ກຸຍບາ ປະກາດວ່າ ວັກຊີນຕ້ານໂຄວິດ-19 ທີ່ຜະລິດເອງ ມີປະສິດທິພາບສູງເຖິງ 97%

ສຳນັກຂ່າວຣອຍເຕີໄດ້ລາຍງານຂ່າວເມື່ອວັນທີ 13 ສິງຫາ 2021 ທີ່ຜ່ານມາວ່າ: ກຸ່ມບໍລິສັດຜະລິດຕະພັນຢາ ແລະ ຊີວະພາບຂອງກຸຍບາ (BioCubaFarma), ໄດ້ປະກາດຂໍ້ມູນເບື່ອງຕົ້ນກ່ຽວກັບປະສິດທິພາບຂອງວັກຊີນສອງຊະນິດປ້ອງກັນໂຄວິດ-19 ທີ່ຜະລິດຢູ່ພາຍໃນປະເທດ ມີຊື່ວ່າ Abdala ແລະ Soberana2 ໄດ້ສັກທົດລອງກັບ 2,5 ລ້ານຄົນ, ໃນນັ້ນ 21.000 ຄົນຕິດເຊື້ອໂຄວິດ, ກວມ 0,8% ມີພຽງ 99 ເສຍຊີວິດ, ກວມປະມານ 0,003%. ໝາຍຄວາມວ່າບັນດາວັກຊີນດັ່ງກ່າວຊ່ວຍພູມຄຸ້ມກັນໄດ້ເຖິງ 99,997% ຂອງຈໍານວນຜູ້ເສຍຊີວິດ ແລະ ມີຜົນປ້ອງກັນຕໍ່ສາຍພັນເດລຕາ ອີກດ້ວຍ.

ສຳນັກ ຣອຍເຕີ ໃຫ້ຮູ້ວ່າ ເຈົ້າໜ້າທີ່ ກຸຍບາ ວັນທີ 9 ກໍລະກົດ ໄດ້ອະນຸຍາດໃຫ້ນຳໃຊ້ສຸກເສີນວັກຊີນ Abdala ພາຍຫຼັງມີຜົນການທົດລອງອອກມາວ່າມີປະສິດທິພາບເຖິງ 97% ຖ້າຫາກໄດ້ຮັບສັກຄົບ 3 ເຂັມ.