ADB ເຜີຍການສົ່ງອອກເຕີບໃຫຍ່ ເລັ່ງເສດຖະກິດອາຊີຂະຫຍາຍຕົວ
ທະນາຄານພັດທະນາອາຊີ (ADB) ປັບເພີ່ມຄາດຄະເນອັດຕາການຂະຫຍາຍຕົວຂອງເສດຖະກິດອາຊີສຳລັບປີນີ້ ແລະ ປີໜ້າ ໂດຍໄດ້ຮັບຜົນຈາກການສົ່ງອອກຂະຫຍາຍຕົວຕໍ່ເນື່ອງ.
ADB ອອກລາຍງານການວິເຄາະສະຖານະການ ແລະ ທ່າອ່ຽງທາງເສດຖະກິດອາຊີສະບັບຫລ້າສຸດໃນວັນທີ 20 ກໍລະກົດນີ້ ລະບຸວ່າ: ເສດຖະກິດຂອງກຸ່ມປະເທດກຳລັງພັດທະນາ 45 ປະເທດໃນພາກພື້ນອາຊີ-ປາຊີຟິກ ມີທ່າອ່ຽງຈະຂະຫຍາຍຕົວ 5,9% ໃນປີນີ້ ແລະ 5,8% ໃນປີໜ້າ ປັບເພີ່ມຂຶ້ນຈາກຕົວເລກທີ່ຄາດຄະເນໄວ້ກ່ອນໜ້ານີ້ໃນເດືອນເມສາຢູ່ລະດັບ 5,7% ສຳລັບທັງສອງປີ. ປັດໄຈຕົ້ນຕໍທີ່ສົ່ງຜົນໃຫ້ເສດຖະກິດຂອງປະເທດທີ່ອາໄສການຄ້າ ມີທ່າອ່ຽງຂະຫຍາຍຕົວເພີ່ມສູງຂຶ້ນ ມາຈາກຄວາມຕ້ອງການໃນຕະຫລາດໂລກເພີ່ມສູງຂຶ້ນ.
ນອກຈາກນີ້, ADB ຍັງໄດ້ປັບຄາດຄະເນອັດຕາການຂະຫຍາຍຕົວຂອງເສດຖະກິດຈີນຈາກ 6,5% ໃນປີນີ້ ແລະ 6,2% ໃນປີໜ້າ ໄປຢູ່ລະດັບ 6,7% ໃນປີນີ້ ແລະ 6,4% ໃນປີໜ້າ ໂດຍມີແຮງຂັບເຄື່ອນຈາກການບໍລິໂພກພາຍໃນປະເທດທີ່ແຂງແຮງ ແລະ ການສົ່ງອອກຂະຫຍາຍຕົວ.
