂອງ ປາຕາມສາຍນໍ້າ ເນື່ອງ ສານເຄມີຮົ່ວໄຫຼຈາກສວນກ້ວຍ ຫຼືບໍ່ກໍຈາກໂຮງງານປຸ່ງແຕ່ງກະສິກຳ ແລະ ອື່ນໆ.

ຜູ້ຂຽນເຫັນກັບຕາເວລາລົງເຮັດວຽກພາກສະໜາມ ໂດຍສະເພາະບັນດາແຂວງພາກເໜືອ ທີ່ປະຊາຊົນ ເຮັດສວນສາລີ ຫຼື ເຮັດສວນກ້ວຍກໍດີບັນດາຂວດບັນຈຸສານເຄມີ ທີ່ເປັນພາສາຕ່າງປະເທດໂດຍສະເພາະພາສາຈີນ ແລະ ອື່ນໆປະຊາຊົນທີ່ບໍ່ຮູ້ເທົ່າເຖິງການ ເວລານຳໃຊ້ສານເຄມີແລ້ວບໍ່ປ້ອງກັນຕົນເອງ, ຫຼັງຈາກນຳໃຊ້ແລ້ວກໍນຳເອົາຂວດບັນຈຸນັ້ນ ນຳໄປໃຊ້ໃນຊີວິດປະຈຳວັນຕໍ່ໂດຍສະເພາະບັນຈຸນໍ້າ, ບັນຈຸອາຫານເຊິ່ງອາດເປັນຕະລາຍທີ່ສຸດ ຕໍ່ສຸຂະພາບຂອງເຂົາເຈົ້າ. ພ້ອມນັ້ນປະຊາຊົນຜູ້ທີ່ເຮັດວຽກໃນພື້ນທີ່ຜະລິດກະສິກຳທີ່ໃຊ້ສານເຄມີ ທີ່ອັນຕະລາຍນີ້ກໍແມ່ນໄດ້ຮັບຜົນກະທົບໄລຍະສັ້ນ ແລະ ຍາວຕໍ່ສຸຂະພາບບໍ່ແມ່ນໜ້ອຍ, ຫຼາຍຄົນກໍເສຍຊີວິດ ກວ່າເວລາອັນຄວນ.

ພວກເຮົາຮູ້ດີວ່າ ການນຳໃຊ້ສານເຄມີໃນປະເທດເຮົານັບມື້ນັບເພີ່ມຂຶ້ນແຕ່ລະປີທັງຖືກກົດໝາຍ ແລະ ລັກລອບນໍາເຂົ້າແຕ່ຍັງບໍ່ທັນມີຕົວເລກຊັດເຈນວ່າ ມີຈຳນວນສານເຄມີນຳເຂົ້າແຕ່ລະປີເທົ່າໃດແທ້ແຕ່ຊ່ຽວຊານຫຼາຍທ່ານກໍຄາດຄະເນວ່າ ການລັກລອບນໍາເຂົ້າສານເຄມີທີ່ຕ້ອງຫ້າມ ເຂົ້າໃນປະເທດເຮົານັ້ນປີໜຶ່ງອາດຫຼາຍສິບໂຕນ ທີ່ພວກເຮົາຄວນສະກັດກັ້ນຢ່າງເດັດຂາດ.

ເພາະສະນັ້ນ, ຈຶ່ງເປັນການລິເລີ່ມທີ່ດີທີ່ກະຊວງອຸດສາຫະກຳ ແລະ ການຄ້າໄດ້ຈັດກອງປະຊຸມ ປຶກສາລາລືກ່ຽວກັບການບັງຄັບໃຊ້ກົດໝາຍວ່າດ້ວຍສານເຄມີທີ່ຮັບຮອງ ໃນປີ 2016 ເມື່ອບໍ່ດົນຜ່ານມານີ້ເພື່ອເພີ່ມທະວີການຄວບຄຸມ ການນໍາໃຊ້ສານເຄມີທີ່ຕ້ອງຫ້າມໃຫ້ໄດ້ຮັບໝາກຜົນກວ່າເກົ່າ.

ພ້ອມນັ້ນ ສປປລາວ ເຮົາກໍຍັງໄດ້ເປັນພາຄີສົນທິສັນຍາສາກົນຕ່າງໆກ່ຽວກັບສານເຄມີເປັນຕົ້ນ ສົນທິສັນຍາສະຕ໋ອກໂຮມ (Stockholm), ສົນທິສັນຍາ ຣອດເຕີດຳ (Rotterdam) ແລະ ອື່ນໆ ທີ່ພວກເຮົາຕ້ອງໄດ້ປະກອບສ່ວນ ຫຼື ເປັນພັນທະອັນໜຶ່ງໃນການຄວບຄຸມ ການນຳໃຊ້ສານເຄມີອັນຕະລາຍທີ່ໄດ້ລະບຸໄວ້ໃນບັນດາສົນທິສັນຍາດັ່ງກ່າວ.

ເພາະສະນັ້ນ, ການຄວບຄຸມການນຳເຂົ້າ, ນຳໃຊ້ສານເຄມີທີ່ອັນຕະລາຍນັ້ນຕ້ອງໄດ້ເຮັດຢ່າງຈິງຈັງ ຜ່ານການບັງຄັບກົດໝາຍກໍຄືນິຕິກຳທີ່ກ່ຽວຂ້ອງຢ່າງເຂັ້ມງວດໂດຍສະເພາະ ການຄວບຄຸມການນຳເຂົ້າແບບຜິດກົດໝາຍທີ່ເປັນອັນຕະລາຍຕໍ່ຜູ້ທີ່ຂາດຄວາມຮູ້ຄວາມເຂົ້າໃຈ ແລ້ວນໍາໃຊ້ ແລະ ທັງເປັນອັນຕະລາຍຕໍ່ສະພາບແວດລ້ອມຂອງພວກເຮົາ. ພ້ອມນັ້ນ ກໍຄວນສ້າງຈິດສຳນຶກຕໍ່ປະຊາຊົນຢ່າງກວ້າງຂວາງກວ່າເກົ່າໂດຍສະເພາະບັນດາກຸ່ມສ່ຽງຕ່າງໆ ກ່ຽວກັບອັນຕະລາຍຕໍ່ການນຳໃຊ້ສານເຄມີ ແລະ ແທນທີ່ຈະສົ່ງເສີມການຜະລິດກະສິກຳ ສົ່ງອອກ ໂດຍໃຊ້ສັນຍານເຄມີຄວນສົ່ງເສີມກະສິກຳທີ່ດີ ບໍມີສານພິດເຈືອປົນ ຈຶ່ງຈະເຮັດໃຫ້ລະບົບການຜະລິດພວກເຮົາຍືນຍົງ ແລະປອດໄພ.