ກອງປະຊຸມສະໄໝວິສາມັນສະພາແຫ່ງຊາດ ຊຸດທີ IX ຄືບາດກ້າວທຳອິດໃນການກຳນົດວາລະຂອງຊາດ
ກອງປະຊຸມສະໄໝວິສາມັນຄັ້ງທີ 1 ຂອງສະພາແຫ່ງຊາດ ຊຸດທີ IX ໄດ້ໄຂຂຶ້ນຢ່າງເປັນທາງການໃນວັນທີ 5 ສິງຫາ 2021 ທີ່ຜ່ານມາ ພາຍໃຕ້ການເປັນປະທານຂອງທ່ານ ໄຊສົມພອນ ພົມວິຫານ ປະທານສະພາແຫ່ງຊາດ, ພ້ອມການນຳຂັ້ນສູງພັກ-ລັດ ຕະຫລອດເຖິງສະມາຊິກສະພາແຫ່ງຊາດຊຸດທີ IX ຢ່າງພ້ອມພຽງ. ພິເສດ ກອງປະຊຸມຄັ້ງນີ້ຍັງໄດ້ເປັນກຽດຢ່າງສູງຈາກທ່ານ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກ, ປະທານປະເທດ ແຫ່ງ ສປປ ລາວ, ທ່ານ ຄຳພັນ ວິພາວັນ ນາຍົກລັດຖະມົນຕີ, ບັນດາອະດີດການນຳພັກ-ລັດ, ຄະນະລັດຖະບານ, ສະມາຊິກສະພາແຫ່ງຊາດ, ຜູ້ຕາງໜ້າອົງການຈັດຕັ້ງພັກ-ລັດ, ແນວລາວສ້າງຊາດ, ອົງການຈັດຕັ້ງມະຫາຊົນ ແລະ ສະຫະພັນນັກຮົບເກົ່າເຂົ້າຮ່ວມ. ກອງປະຊຸມຄັ້ງນີ້ຈະໄດ້ດຳເນີນໄປເປັນເວລາ 6 ວັນ ຄືຮອດວັນທີ 10 ສິງຫາ 2021 ຈຶ່ງຈະໄດ້ປິດລົງຢ່າງເປັນທາງການ.
ໃນວາລະກອງປະຊຸມທີ່ສຳຄັນນີ້ ຈະໄດ້ຮັບຮອງເອົາບັນຫາສຳຄັນພື້ນຖານຂອງຊາດ ເປັນຕົ້ນບົດລາຍງານຂອງລັດຖະບານກ່ຽວກັບວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ, ບົດລາຍງານກ່ຽວກັບວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ. ນອກຈາກນັ້ນ ຍັງຈະໄດ້ພິຈາລະນາຮັບຮອງເອົາການປັບປຸງຮ່າງກົດໝາຍທີ່ພົວພັນກັບວາລະແຫ່ງຊາດ ຈຳນວນ 5 ສະບັບຄື: ກົດໝາຍວ່າດ້ວຍການຄຸ້ມຄອງສ່ວຍສາອາກອນ, ກົດໝາຍວ່າດ້ວຍອາກອນມູນຄ່າເພີ່ມ, ກົດໝາຍວ່າດ້ວຍອາກອນລາຍໄດ້, ກົດໝາຍວ່າດ້ວຍອາກອນຊົມໃຊ້ ແລະ ກົດໝາຍວ່າດ້ວຍຢາເສບຕິດ.
ສ່ວນເນື້ອໃນວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນນັ້ນກໍມີບັນດາວຽກງານຈຸດສຸມເລັ່ງດ່ວນດັ່ງນີ້: ສົ່ງເສີມການຜະລິດເພື່ອທົດແທນການນຳເຂົ້າ ແລະ ເປັນສິນຄ້າສົ່ງອອກ ເພື່ອສ້າງລາຍຮັບທີ່ເຂັ້ມແຂງ, ສ້າງຄວາມເຂັ້ມແຂງດ້ານການເກັບງົບປະມານລາຍຮັບ, ສົ່ງເສີມການປະຢັດຕ້ານການຟຸມເຟືອຍ ຍົກສູງປະສິດທິຜົນການລົງທຶນ ລາຍຈ່າຍງົບປະມານ ການແກ້ໄຂໜີ້ພາຍໃນ ແລະ ຕ່າງປະເທດ, ສ້າງສະຖຽນລະພາບດ້ານການເງິນ.
ກ່ຽວກັບວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດກໍມີ 6 ວຽກເລັ່ງດ່ວນດັ່ງນີ້: ສ້າງຄວາມຮັບຮູ້ຜົນຮ້າຍຂອງຢາເສບຕິດໃຫ້ແກ່ສັງຄົມ ທັງສຶກສາອົບຮົມໂຄສະນາເຜີຍແຜ່ແນວທາງນະໂຍບາຍຂອງພັກ-ລັດເຮົາ, ສ້າງປັບປຸງກົດໝາຍ ແລະ ນິຕິກຳໃຕ້ກົດໝາຍທີ່ກ່ຽວຂ້ອງກັບບັນຫາຢາເສບຕິດ, ປັບປຸງກົງຈັກການຈັດຕັ້ງ ແລະ ຍົກລະດັບຄວາມສາມາດຂອງອົງການປົກປ້ອງກົດໝາຍ, ອົງການຕຸລາການ ແລະ ພາກສ່ວນທີ່ກ່ຽວຂ້ອງຕໍ່ການແກ້ໄຂບັນຫາຢາເສບຕິດ, ຍົກສູງປະສິດທິພາບດ້ານການຄຸ້ມຄອງ ແລະ ຊີ້ນຳການຈັດຕັ້ງປະຕິບັດຮອບດ້ານ, ປັບປຸງຂີດຄວາມສາມາດໃນການແກ້ໄຂບັນຫາຢາເສບຕິດທີ່ເກີດຂຶ້ນຢູ່ໃນຄວາມຮັບຜິດຊອບຂອງຕົນ, ການຈັດຕັ້ງຕ່າງໆທີ່ກ່ຽວຂ້ອງ, ເພີ່ມທະວີວຽກງານການຮ່ວມມືສາກົນໃນການຕ້ານຢາເສບຕິດ. ໃນສອງວາລະດັ່ງກ່າວແມ່ນຈະເລີ່ມປະຕິບັດພາຍຫລັງກອງປະຊຸມສະໄໝວິສາມັນຄັ້ງທີ 1 ຮັບຮອງໃຊ້ ເວລາປະຕິບັດເປັນເວລາ 2 ປີເຄິ່ງຈຶ່ງຈະສິ້ນສຸດລົງ, ສ່ວນໝາກຜົນຈະເປັນແນວໃດ ໄດ້ໜ້ອຍໄດ້ຫລາຍນັ້ນຈົ່ງຕິດຕາມ ແລະ ຮ່ວມແຮງຮ່ວມໃຈກັນປະຕິບັດໃຫ້ໄດ້ຮັບໄຊຊະນະຢ່າງໃຫຍ່ຫລວງ. ຂໍຊົມເຊີຍກອງປະຊຸມຄັ້ງນີ້ຢ່າງສຸດໃຈ !
