ນໍ້າໃຈສາມັກຄີແບບພິເສດ ລາວ-ຫວຽດນາມ ນັບມື້ແໜ້ນແຟ້ນຍິ່ງຂຶ້ນ

(ຂໍ່ານັບຮັບຕ້ອນການຢ້ຽມຢາມສັນຖະວະໄມຕີ ສປປລາວ ຢ່າງເປັນທາງການຂອງ ສະຫາຍ ຫງວຽນ ຊວັນຟຸກ ປະທານປະເທດແຫ່ງ ສສ ຫວຽດນາມຫວຽດນາມ)

ສອງຊາດລາວ-ຫວຽດນາມ ສືບຕໍ່ຢັ້ງຢືນແນວທາງການຕ່າງປະເທດທີ່ສະເໝີຕົ້ນສະເໝີປາຍຂອງສອງປະເທດ, ພິເສດ ການປົກປັກຮັກສາ ແລະ ພັດທະນາ ສາຍພົວພັນໄມຕີຈິດມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງ ຫວຽດນາມ – ລາວ, ລາວ – ຫວຽດນາມ ນັບມື້ເລິກເຊິ່ງ ຢ່າງບໍ່ຢຸດຢັ້ງ.

ເພື່ອຕອບສະໜອງຕາມຄໍາເຊື້ອເຊີນຂອງ ສະຫາຍ ທອງລຸນ ສີສຸດລິດ ເລຂາທິການໃຫຍ່ ຄະນະບໍລິຫານງານສູນກາງພັກ ປະຊາຊົນ ປະຕິວັດລາວ, ປະທານປະເທດ ແຫ່ງ ສປປ ລາວ, ສະຫາຍ ຫງວຽນ ຊວັນຟຸກ ກໍາມະການກົມການເມືອງສູນກາງພັກ, ປະທານປະເທດ ແຫ່ງ ສາທາລະນະລັດ ສັງຄົມນິຍົມຫວຽດນາມ ພ້ອມດ້ວຍພັນລະຍາ ແລະ ຄະນະຜູ້ແທນຂັ້ນສູງ ຈະເດີນທາງມາຢ້ຽມຢາມສັນຖະວະໄມຕີ ຢ່າງເປັນທາງການ ຢູ່ ສປປລາວ ລະຫວ່າງ ວັນທີ 9-10 ສິງຫາ 2021, ເພື່ອເພີ່ມທະວີ ແລະ ເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງ ສອງປະເທດ ລາວ – ຫວຽດນາມ.

ລາວ ແລະ ຫວຽດນາມ ເຖິງວ່າສະພາບການຢູ່ພາຍໃນຂອງແຕ່ລະປະເທດ ຍັງປະສົບກັບຄວາມຫຍຸ້ງຍາກບາງຢ່າງກໍ່ຕາມ ໂດຍສະເພາະ ພະຍາດໂຄວິດ-19 ທີ່ກໍາລັງແຜ່ລະບາດໄປທົ່ວໂລກ, ແຕ່ການພົວພັນແບບພິເສດ ລາວ ແລະ ຫວຽດນາມ ຍັງສືບຕໍ່ໄດ້ຮັບການເສີມຂະຫຍາຍ ແລະ ເພີ່ມພູນຄູນສ້າງ ຢ່າງບໍ່ຢຸດຢັ້ງ.

ສາຍພົວພັນ ລາວ – ຫວຽດນາມ ແມ່ນຊັບສົມບັດອັນລໍ້າຄ່າ ແລະ ແມ່ນປັດໄຈຕັດສິນຊີ້ຂາດໄຊຊະນະ ແລະ ຜົນປະໂຫຍດຂອງປະຊາຊົນສອງຊາດ ລາວ – ຫວຽດນາມ ຈະບໍ່ມີມື້ປ່ຽນແປງ ແລະ ຈະສືບຕໍ່ໄດ້ຮັບການຮັກສາ, ເສີມສ້າງໃຫ້ເຂົ້າສູ່ລວງເລິກ. ສອງພັກ, ສອງລັດ ແລະ ປະຊາຊົນສອງຊາດ ພວກເຮົາ ຍາມໃດກໍພ້ອມກັນຮ່ວມແຮງຮ່ວມໃຈ ຈັບມືກັນຢ່າງແໜ້ນແຟ້ນ ເພື່ອສືບຕໍ່ຜ່ານຜ່າຄວາມຫຍຸ້ງຍາກນາໆປະການ, ພ້ອມກັນກ້າວຂຶ້ນສູ່ເປົ້າໝາຍສັງຄົມນິຍົມ, ສືບຕໍ່ເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ຂອງສອງປະເທດ ໝັ້ນຄົງຂະໜົງແກ່ນຕະຫຼອດກາລະນານ.

