ການໃຊ້ນໍ້າ-ໄຟຟ້າຢູ່ຫ້ອງການ-ສຳນັກງານ ທາງພາກລັດຄວນມີມາດຕະການເຄັ່ງຄັດ

ໃນທ່າມກາງຄວາມຝືດເຄືອງຂອງເສດຖະກິດກໍຄືງົບປະມານຂອງລັດນັ້ນ ການປະຢັດມັດທະຍັດ ຖືວ່າເປັນມາດຕະການທີ່ສຳຄັນ ແລະ ຈຳເປັນທີ່ເລີ່ມແຕ່ ການປະຢັດນໍ້າ-ປະຢັດໄຟ.

“ຄົນທຸກແລ້ວບໍ່ປະຢັດ ບໍ່ມີທາງທີ່ຈະຮັ່ງ” ເປັນຄຳເວົ້າທີ່ຫຼາຍຄົນຍັງຈື່ງໄດ້ດີ ທີ່ທ່ານ ພັນຄຳ ວິພາວັນ ນາຍົກລັດຖະມົນຕີ ໄດ້ກ່າວໃນກອງປະຊຸມສະໄໝວິສາມັນ ເທື່ອ 1 ຂອງສະພາແຫ່ງຊາດຊຸດ ທີ IX ເມື່ອບໍ່ດົນຜ່ານມາເຊິ່ງໃນນັ້ນມາດຕະການປະຢັດ ໄດ້ກາຍເປັນມາດຕະການ ແລະວາລະສຳຄັນຂອງລັດຖະບານ ເຊິ່ງໄດ້ຮັບຄວາມຊົມເຊີຍຈາກປະຊາຊົນບໍ່ໜ້ອຍຕໍ່ການນະໂຍບາຍ ກ່ຽວກັບລົດການນຳ, ລົດບໍລິຫານຂອງຫ້ອງການສຳນັກງານລັດ ທີ່ ຈະຊ່ວຍໃນການປະຢັດງົບຂອງລັດຖະບານໄດ້ຫຼາຍຕື້ກີບ ໃນແຕ່ລະປີ.

ສິ່ງດັ່ງກ່າວເປັນບາດກ້າວສຳຄັນທີ່ສຸດ. ພ້ອມກັນກັບມາດຕະການ ປະຢັດອື່ນໆ ທີ່ລັດຖະບານໄດ້ກ່າວມານັ້ນຫຼາຍຄົນກໍຄິດວ່າ ການເພີ່ມມາດຕະການ ຄວບຄຸມ, ຄຸ້ມຄອງ ການນຳໃຊ້ ນໍ້າປະປາ-ໄຟຟ້າ ຂອງສຳນັກງານອົງການລັດຖືວ່າ ເປັນເລື່ອງສຳຄັນເຊັ່ນກັນທີ່ຈະສາມາດພັກດັນມາດຕະການປະຢັດ ໃຫ້ໄດ້ໝາກຜົນຕື່ມ.

ຜ່ານມາ ພວກເຮົາຮັບຮູ້ດີວ່າ ລັດວິສາຫະກິດ ໄຟຟ້າລາວ ມີໜີ້ສິນຫຼວງຫຼາຍ ທີ່ຍັງບໍ່ສາມາດທວງໄດ້ ໃນນັ້ນ ກໍແມ່ນຈາກບັນດາສຳນັກງານ-ຫ້ອງການລັດເຮົາ ເຊິ່ງເປັນໜີ້ສິນຄຸມເຄືອທີ່ສາມາດຈ່າຍໄດ້ຍາກ ແລະ ຍ້ອນຄວາມໂຍະຍານກັນ ເຮັດໃຫ້ໜີ້ສິນເພີ່ມທະວີ ເພາະຍັງຂາດມາດຕະການໃນການຄວບຄຸມ, ການຄຸ້ມຄອງນໍາໃຊ້ທີ່ດີອັນນີ້ພວກເຮົາຕ້ອງຍອມຮັບຄວາມຈິງ ເພື່ອກ້າວໄປສູ່ການແກ້ໄຂທີ່ດີ.

ມາຮອດ ປັດຈຸບັນ ບັນດາສຳນັກງານ-ຫ້ອງການຂອງລັດໄດ້ສ້າງຂຶ້ນໃໝ່ ທີ່ມີຕຶກໃຫຍ່ ກວ່າເກົ່າຫຼວງຫຼາຍ ນັ້ນ ກໍໝາຍຄວາມວ່າຕ້ອງການໃຊ້ໄຟຫຼາຍຂຶ້ນ, ໃຊ້ນໍ້າຫຼາຍຂຶ້ນ, ຕຶກໃຫຍ່ຂຶ້ນດອກໄຟກໍຫຼາຍດອກ, ແອກໍຫຼາຍໜ່ວຍເພາະສະນັ້ນ ຖ້າບໍ່ມີການຄຸ້ມຄອງທີ່ດີພວກເຮົາຈະມີບັນຫາເລື່ອງໃຊ້ໄຟຫຼາຍກາຍງົບປະມານ.

