ພຽງອາທິດດຽວ ມີແຮງງານລາວກັບຄືນປະເທດຕິດເຊື້ອໂຄວິດ-19 ສູງເຖິງ 1.500 ກ່ວາຄົນ

ທ່ານ ນາງ ພອນປະເສີດ ໄຊຍະມຸງຄຸນ ຮອງຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ລາຍງານໃນວັນທີ 9 ສິງຫານີ້ວ່າ: ພຽງໄລຍະວັນທີ 1-8 ສິງຫານີ້ ມີແຮງງານທີ່ຕິດເຊື້ອພະຍາດໂຄວິດ-19 ເຂົ້າມາປະເທດ ສູງເຖິງ 1.500 ກວ່າຄົນ. ທຽບຈາກເດືອນກໍລະຜ່ານມາ ມີພຽງ 318 ຄົນ.

ນີ້ກໍເນື່ອງມາຈາກປະເທດໃກ້ຄຽງເຮົາສືບຕໍ່ມີການລະບາດພະຍາດໂຄວິດ-19 ເປັນວົງກວ້າງ ແລະ ບໍ່ມີທ່າອ່ຽງຈະຫລຸດລົງ, ໃນຂະນະທີ່ແຕ່ລະວັນມີຜູ້ເດີນທາງຈາກປະເທດເຫລົ່ານັ້ນເຂົ້າມາແຕ່ 1.000-2.000 ຄົນ.

ສະນັ້ນ, ຈຶ່ງຂໍຮຽກຮ້ອງໃຫ້ບັນດາຄອບຄົວ ແລະ ຍາດພີ່ນ້ອງຂອງແຮງງານ ທີ່ກັບເຂົ້າມາປະເທດຈົ່ງເປັນເຈົ້າການຮ່ວມມືກັບເຈົ້າໜ້າທີ່ແລະ ອຳນາດການປົກຄອງ ເພື່ອສາມາດແກ້ໄຂບັນຫາທີ່ອາດຈະເກີດຂຶ້ນໄດ້ໂດຍໄວ ແລະ ທັນການ, ພ້ອມກັນສະກັດກັ້ນການລັກລອບເຂົ້າມາປະເທດແບບບໍ່ຖືກຕ້ອງ ແລະ ອາດເປັນການນຳເຊື້ອພະຍາດມາແພ່ລະບາດໃສ່ຄົນໃນຄອບຄົວ, ຄົນໃກ້ຊິດ ແລະ ສັງຄົມເປັນວົງກວ້າງ.