ຄົ້ນຄວ້າກຽມອະໄພຍະໂທດໃຫ້ນັກໂທດ ທີ່ມີເງື່ອນໄຂ ປະຈໍາປີ 2021

ວັນທີ 26 ສິງຫາ 2021, ທີ່ອົງການໄອຍະການປະຊາຊົນສູງສຸດ ນະຄອນຫລວງວຽງຈັນ, ໄດ້ມີກອງປະຊຸມຄັ້ງປະຖົມມະລຶກ ຂອງຄະນະກໍາມະການອະໄພຍະໂທດລະດັບຊາດ ປະຈໍາປີ 2021 ຂຶ້ນຢ່າງເປັນທາງການ, ໂດຍໃຫ້ກຽດ ເປັນປະທານຂອງ ທ່ານ ພົອ ຈັນສະໝອນ ຈັນຍາລາດ ຮອງນາຍົກລັດຖະມົນຕີ; ລັດຖະມົນຕີ ກະຊວງປ້ອງກັນປະເທດ ທັງເປັນປະທານຄະນະກໍາມະການອະໄພຍະໂທດ ລະດັບຊາດ, ທ່ານ ໄຊຊະນະ ໂຄດພູທອນ ຫົວໜ້າອົງການໄອຍະການປະຊາຊົນສູງສຸດເຂົ້າຮ່ວມ.

ທ່ານ ພົອ ຈັນສະໝອນ ຈັນຍາລາດ ໄດ້ກ່າວເຖິງວຽກງານອະໄພຍະໂທດວ່າ: ການປະຕິບັດນະໂຍບາຍ ດ້ານມະນຸດສະທຳຂອງພັກ-ລັດຖະບານພວກເຮົາ ຕໍ່ຜູ້ມີການກະທໍາຜິດທີ່ລະເມີດກົດໝາຍ, ເຊິ່ງໄດ້ກໍານົດຢູ່ໃນລັດຖະທຳມະນູນ ສະບັບປີ 2015 ໝວດທີ VI ມາດຕາ 67 ຂໍ້ 12 ແມ່ນສິດຂອງປະທານຕົກລົງໃຫ້ອະໄພຍະໂທດຕາມການສະເໜີຂອງລັດຖະບານ.

ກອງປະຊຸມໃນຄັ້ງນີ້ ແມ່ນມີຄວາມສໍາຄັນຫລາຍ ເປັນກອງປະຊຸມຄັ້ງປະຖົມມະລຶກ ຄັ້ງທີ I ຂອງຄະນະກໍາມະການອະໄພຍະໂທດລະດັບຊາດ ສາເຫດຍ້ອນ ຄະນະກໍາມະການອະໄພຍະໂທດ ລະດັບຊາດ ໄດ້ມີການປ່ຽນແປງ, ສວນຫລາຍແມ່ນປະກອບເຂົ້າໃໝ່, ນັບທັງກອງເລຂາຄະນະກໍາມະການອະໄພຍະໂທດ ລະດັບຊາດ.