ເຈົ້າໜ້າທີ່ ປກສ ນະຄອນໄກສອນພົມວິຫານມ້າງຄະດີຢາເສດຕິດຈັບຜູ້ຖືກຫາໄດ້ 11 ຄົນພ້ອມຂອງກາງຫຼາຍລາຍການ
ໃນໄລຍະເວລາພຽງ 15 ວັນ, ຄື: ວັນທີ 15 – 30 ກໍລະກົດ 2021 ເຈົ້າໜ້າທີ່ ປກສ ນະຄອນໄກສອນພົມວິຫານ, ແຂວງສະຫວັນນະເຂດ ສາມາດມ້າງເຄືອຂ່າຍຄ້າຂາຍຢາເສບຕິດລາຍໃຫຍ່ ແລະ ສາມາດຈັບຕົວຜູ້ຖືກຫາມາດຳເນີນຄະດີໄດ້ 11 ຄົນພ້ອມຂອງກາງເປັນຢາບ້າ, ອາວຸດ, ໂທລະສັບ, ລົດ ແລະ ເງິນສົດຈຳນວນຫຼາຍລາຍການ.
ຕາມການລາຍງານຂອງເຈົ້າໜ້າທີ່ໃຫ້ຮູ້ວ່າ: ໃນວັນທີ 15 ກໍລະກົດຜ່ານມານີ້, ເຈົ້າໜ້າທີ່ຕຳຫຼວດໄດ້ກັກຕົວເປົ້າໝາຍຄ້າຂາຍຢາເສບຕິດ (ຢາບ້າ) ໄດ້ 1 ຄົນຄື: ທ້າວຄອນສະໄໝ (ໂຈ້) ອາຍຸ 30 ປີອາຊີບວ່າງງານຢູ່ບ້ານນາເລົ່າ, ນະຄອນໄກສອນພົມວິຫານ, ເມື່ອກວດຄົ້ນກະເປົ໋າພາຍຂອງຜູ້ກ່ຽວໄດ້ພົບເຫັນປືນສັ້ນ (ຮັນລີ) ລຸ້ນ Ly 197119 ສີດຳ 1 ກະບອກ, ພ້ອມລູກກະສຸນ 25 ລູກ ແລະໂທລະສັບ 2 ເຄື່ອງ, ເຈົ້າໜ້າທີ່ຢຶດໄວ້ເປັນຂອງກາງ.ຈາກນັ້ນມາໃນວັນທີ 21 ກໍລະກົດ, ເຈົ້າໜ້າທີ່ສາມາດຂະຫຽາຍຜົນກັກຕົວເປົ້າໝາຍພົວພັນຢາເສບຕິດໄດ້ຕື່ມອີກ 2 ຄົນຄື: ທ້າວສີສົມພອນ (ແຕ) ອາຍຸ 22 ປີ, ອາຊີບວ່າງງານ, ຢູ່ບ້ານວຽງສະຫວັນນະຄອນໄກສອນພົມວິຫານ, ຜ່ານການກວດຄົ້ນຕົວເຈົ້າໜ້າທີ່ຢຶດໂທລະສັບ 1 ເຄື່ອງພ້ອມດ້ວຍລົດຈັກ 1 ຄັນ, ຜູ້ກ່ຽວແມ່ນຖືກຊັດທອດຈາກທ້າວບຸນເຮືອງ (ກ໋ອບ) ເຊິ່ງເປັນຄົນໄທທີ່ມີຂອງກາງຢາເສບຕິດ 27 ເມັດແລະຢາໄອສ໌ຈຳນວນ 1 ກ້ອນນ້ອຍ, ຈາກນັ້ນເຈົ້າໜ້າທີ່ໄດ້ສືບສວນ-ສອບສວນທ້າວສີສົມພອນ (ແຕ) ຢາເສບຕິດຈຳນວນດັ່ງກ່າວແມ່ນໄດ້ຊື້ມາມາຈາກທ້າວເດຊາ (ຫຼ້ານ້ອຍ) ອາຍຸ 22 ປີ, ອາຊີບວ່າງງານ, ຢູ່ບ້ານດົງດຳດວນນະຄອນໄກສອນພົມວິຫານ, ຕົກມາຮອດແລງວັນດຽວກັນເຈົ້າໜ້າທີ່ຈຶ່ງໄດ້ເຂົ້າກັກຕົວທ້າວເດຊາ (ຫຼ້ານ້ອຍ) ຢູ່ເສັ້ນທາງຂອບເຂດບ້ານສະພານເໜືອພ້ອມຂອງກາງຢາເສບຕິດ (ຢາບ້າ) 769 ເມັດ, ຢາເຄ 1 ຖົງນ້ອຍ, ໂທລະສັບມືຖື 1 ເຄື່ອງ, ລົດຈັກ 1 ຄັນ, ຈາກນັ້ນເຈົ້າໜ້າທີ່ໄດ້ນຳຕົວຜູ້ກ່ຽວໃຫ້ພາໄປກວດຄົ້ນເຄຫະສະຖານ (ຫ້ອງເຊົ່າ) ແລະໄດ້ພົບຂອງກາງຕື່ມອີກເປັນຢາບ້າ ຈຳນວນ 2.000 ເມັດ, ເຈົ້າໜ້າທີ່ຈຶ່ງໄດ້ຢຶດໄວ້ເປັນຂອງກາງເພື່ອດຳເນີນຄະດີຕໍ່ໄປ.
