ປກສ ກຸ່ມວັງຊາຍ ຈັບກຸ່ມມົ້ວສຸມເສບ ແລະ ຊື້-ຂາຍ ຢາເສບຕິດ

ທ່ານ ພັທ ຊື່ວ່າງ ກ່າລໍ່ ຫົວໜ້າ ປກສ ກຸ່ມວັງຊາຍ ໃຫ້ຮູ້ວ່າ: ໃນວັນທີ 17 ສິງຫາ 2021 ໄດ້ຮັບແຈ້ງຂ່າວຈາກພົນລະເມືອງດີວ່າມີໄວໜຸ່ມມົ້ວສຸມຢາເສບຕິດຢູ່ເຮືອນຂອງ ທ້າວ ສິນໄຊ ອາຍຸ 49 ປີ, ກໍາມະກອນ ຢູ່ບ້ານອາມອນ ເມືອງໄຊເສດຖາ ນະຄອນຫຼວງວຽງຈັນ ພາຍຫລັງໄດ້ຮັບແຈ້ງຂ່າວ ເຈົ້າໜ້າທີ່ ປກສ ກຸ່ມວັງຊາຍ ຈຶ່ງໄດ້ສົມທົບກັບອໍານາດການປົກຄອງບ້ານອາມອນ ລົງຈຸດດັ່ງກ່າວເຫັນວ່າມີກຸ່ມໄວໜຸ່ມມົ້ວສຸມ ຕາມການລາຍງານແທ້ ຈຶ່ງໄດ້ສະແດງໂຕເຂົ້າຈັບກຸມ ກຸ່ມດັ່ງກ່າວໄດ້ 10 ຄົນ, ຍິງ 1 ຄົນ, ພົບເຫັນຂອງກາງຢາບ້າ ຈໍານວນ 168 ເມັດ ແລະ ໂທລະສັບ 2 ໜ່ວຍ; ໃນນີ້ ມີ 2 ຄົນຄື: ທ້າວ ສິນໄຊ ມີຢາເສບຕິດ ຈໍານວນ 73 ເມັດ ແລະ ທ້າວ ແສງອາລຸນ ມີຢາເສບຕິດ ຈໍານວນ 95 ເມັດ ມາສອບສວນ, ສ່ວນເປົ້າໝາຍອີກ 8 ຄົນ, ຍິງ 1 ຄົນ. ພວກກ່ຽວເປັນຜູ້ເຄາະຮ້າຍມົ້ວສຸມຢາເສບຕິດ ເຈົ້າໜ້າທີ່ໄດ້ສຶກສາອົບຮົມຂັ້ນກຸ່ມ ແລ້ວມອບໃຫ້ພໍ່, ແມ່ຜູ້ປົກຄອງ ຮັບປະກັນເອົາໄປຄຸ້ມຄອງຕໍ່ໄປ.

ຜ່ານການສອບສວນ ຂອງເຈົ້າໜ້າທີ່: ທ້າວ ສິນໄຊ ອາຍຸ 49 ປີ, ກໍາມະກອນ ແລະ ທ້າວ ແສງອາລຸນ ອາຍຸ 41 ປີ, ກໍາມະກອນ ຢູ່ບ້ານອາມອນ ເມືອງໄຊເສດຖາ ນະຄອນຫຼວງວຽງຈັນ ຮັບສາລະພາບວ່າ: ຢາບ້າ ຈໍານວນ 168 ເມັດ ແມ່ນຂອງພວກຕົນແທ້, ທີ່ໄດ້ພົວພັນເສບ ແລະ ຄ້າຂາຍຢາເສບຕິດ ມາແຕ່ທ້າຍປີ 2020, ຊື້ນໍາຊາຍຄົນໜຶ່ງ ຢູ່ເຂດບ້ານທາດຫຼວງເໜືອ ເມືອງໄຊເສດຖາ ນະຄອນຫລວງວຽງຈັນ ຊື້ມາຫຼາຍຄັ້ງ, ຄັ້ງສຸດທ້າຍຊື້ ຈໍານວນ 100 ເມັດ, ແລ້ວແບ່ງຂາຍໃຫ້ກຸ່ມໄວລຸ້ນ ເຂດບ້ານອາມອນ. ຕົກມາຮອດວັນທີ 17 ສິງຫາ 2021 ຈຶ່ງຖືກເຈົ້າໜ້າທີ່ກັກຕົວ.

ຕໍ່ກັບຄະດີດັ່ງກ່າວ, ເຈົ້າໜ້າທີ່ ປກສ ກຸ່ມວັງຊາຍ ໄດ້ສົ່ງໃຫ້ ກອງບັນຊາການ ປກສ ເມືອງໄຊເຊດຖາ ນະຄອນຫລວງວຽງຈັນ ສືບຕໍ່ດໍາເນີນຄະດີຕາມກົດໝາຍ.