ສານອວຍພອນຈາກ ທ່ານ ພັນຄຳ ວິພາວັນ, ນາຍົກລັດຖະມົນຕີ ແຫ່ງ ສປປ ລາວ ເຖິງ ທ່ານ ດາຕຸກ ເຊີຣີ ອິດສະມາອິນ ຊາບຣິ ບິນ ຢາຄ໋ອບ, ເນື່ອງໃນໂອກາດໄດ້ຮັບແຕ່ງຕັ້ງເປັນນາຍົກລັດຖະມົນຕີ ແຫ່ງ ມາເລເຊຍ ຄົນໃໝ່.
ຂ້າພະເຈົ້າຂໍ ຕາງໜ້າໃຫ້ລັດຖະບານ, ປະຊາຊົນ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ໃນນາມສ່ວນຕົວ, ເປັນກຽດ ສົ່ງຄຳຊົມເຊີຍອັນອົບອຸ່ນ ແລະ ພອນໄຊອັນປະເສີດ ມາຍັງພະນະທ່ານ ໃນໂອກາດທີ່ ພະນະທ່ານ ຖືກແຕ່ງຕັ້ງໃຫ້ດຳລົງຕຳແໜ່ງ ເປັນນາຍົກລັດຖະມົນຕີ ແຫ່ງ ມາເລເຊຍ.
ຂ້າພະເຈົ້າມີຄວາມເຊື່ອໝັ້ນວ່າ ດ້ວຍບົດຮຽນອັນອຸດົມຮັ່ງມີຂອງພະນະທ່ານ, ພະນະທ່ານ ຈະສາມາດນໍາເອົາປະເທດຊາດ ຜ່ານພົ້ນຈາກການແຜ່ລະບາດຂອງພະຍາດໂຄວິດ-19 ແລະ ນໍາພາປະເທດມາເລເຊຍ ໄປສູ່ຄວາມກ້າວໜ້າ ແລະ ວັດທະນະຖາວອນຍິ່ງໆຂຶ້ນ.
ຂ້າພະເຈົ້າຫວັງວ່າ ຈະໄດ້ເຮັດວຽກຮ່ວມກັບພະນະທ່ານ ເພື່ອເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືທີ່ມີປະສິດທິຜົນ ລະຫວ່າງສອງປະເທດພວກເຮົາໃຫ້ຂະຫຍາຍຕົວຍິ່ງໆຂຶ້ນ ເພື່ອຜົນປະໂຫຍດຂອງປະຊາຊົນສອງຊາດພວກເຮົາ ກໍ່ຄືເພື່ອສັນຕິພາບຂອງໂລກ ແລະ ການຮ່ວມມືເພື່ອການພັດທະນາ.
ຂ້າພະເຈົ້າ ຂໍຖືໂອກາດອັນສະຫງ່າລາສີນີ້ ອວຍພອນໄຊອັນປະເສີດ ມາຍັງ ພະນະທ່ານ ຈົ່ງມີພະລານາໄມສົມບູນ, ມີຄວາມຜາສຸກ ແລະ ປະສົບຜົນສໍາເລັດໃນໜ້າທີ່ອັນສູງສົ່ງຂອງ ພະນະທ່ານ.