ໃນການຢ້ຽມຢາມສັນຖະວະໄມຕີ ຫວຽດນາມ ຢ່າງເປັນທາງການຂອງ ສະຫາຍ ທອງລຸນ ສີສຸລິດ ລະຫວ່າງວັນທີ 28-29 ມິຖຸນາ 2021, ການນຳສອງ ໄດ້ເຫັນດີເປັນເອກະພາບສົມທົບກັນຢ່າງແໜ້ນແຟ້ນ ເພື່ອຊຸກຍູ້ການຮ່ວມມືສອງຝ່າຍ ຕາມທິດນັບມື້ນັບຮອບດ້ານ, ແທດຈິງ, ສົມກັບການພົວພັນແບບພິເສດ ແລະ ການຮ່ວມມືຮອບດ້ານ, ຕັດສິນໃຈປະຕິບັດບັນດາຂໍ້ຕົກລົງ ລະຫວ່າງ ການນຳສອງພັກ, ສອງລັດ ແລະ ບັນດາຂໍ້ຕົກລົງການຮ່ວມມື ທີ່ໄດ້ຮັບການລົງນາມ ໃນການຢ້ຽມຢາມຄັ້ງນີ້ ຢ່າງເຂັ້ມງວດ ແລະ ມີປະສິດທິຜົນ.

ພ້ອມກັນນັ້ນ, ສອງຝ່າຍຈະສຸມໃສ່ຜັນຂະຫຍາຍໝາກຜົນຂອງກອງປະຊຸມຄັ້ງທີ 43 ຂອງຄະນະກຳມະການ ລະຫວ່າງ ລັດຖະບານ (ເດືອນທັນວາ 2020) ໃຫ້ເປັນຢ່າງດີ, ສືບຕໍ່ເພີ່ມທະວີການພົວພັນຮ່ວມມືດ້ານປ້ອງກັນຊາດ – ປ້ອງກັນຄວາມສະຫງົບ, ຍູ້ແຮງການຮ່ວມມືເສດຖະກິດ, ການຄ້າ, ການລົງທຶນ, ກະສິກຳ, ການສຶກສາ ແລະ ບຳລຸງສ້າງ, ເສີມຂະຫຍາຍການຮ່ວມມື ລະຫວ່າງ ບັນດາທ້ອງຖິ່ນສອງປະເທດ, ສົມທົບກັນຈັດຕັ້ງບັນດາການເຄື່ອນໄຫວເພື່ອແນໃສ່ສະເຫຼີມສະຫຼອງ 60 ປີແຫ່ງວັນສ້າງຕັ້ງການພົວພັນທາງການທູດ ແລະ 45 ປີແຫ່ງວັນລົງນາມສົນທິສັນຍາມິດຕະພາບ ແລະ ຮ່ວມມື ລະຫວ່າງ ຫວຽດນາມ ແລະ ລາວ ໃນປີ 2022 ຢ່າງແທດຈິງ ແລະ ມີປະສິດທິຜົນ.

ເມື່ອຫວນຄືນມູນເຊື້ອ ການພົວພັນຮ່ວມມື ລະຫວ່າງ ສອງປະເທດ ໂດຍສະເພາະໄລຍະຕໍ່ສູ້ກູ້ຊາດ, ລາວ ແລະ ຫວຽດນາມ ໄດ້ຄຽງບ່າຄຽງໄຫຼ່ກັນ, ຮ່ວມຂຸມຄອງສູ້ຮົບຕີຕ້ານສັດຕູໂຕດຽວກັນ ພ້ອມກັນກ້າວສູ່ໄຊຊະນະອັນຍິ່ງໃຫຍ່ຂອງສອງປະເທດ. ໃນການຕໍ່ຕ້ານຕ້ານພວກລ່າເມືອງຂຶ້ນແບບເກົ່າ ແລະ ໃໝ່, ຖັນແຖວທະຫານອາສາສະໝັກ ຫວຽດນາມ ໄດ້ພ້ອມກັບທະຫານ ແລະ ປະຊາຊົນລາວບັນດາເຜົ່າຍາດໄດ້ໄຊຊະນະຢ່າງສິ້ນເຊິງ.

ການຫວນຄືນໄລຍະປະຫວັດສາດທີ່ສະຫງ່າອົງອາດ ທີ່ໄດ້ຜ່ານພົ້ນໄປ, ປະຊາຊົນສອງປະເທດ ຫວຽດນາມ – ລາວ ຍາມໃດກໍມີຄວາມເອກອ້າງທະນົງໃຈຕໍ່ຂະບວນວິວັດການສ້າງສາ ແລະ ພັດທະນາສາຍພົວພັນມິດຕະພາບອັນຫຍິ່ງໃຫຍ່, ຄວາມສາມັກຄີແບບພິເສດ ທີ່ຫາຍາກໃນໂລກນີ້. ເສັ້ນທາງດັ່ງກ່າວ ແມ່ນເຕັມໄປດ້ວຍຄວາມຕັດສິນໃຈ, ການເສຍສະຫຼະເລືອດເນື້ອເຫື່ອແຮງ ແລະ ຄວາມຜູກພັນອັນໜຽວແໜ້ນຂອງທະຫານ ແລະ ປະຊາຊົນສອງຊາດ.

ມາຮອດປັດຈຸບັນ, ສອງປະເທດ ຍັງສືບຕໍ່ຖະໜຸຖະໜອມ ແລະ ສືບທອດມູນເຊື້ອໃນແຕ່ລະລຸ້ນການນໍາ, ຊ່ວຍເຫຼືອເຊິ່ງກັນ ແລະ ກັນ ໃນຂະບວນວິວັດແຫ່ງການສ້າງສາ ແລະ ພັດທະນາປະເທດຊາດ ເພື່ອພ້ອມກັນກ້າວຂຶ້ນສັງຄົມນິຍົມຂອງແຕ່ລະປະເທດ.

ທີ່ມາ: ໜັງສືພິມປະຊາຊົນ