ດ່ວນ! ແຂວງຈຳປາສັກເພີ່ມມາດຕະການເຂັ້ມງວດປ້ອງກັນໂຄວິດ-19

ໃນວັນທີ 22 ກໍລະກົດ 2021 ຜ່ານມາ, ທ່ານ ວັນນະໄຊ ຊາດຕະກຸນ ຫົວໜ້າຫ້ອງວ່າການແຂວ, ຫົວໜ້າກອງເລຂາສະເພາະກິດຂັ້ນແຂວງ ໄດ້ອອກແຈ້ງການດ່ວນທີ່ສຸດຂອງແຂວງເຖິງຫົວໜ້າພະແນກສາທາລະນະສຸກ ເອົາໃຈໃສ່ລາຍງານສະພາບການລະບາດ ແລະ ວາງມາດຕະການສະກັດກັ້ນ, ປ້ອງກັນ ແລະ ຄວາມຄຸມການລະບາດຂອງພະຍາດໂຄວິດ-19 ໃນແຂວງຈໍາປາສັກ ເພື່ອຮັບປະກັນບໍ່ໃຫ້ແພ່ລະບາດອອກສູ່ຊຸມຊົນໃນວົງກວ້າງ, ເນື່ອງຈາກວ່າປັດຈຸບັນ ແຂວງຈຳປາສັກ ມີແຮງງານລາວເດີນທາງກັບມາຈາກປະເທດໃກ້ຄຽງເປັນຈຳນວນຫລວງຫລາຍ ແລະ ເຮັດໃຫ້ມີຜູ້ຕິດເຊື້ອຈາກແຮງງານນຳເຂົ້ານັບມື້ຫລາຍສີບຄົນ ແລະ ໃຫ້ເອົາໃຈໃສ່ຄື:

1. ໃຫ້ກໍານົດເຂດທີ່ເປັນບ້ານແດງ ແລະ ບ້ານເຫລືອງ ເພື່ອປະຕິບັດມາດຕະການຕ່າງໆທີ່ ກະຊວງສາທາລະນະສຸກວາງອອກຢ່າງເຂັ້ມງວດ ພ້ອມທັງການລາຍງານເຂດແດງ ແລະ ເຂດເຫລືອງໃຫ້ປະຊາຊົນທົ່ວສັງຄົມໄດ້ຮັບໃນແຕ່ລະວັນຢ່າງທັນການ.

2. ໃຫ້ແຈ້ງຜົນການສອບສວນການລະບາດຂອງພະຍາດ ເຊັ່ນ: ຜູ້ສຳຜັດໃກ້ຊິດກັບຜູ້ຕິດເຊື້ອທີ່ມີການເຄື່ອນໄຫວສະຖານທີ່ຕ່າງໆ ເພື່ອແຈ້ງໃຫ້ສັງຄົມຮັບຊາບ ແລະ ເປັນຂໍ້ມູນອ້າງອີງໃຫ້ອົງການປົກຄອງບ້ານໄດ້ປະຕິບັດມາດຕະການຕາມທີ່ກະຊວງສາທາລະນະສຸກວາງອອກ ແລະ 10 ມາດຕະການຂັ້ນບ້ານ.

3. ໃຫ້ລາຍງານສະພາບການລະບາດ ແລະ ຕົວເລກສະຖິຕິດ້ານສາທາລະນະສຸກ ເພື່ອໃຫ້ຄະນະກໍາມະການຂັ້ນແຂວງໄດ້ຮັບຊາບ ແລະ ຄຳແນະນໍາທາງດ້ານວິຊາການ ເພື່ອເປັນບ່ອນອີງໃຫ້ແກ່ຄະນະກໍາມະການສະເພາະກິດຂັ້ນແຂວງຊີ້ນໍາບັນຊາໃຫ້ທັນກັບສະພາບການ.