ສື່ມວນຊົນລາວໃນຍຸກສ້າງສາພັດທະນາປະເທດຊາດ

ໂດຍ: ທິດກໍ່າ

ໃນເງື່ອນໄຂໃໜ່ ໂດຍສະເພາະນັບແຕ່ປະເທດຊາດໄດ້ຮັບການປົດປ່ອຍ ປະກາດເປັນປະເທດ ສາທາລະນະລັດ ປະຊາທິປະໄຕ ປະຊາຊົນລາວ ເປັນຕົ້ນມາ, ສື່ມວນຊົນລາວຍິ່ງມີການເຕີບໃຫຍ່ຂະຫຍາຍຕົວທາງດ້ານປະລິມານ ແລະ ຄຸນນະພາບ. ອີງໃສ່ພາລະບົດບາດໜ້າທີ່ຂອງສື່ມວນຊົນທີ່ເປັນກະບອກສຽງອັນແຫລມຄົມຂອງພັກ ກຽມພ້ອມຮັບໃຊ້ພາລະກິດການສ້າງສາພັດທະນາປະເທດຊາດໃນໄລຍະໃໝ່ຕາມແນວທາງນະໂຍບາຍຂອງພັກ ແລະ ລັດຖະບານວາງອອກແຕ່ລະໄລຍະ ສື່ມວນຊົນລາວໄດ້ອອກແຮງໂຄສະນາປຸກລະດົມຂົນຂວາຍປະຊາຊົນລາວບັນດາເຜົ່າເຂົ້າຮ່ວມຂະບວນການສ້າງສາພັດທະນາປະເທດຊາດດ້ວຍຄວາມຕື່ນຕົວ ແລະ ສະຕິເປັນເຈົ້າຂອງປະເທດຊາດ.

ເພື່ອເຮັດໃຫ້ພາລະກິດຂອງຕົນສຳເລັດຜົນນັ້ນ, ສື່ມວນຊົນລາວໄດ້ເພີ່ມທະວີຄວາມຮັບຜິດຊອບຂະຫຍາຍຕາໜ່າງໂຄສະນາ ນັບແຕ່ຂັ້ນສູນກາງລົງຮອດທ້ອງຖິ່ນຮາກຖານຢ່າງທົ່ວເຖິງ. ຈາກຜົນສຳເລັດດັ່ງກ່າວ ມາຮອດປັດຈຸບັນທຸກແຂວງມີວິທະຍຸ, ໂທລະພາບ ນັບທັງຂອງລັດ ແລະ ເອກະຊົນເຖິງ 20 ກວ່າແຫ່ງ. ນອກຈາກນັ້ນ ໃນທຸກບ້ານ, ກຸ່ມບ້ານກໍມີລະບົບໂທລະໂຄ່ງຂອງຕົນ ເພື່ອທຳການຖ່າຍທອດສົດຂ່າວສານບ້ານເມືອງໃນແຕ່ລະວັນ ແລະ ເພື່ອໃຊ້ໃນການໂຄສະນາປະກາດຂ່າວຄາວບໍລິການຮັບໃຊ້ໃນພາລະກິດສ້າງສາພັດທະນາປະເທດຊາດໃນແຕ່ລະທ້ອງຖິ່ນເຂດແຂວງຢ່າງກວ້າງຂວາງ.

ອີກປະການໜຶ່ງ ເພື່ອຮັບປະກັນໃຫ້ຂໍ້ມູນຂ່າວສານໄດ້ເຂົ້າເຖິງປະຊາຊົນໃນທຸກທ້ອງຖິ່ນຮາກຖານບັນດາສື່ສິ່ງພິມຕ່າງໆເຊັ່ນ: ໜັງສືພິມລາຍວັນ, ວາລະສານຕ່າງໆກໍໄດ້ແຈກຢາຍຮັບໃຊ້ສັງຄົມໃນແຕ່ລະວັນ ນັບແຕ່ຕົວເມືອງເຖິງຊົນນະບົດ. ອັນທີ່ໂດດເດັ່ນກວ່າໝູ່ໃນຍຸກພັດທະນາຄືປັດຈຸບັນນີ້ໄດ້ເກີດມີສື່ອອນລາຍທີ່ວ່ອງໄວທັນສະໄໝ ສາມາດຮັບຮູ້ຂໍ້ມູນຂ່າວສານສະພາບການສ້າງສາພັດທະນາປະເທດຊາດ ແລະ ສະພາບການປ່ຽນແປງໃນດ້ານຕ່າງໆຂອງໂລກ, ພາກພື້ນ ແລະ ສາກົນໄດ້ເປັນຢ່າງດີ ທັງວ່ອງໄວທັນໃຈ.

ເຖິງຢ່າງໃດກໍດີ, ໃນເງື່ອນໄຂປັດຈຸບັນ ອີງໃສ່ການປ່ຽນແປງຂອງໂລກ ເຊິ່ງມີທັງອັນກ້າວໜ້າ ແລະ ຫຍໍ້ທໍ້ ໂດຍສະເພາະແມ່ນການລະບາດຂອງພະຍາດໂຄວິດ-19 ສື່ມວນຊົນລາວຕ້ອງໄດ້ສຳເລັດໜ້າທີ່ອັນສຳຄັນໃນສະເພາະໜ້າ ແລະ ຍາວນານ ເປັນຕົ້ນຈັດຕັ້ງຜັນຂະຫຍາຍມະຕິຄັ້ງທີ XI ຂອງພັກ, ນຳເອົາຜົນສຳເລັດໃນການສ້າງສາພັດທະນາປະເທດຊາດອອກສູ່ສັງຄົມໃຫ້ກວ້າງຂວາງວ່ອງໄວທັນໃຈ ແລະ ອັນສຳຄັນທີ່ສຸດອັນໜຶ່ງກໍແມ່ນຕອບຕ້ານອິດທິກຳລັງປໍລະປັກທີ່ເຂົາພະຍາຍາມມ້າງເພທຳລາຍຄວາມສະຫງົບສຸກຂອງບ້ານເມືອງ.