ມາຮອດວັນທີ 28 ກໍລະກົດເຈົ້າໜ້າທີ່ສາມາດກັກຕົວເປົ້າໝາຍທີ່ພົວພັນກັບເຄືອຂ່າຍຄ້າຂາຍຢາເສບຕິດດັ່ງກ່າວໄດ້ອີກ 4 ຄົນຄື: ທ້າວເບີ້ມອາຍຸ 23 ປີ, ອາຊີບກຳມະກອນຢູ່ບ້ານດົງນາຄຳພ້ອມຂອງກາງຢາບ້າ 78 ເມັດ, ໂທລະສັບມືຖື 1 ເຄື່ອງ, ຜູ້ທີ 2 ແມ່ນທ້າວສີວິໄຊ (ໄຊ) ອາຍຸ 27 ປີ, ອາຊີບກຳມະກອນ, ຢູ່ບ້ານດົງນາຄຳພ້ອມຂອງກາງຢາບ້າ 34 ເມັດ, ໂທລະສັບມືຖື 1 ເຄື່ອງ, ຜູ້ທີ 3 ທ້າວສີສະຫງວນ (ຫງວນ) ອາຍຸ 31 ປີ, ອາຊີບກຳມະກອນຢູ່ບ້ານດົງນາຄຳ, ນະຄອນໄກສອນພົມວິຫານ , ເຊິ່ງຜ່ານການສືບສວນ-ສອບສວນທ້າວເບີ້ມໄດ້ຮັບສາລະພາບວ່າ: ຢາບ້າຈຳນວນດັ່ງກ່າວແມ່ນຊື້ມາຈາກຜູ້ຖືກຫາຄົນທີ 4 ຄື: ທ້າວທ໋ອດອາຍຸ 25 ປີ, ອາຊີບວ່າງງານ, ຢູ່ບ້ານດົງນາຄຳ, ຈາກນັ້ນໃນເວລາ 14 ໂມງຂອງວັນດຽວກັນເຈົ້າໜ້າທີ່ຈຶ່ງໄດ້ເຂົ້າກັກຕົວທ້າວທ໋ອດພ້ອມຂອງກາງຢາບ້າ 9.494 ເມັດ, ໂທລະສັບ 2 ເຄື່ອງ. ຈາກນັ້ນເຈົ້າໜ້າທີ່ຈຶ່ງໄດ້ກັກຕົວຜູ້ຖືກຫາທັງໝົດພ້ອມຂອງກາງມາດຳເນີນຄະດີຕາມລະບຽບກົດໝາຍ ແລະ ມາຮອດວັນທີ 30 ກໍລະກົດເຈົ້າໜ້າທີ່ໄດ້ກັກຕົວເປົ້າໝາຍທີ່ພົວພັນກັບເຄືອຂ່າຍຄ້າຂາຍຢາເສບຕິດດັ່ງກ່າວໄດ້ອີກ 4 ຄົນຄື: ຜູ້ທີ 1 ທ້າວເລົ່າອາຍຸ 35 ປີ, ອາຊີບປະຊາຊົນ, ຢູ່ບ້ານຜັກຂະນະຄອນໄກສອນພົມວິຫານ, ຜູ້ທີ 2 ທ້າວແນັດອາຍຸ 29 ປີ, ອາຊີບປະຊາຊົນຢູ່ບ້ານຜັກຂະພ້ອມຂອງກາງຢາບ້າ 30 ເມັດ, ຜູ້ທີ 3 ທ້າວວຽງສະໄໝ (ຫຼ໋ອງ) ອາຍຸ 33 ປີ, ອາຊີບປະຊາຊົນຢູ່ບ້ານຜັກຂະ, ຜ່ານການກວດຄົ້ນເຮືອນຂອງຜູ້ກ່ຽວພົບຂອງກາງຢາບ້າ1.357 ເມັດ, ເງິນກີບ 12.520 ລ້ານກີບ, ເງິນບາດ 14.900 ບາດ, ໂທລະສັບ 1 ເຄື່ອງ, ຜູ້ທີ 4 ທ້າວແສງສຸລີ (ແສງ) ອາຍຸ 29 ປີ, ອາຊີບວ່າງງານ, ຢູ່ບ້ານຊອກມີຂອງກາງຢາບ້າ 2.000 ເມັດ, ໂທລະສັບ 1 ເຄື່ອງ, ລົດຈັກ 1 ຄັນ.
ຈາກນັ້ນທ້າວແສງສຸລີຍັງໄດ້ຮັບສາລະພາບຕື່ມວ່າ: ສຳລັບຢາບ້າຈຳນວນດັ່ງກ່າວຕົນເອງແມ່ນໄດ້ຮັບມາຈາກທ້າວສະໝານ (ໝານ) ອາຍຸ 29 ປີ, ອາຊີບວ່າງງານຢູ່ບ້ານຍາງສູງ, ຈາກນັ້ນ ຜູ້ກ່ຽວໄດ້ເອົາຕົວຫຼົບໜີ, ຜ່ານການກວດຄົ້ນຫ້ອງນອນຜູ້ກ່ຽວ ພົບເຫັນຢາເສບຕິດປະເພດຢາໄອສ໌ 4 ຖົງນ້ອຍ, ປືນສັ້ນລຸ້ນກ໋ອກ 17 ຈຳນວນ 1 ກະບອກພ້ອມລູກກະສຸນ 1 ລູກ, ເງິນ 2,5 ລ້ານກີບ, ເງິນບາດ 5.900 ບາດ. ປະຈຸບັນທາງເຈົ້າໜ້າທີ່ກຳລັງຕິດຕາມຈັບກຸມຜູ້ກ່ຽວມາດຳເນີນຄະດີຕາມຂະບວນຍຸຕິທຳຕໍ່ໄປ.