ຜ່ານມາການນຳໃຊ້ໄຟໃນຫ້ອງການສຳນັກງານລັດບາງແຫ່ງຂ້ອນຂ້າງຟູມເຟືອຍ ແລະ ຕາມໃຈເຊັ່ນການເປີດແອປະໄວ້ໃນຍາມພັກຜ່ອນ ຫຼື ເປີດເຢັນເກີນໄປ, ດອກໄຟກໍເຊັ່ນດຽວກັນເປີດປະໄວ້ໃນຍາມບໍ່ມີຄວາມຈຳເປັນ ແລະ ອື່ນໆເຮັດໃຫ້ ສິ້ນເປືອງໄຟໄປບໍ່ແມ່ນໜ້ອຍ.

ເພາະສະນັ້ນ, ແຕ່ນີ້ຕໍ່ໄປພວກເຮົາຄວນມີມາດຕະການໃນການຄວບຄຸມ ການນຳໃຊ້ ນໍ້າປະປາ-ໄຟຟ້າໃນຫອ້ງການ-ສຳນັກງານລັດຫຼາຍຂຶ້ນ, ໃນໄລຍະຜ່ານຫຼາຍຫ້ອງການ ສຳນັກງານກໍໄດ້ມີຄຳແນະນຳຕ່າງໆກ່ຽວກັບເລື່ອງນີ້ແຕ່ບໍ່ຄ່ອຍມີພະນັກງານປະຕິບັດ ແລະ ລະເລີຍໄປຕາມໆກັນເຊິ່ງມັນເຖິງເວລາທີ່ຈະຮັດກຸມເລື່ອງນີ້ແລ້ວ.

ແບບຢ່າງ ທີ່ດີໃນການ ຄວບຄຸມການນຳໃຊ້ແອຂອງສຳນັກງານຫ້ອງການລັດ ກໍຄື ມີບ່ອນຄວບຄຸມການເປີດ-ປິດ, ຄວບຄຸມອຸນຫະພູມ ແລະ ເວລາວ່າຄວນເປີດ ແລະ ມອດຕອນໃດໂດຍບໍ່ອະນຸຍາດໃຫ້ສ່ວນບຸກຄົນເປີດໄດ້ຕາມໃຈ, ບໍ່ລະເວັ້ນວ່າ ໃຜມີຕຳແໜ່ງໃດຄວນເປັນເອກະພາບເພື່ອເປັນແບບຢ່າງທີ່ເທົ່າທຽມກັນ.

ນອກນັ້ນພະນັກງານທຸກຄົນຄວນໄດ້ຮັບການສຶກສາອົບຮົມ, ຍົກສູງສະຕິ ໃນການນຳໃຊ້ໄຟເມື່ອບໍ່ໄດ້ໃຊ້ແລ້ວຄວນມີສ່ວນຮັບຜິດຊອບໃນການມອດດອກໄຟ ແລະ ອື່ນໆ.

ພ້ອມນັ້ນ, ບັນດາຕຶກອາຄານສຳນັກງານຂອງລັດກໍພິຈາລະນາໃນການຕິດຕັ້ງໄຟຟ້າ ແສງຕາເວັນ ໂດຍສະເພາະອາຄານສ້າງໃໝ່ທີ່ຄວນຈັດສັນງົບປະມານໃນການຕິດຕັ້ງ ໄຟຟ້າແສງຕາເວັນໃສ່ນຳກໍຈະສາມາດຫຼຸດຜ່ອນຄ່າໄຟໄດ້ບໍ່ໜ້ອຍເລີຍ ແລະ ທັງເປັນການສົ່ງເສີມການນຳໃຊ້ພະລັງງານທົດແທນໄປໃນຕົວ.

ທັງໝົດນີ້ກໍເພື່ອເປັນການປະກອບສ່ວນໃນການປະຢັດງົບປະມານຂອງລັດ, ສ້າງຈິດສຳນຶກ ແລະ ສ້າງພຶດຕິກຳທີ່ດີມີຄວາມຮັບຊອບ, ເປັນແບບຢ່າງ ຂອງພະນັກງານລັດເຮົາໄປນຳ.