ປກສ ແຂວງບໍ່ແກ້ວ ຈັບກຸມ ກຸ່ມແກ້ງຄ້າ-ຂາຍຢາເສບຕິດລາຍໃຫຍ່ ພ້ອມຂອງກາງຈຳນວນຫລາຍ

ອີງຕາມໜັງສືພິມ ແຂວງບໍ່ແກ້ວ ລາຍງານວ່າ:  ວັນທີ 21 ກໍລະກົດ 2021 ຜ່ານມາ ເຈົ້າໜ້າທີ່ ປກສ ແຂວງບໍ່ແກ້ວ ສົມທົບກັບ ກອງບັນຊາການ ປກສ ເມືອງຕົ້ນເຜິ້ງ ເຂົ້າຈັບກຸມເປົ້າໝາຍຄ້າ-ຂາຍຢາເສບຕິດ ຢູ່ບ້ານມອມ ເມືອງຕົ້ນເຜິ້ງ ແຂວງບໍ່ແກ້ວ ສາມາດກັກຕົວເປົ້າໝາຍໄດ້ 1 ຄົນ ຊື່ທ້າວ ສົມຈິດ ແກ້ວໃຈ ພ້ອມທັງໄດ້ກວດຄົ້ນເຮືອນຂອງຜູ້ກ່ຽວ ໄດ້ພົບເຫັນຂອງກາງຢາເສບຕິດຄື: ຢາໄອສ ຈຳນວນ 2 ເປົ່າເທົ່າກັບ 40 ຫໍ່ໜັກ 40 ກິໂລກຼາມ, ໂທລະສັບ 1 ໜ່ວຍ, ຜ່ານການສືບສວນ-ສອບສວນ ທ້າວ ສົມຈິດ ໄດ້ໃຫ້ການຊັດທອດເຖິງຜູ້ເຂົ້າຮ່ວມຂະບວນການອີກ 2 ຄື: ທ້າວ ໄມ່ແອ່ນ ອາຍຸປະມານ 29 ປີ, ອາຊີບເຮັດນາ ຢູ່ບ້ານມອມ ເມືອງຕົ້ນເຜິ້ງ ແຂວງບໍ່ແກ້ວ ແລະ ທ້າວ ຍອດແສງ ແສງສະຫວັນ ອາຍຸ 26 ປີ ຢູ່ບ້ານ ສີດອນມີ, ເມືອງຕົ້ນເຜິ້ງ ແຂວງບໍ່ແກ້ວ.

ຫລັງຈາກໄດ້ຮັບຂໍ້ມູນຜູ້ຮ່ວມຂະບວນການຈຶ່ງໄດ້ນຳກຳລັງໄປກັກໂຕ ທ້າວ ຍອດແສງ ແສງສະຫວັນ ຢູ່ບ້ານ ສີດອນມີ ເມືອງຕົ້ນເຜິ້ງ ພ້ອມທັງກວດຄົ້ນເຮືອນຂອງຜູ້ກຽ່ວພົບເຫັນຂອງກາງຄື: ຢາບ້າຈຳນວນ 367 ມັດ, 7 ຖັງນ້ອຍ, 147 ເມັດ ເທົ່າກັບ 735.547 ເມັດ, ມີນໍ້າໜັກ 73,5 ກິໂລ, ປືນເບີ 1 ກະບອກ ພ້ອມລູກ 24 ລູກ, ເຮືອກາບ 1 ລໍາ, ໂທລະສັບ 2 ໜ່ວຍ ແລະ ໄດ້ກຳລັງໄປກວດຄົ້ນເຮືອນຂອງທ້າວ ