ສາລະວັນ ປິ່ນປົວຜູ້ຕິດໂຄວິດ-19 ຫາຍດີ ເພີ່ມອີກ 80 ຄົນ
ວັນທີ 16 ສິງຫາ 2021 ນີ້ ພານ ວົງດາວ ສຸລິນທາ ຮອງຫົວໜ້າພະແນກສາທາລະນະສຸກແຂວງ ກອງເລຂາຄະນະສະເພາະກິດປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ໃຫ້ຮູ້ວ່າ: ແຂວງສາລະວັນປິ່ນປົວ ໄດ້ຈັດສົ່ງຜູ້ປິ່ນປົວຫາຍດີເພີ່ມອີກ ຈໍານວນ 80 ຄົນ ຍິງ 34 ຄົນ. ໃນນັ້ນ, ມີເດັກອາຍຸຕໍ່າກວ່າ 10 ປີ 4 ຄົນ ແລະ ຈັດສົ່ງກັບບ້ານຄື: ເມືອງຄົງເຊໂດນ 47 ຄົນ, ເມືອງລະຄອນເພັງ 6 ຄົນ, ເມືອງສາລະວັນ 15 ຄົນ, ເມືອງວາປີ 5 ຄົນ, ເມືອງເລົ່າງາມ 5 ຄົນ ແລະ ເມືອງຕຸ້ມລານ 2 ຄົນ ຊຶ່ງແມ່ນກໍລະນີແຮງງານນໍາເຂົ້າ ທີ່ໄດ້ກວດພົບເຊື້ອໃນວັນທີ 23 ກໍລະກົດ 2021 ແລະ ເຂົ້າຮັບການປິ່ນປົວຢູ່ໂຮງໝໍພາກສະໜາມ ໂຮງຮຽນສາມັນກິນນອນຊົນເຜົ່າແຂວງ.
ພາຍຫລັງສົ່ງກັບບ້ານແລ້ວຜູ້ປິ່ນປົວດີຍັງຕ້ອວງໄດ້ເຂັ້ມງວດ ປະຕິບັດ ຈໍາກັດບໍລິເວນຕົນເອງ 14 ວັນ ຢູ່ສູນຕ່າງໆຂອງເມືອງຈັດໄວ້ຕື່ມອີກ, ຫ້າມບໍ່ໃຫ້ພົວພັນກັບຄົນໃນຄອບຄົວ ຫຼື ເດີນທາງໄປໃນຊຸມຊົນ-ສັງຄົມຢ່າງເດັດຂາດ.
ປັດຈຸບັນແມ່ນມີຜູ້ຕິດເຊື້ອພະຍາດໂຄວິດ-19 ສະສົມທັງໝົດ 692 ຄົນ ຍິງ 339 ຄົນ, ປິ່ນປົວດີແລ້ວ 141 ຄົນ ຍິງ 64 ຄົນ.
