7 ວິທີເຮັດໂຕໃໝ່ ງາມຈາກພາຍໃນ ອາຍຸຫລາຍກໍໜ້າຮັກໄດ້

ຫລາຍຄົນອາດເຄີຍຄິດຢາກປ່ຽນແປງຕົນເອງໃຫ້ງາມກ່ວາເກົ່າ, ແຕ່ສິ່ງສຳຄັນທີ່ຈະເຮັດໃຫ້ເຮົາເປັນຄົນໃໝ່ຢ່າງໝັ້ນຄົງ ທີ່ສຸດນັ້ນກໍຄື ການເລີ່ມຕົ້ນປ່ຽນຈາກພາຍໃນຈິດໃຈເຮົາ, ປັບທັດສະນະຄະຕິ, ວິທີຄິດ, ເບິ່ງໂລກໃນແງ່ບວກ ເຊິ່ງມື້ນີ້ພວກເຮົາ ມີເຄັດລັບການປ່ຽນແປງຕົນເອງໃຫ້ເປັນຄົນໃໝ່ທີ່ງາມຂຶ້ນກ່ວາເກົ່າມາແນະນຳບັນດາທ່ານ ດັ່ງນີ້.

1. ຄິດໃໝ່, ເບິ່ງໂລກໃນແງ່ບວກຫລາຍຂຶ້ນ : ທ່ານເຄີຍສັງເກດຕົນເອງຫລືບໍ່ ການເບິ່ງໂລກໃນແງ່ຮ້າຍ ອັນໃດກໍຄິດດ້ານ ລົບຕະຫລອດ ເຊັ່ນ : ເມື່ອມີອຸປະສັກເຂົ້າມາກໍເມົາແຕ່ຄິດວ່າ ເປັນຫຍັງເລື່ອງຮ້າຍໆຈະຕ້ອງມາເກີດກັບເຮົາ ເຮັດໃຫ້ ເຮົາຈົມຢູ່ກັບບັນຫາ, ຫາທາງອອກບໍ່ພໍ້ເລີຍ. ສະນັ້ນ ຄວນປ່ຽນຄວາມຄິດຂອງເຮົາກ່ອນ ທຸກຄົນໃນໂລກນີ້ລ້ວນແຕ່ມີ ບັນຫາ ແລະ ອຸປະສັກເຂົ້າມາເປັນບົດທົດສອບຄືກັນສະເໝີ, ແຕ່ຖ້າເຮົາຜ່ານມັນໄປໄດ້ຈະພົບຄວາມສຸກທີ່ແທ້ຈິງລໍຖ້າຢູ່ ເມື່ອຄິດບວກແລ້ວກໍຈະມີພະລັງໃນການຕໍ່ສູ້ຊີວິດຕໍ່ໄປ.
2. ປ່ອຍວາງໃຫ້ເປັນ : ເຄີຍເປັນຫລືບໍ່ທີ່ທາງເທື່ອເຮົາຮູ້ສຶກຫງຸດຫງິດກັບສິ່ງຕ່າງໆທີ່ເຮົາຄວບຄຸມບໍ່ໄດ້ ເຊັ່ນ : ຄວາມຄິດ ຮ້າຍໆຂອງຄົນອື່ນ, ທາງທີ່ດີເຮົາຄວນຮຽນຮູ້ທີ່ຈະປ່ອຍວາງດີທີ່ສຸດ, ຮູ້ຈັກປ່ອຍວາງເລື່ອງເລັກໆນ້ອຍໆ ໃຫ້ຊີວິດເຮົາ ມີຄວາມສຸກເພີ່ມຂຶ້ນ.
3. ໃບໜ້າມີຮອຍຍິ້ມຢູ່ສະເໝີ : ການຍິ້ມຈະເຮັດໃຫ້ເຮົາມີຄວາມສຸກ ແລະ ຫລັ່ງສານແຫ່ງຄວາມສຸກອອກມາ ຈະຊ່ວຍປ່ຽນ ອາລົມ ແລະ ຊ່ວຍໃຫ້ຄາຍຄຽດໄດ້, ທ່ານໃດທີ່ມີຮອຍຍິ້ມກໍຍ່ອມມີສະເໜ່ ແລະ ເປັນມິດຫລາຍກ່ວາທ່ານທີ່ມີໃບໜ້າບູດ ບຶ້ງຢູ່ຕະຫລອດ. ນອກຈາກນີ້, ການຍິ້ມຍັງເປັນການກະຈາຍຄວາມສຸກໃຫ້ຄົນອື່ນໆ, ບັນຍາກາດອ້ອມໂຕກໍຍິ່ງດີຂຶ້ນ ແລ້ວຍັງຊ່ວຍໃຫ້ໃບໜ້າຜ່ອງໃສມາຈາກພາຍໃນ. ຮູ້ແບບນີ້ແລ້ວກ່ອນອອກຈາກເຮືອນຢ່າລືມຝຶກຍິ້ມຫວານໃຫ້ກັບຕົນ ເອງກ່ອນທຸກເທື່ອ.
