ຄະນະບໍລິຫານງານສະຫະພັນກຳມະບານ ກະຊວງການເງິນ ເຜີຍແຜ່-ເຊື່ອມຊຶມບັນດາເອກະສານສໍາຄັນ

ວັນທີ 17 ສິງຫາ 2021 ທີ່ກະຊວງການເງີນ, ຄະນະບໍລິຫານງານສະຫະພັນກໍາມະບານ ກະຊວງການເງິນ,ໄດ້ຈັດກອງປະຊຸມເຜີຍແຜ່ ແລະ ເຊື່ອມຊຶມບັນດາເອກະສານສໍາຄັນກ່ຽວກັບວຽກງານກໍາມະບານລາວ, ໂດຍການເປັນປະທານຂອງສະຫາຍ ບຸນປະເສີດ ສີກຸນລະບຸດ ປະທານສະຫະພັນກໍາມະບານກະຊວງການເງິນ, ມີທ່ານຮອງປະທານສະຫະພັນກຳມະບານກະຊວງ, ຄະນະບໍລິຫານງານສະຫະພັນກຳມະບານ, ຫົວໜ້າໜ່ວຍກໍາມະບານຂອງກົມ, ສະຖາບັນ, ລັດວິສະຫະກິດອ້ອມຂ້າງກະຊວງເຂົ້າຮ່ວມຮັບຟັງ.

ໂອກາດນີ້, ສະຫາຍ ອຸບັນ ສູພິດາ ຮອງປະທານສະຫະພັນກໍາມະບານກະຊວງການເງິນ ໄດ້ຂຶ້ນເຜີຍແຜ່ກົດບຽບຂອງສະຫະພັນກໍາມະບານລາວ ສະໄໝທີີ VIII ຊຶ່ງໄດ້ເຜີຍແຜ່ເຊື່ອມຊຶມບັນດານິຕິກຳ, ມະຕິ, ຄຳສັ່ງ ແລະ ລະບຽບກົດໝາຍຂອງພັກ-ລັດ ໂດຍສະເພາະແມ່ນບັນດາເອກະສານຕ່າງໆທີ່ຕິດພັນກັບວຽກງານກຳມະບານລາວ ໃຫ້ແກ່ສະມາຊິກຢ່າງເປັນປົກກະຕິເຮັດໃຫ້ສະມາຊິກມີແນວຄິດອຸ່ນອ່ຽງທຸນທ່ຽງ, ມີສະຕິຕໍ່ການຈັດຕັ້ງພ້ອມທັງສຸມທຸກເຫື່ອແຮງເຂົ້າໃນການຈັດຕັ້ງປະຕິບັດວຽກງານກຳມະບານ ແລະ ວຽກງານວິຊາສະເພາະດ້ວຍຄວາມຮັບຜິດຊອບສູງໂດຍປະຕິບັດຕາມຫລັກການລວມສູນປະຊາທິປະໄຕໄປ ພ້ອມກັບການຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າຢ່າງເຂັ້ມງວດ.

ສະຫາຍ ອຸໄທ ອິນທິລາດ ຮອງປະທານສະຫະພັນກໍາມະບານກະຊວງການເງິນ ໄດ້ເຜີຍແຜ່ບົດເນາະນໍາກ່ຽວກັບການຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າຂອງສະຫະພັນກໍາບານລາວ ສະບັບເລກທີ 284/ສກລ, ລົງວັນທີ 15 ມີນາ 2021 ຊຶ່ງທ່ານໄດ້ຮຽກຮ້ອງໃຫ້ສະຫະພັນກໍາມະບານກະຊວງການເງິນຕະຫຼອດຮອດສະມາຊິກກຳມະບານພາຍໃນໜ່ວຍ ເອົາໃຈໃສ່ສຶກສາອົບຮົມການເມືອງ-ແນວຄິດໃຫ້ເປັນປົກກະຕິ, ເປັນເຈົ້າການຝຶກຝົນຫລໍ່ຫລອມຕົນເອງໃຫ້ມີຄວາມຫ້າວຫັນໃນການຈັດຕັ້ງປະຕິບັດວຽກງານຂອງຕົນ ດ້ວຍຄວາມຮັບຜິດຊອບສູງໄປຄ່ຽງຄູ່ກັບການຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າຂອງກຳມະບານລາວໃຫ້ປະກົດຜົນເປັນຈິງ.