4. ໃຫ້ອະໄພຕົນເອງສະເໝີ : ບໍ່ມີໃຜສົມບູນແບບທຸກຢ່າງ ທຸກຄົນລ້ວນແຕ່ເຮັດຜິດພາດກັນໄດ້, ເຮົາໃຫ້ອະໄພຄວາມຜິດ ພາດຂອງຄົນອື່ນໄດ້, ແຕ່ຊ້ຳພັດບໍ່ຍອມໃຫ້ອະໄພຕົນເອງ ຍ້ອນເມົາແຕ່ໄປຄິດເຖິງຄວາມຜິດພາດ ຈົນເຮັດໃຫ້ຈິດໃຈບໍ່ ສົດຊື່ນແຈ່ມໃສ. ຈົ່ງລະນຶກໄວ້ສະເໝີວ່າ ເລື່ອງທີ່ຜ່ານໄປແລ້ວບໍ່ສາມາດທີ່ຈະຍ້ອນເວລາກັບໄປເຮັດຫຍັງໄດ້ ດີທີ່ສຸດກໍ ຄື ຮຽນຮູ້ ແລະ ຍອມຮັບມັນ ແລະ ບໍ່ເຮັດພາດເປັນຄັ້ງທີສອງອີກ.
5. ເວົ້າໃຫ້ເປັນຕາຟັງ : ຄວນຝຶກເວົ້າດ້ວຍນ້ຳສຽງທີ່ເປັນຕາຟັງ, ຖືກກາລະເທສະໃຫ້ເປັນນິໄສ, ໃຊ້ສຽງໜັກ-ເບົາໃຫ້ເໝາະ ສົມກັບສະຖານະການ, ບັນຍາກາດທີ່ເຄັ່ງຄຽດຢູ່ກໍຈະຜ່ອນຄາຍ, ເພື່ອນຮ່ວມງານກໍຈະຮັບຟັງຄວາມຄິດເຫັນ, ຊ່ວຍກັນ ແກ້ໄຂບັນຫາ ວຽກກໍຈະລຸລ່ວງມີປະສິດທິພາບຫລາຍຂຶ້ນ, ສ່ວນໂຕເຮົາເອງກໍຈະບໍ່ຫງຸດຫງິດຈົນເຈັບຫົວໄມເກຣນນຳ ອີກ.
6. ນັ່ງສະມາທິກ່ອນນອນ : ເຮົາອາດພົບເລື່ອງຮ້າຍໆ, ຄົນຮ້າຍໆຄືກັນໝົດມື້, ການສວດມົນ ນັ່ງສະມາທິກ່ອນນອນ ຈະ ຊ່ວຍໃຫ້ເຮົາໄດ້ປ່ອຍວາງຄວາມຄິດ, ຮູ້ສຶກຜ່ອນຄາຍ, ຈິດໃຈສະຫງົບ, ມີສະຕິກັບການຄິດຮັບມືກັບບັນຫາຕ່າງໆ. ນອກຈາກນີ້, ຍັງເຮັດໃຫ້ເປັນຄົນມີຄວາມຈື່ຈຳດີ, ໃບໜ້າອ່ອນກ່ວາອາຍຸ ແລະ ໄດ້ບຸນໄປນຳ.
7. ຢູ່ໃກ້ຄົນຄິດບວກ : ເມື່ອເຮົາຢູ່ໃກ້ຄົນທີ່ມີທັດສະນະຄະຕິຮ້າຍໆ ມັກເວົ້າໃຫ້ຄົນອື່ນຮູ້ສຶກບໍ່ດີ ເຮົາກໍຈະໄດ້ຮັບພະລັງງານ ດ້ານລົບນັ້ນມາ ແລະ ຫົດຫູ່ໄປນຳ, ແຕ່ຫາກເຮົາອ້ອມລ້ອມໄປດ້ວຍຄົນມີຄວາມຄິດດ້ານບວກ, ລ່າເລີງແຈ່ມໃສ, ເວົ້າດີ, ຄິດດີ, ເຮັດດີ ເຮົາກໍຈະຮູ້ສຶກສົດຊື່ນ ແລະ ໄດ້ຮັບການສົ່ງຕໍ່ຄວາມຄິດດ້ານບວກຂອງຊີວິດມານຳ.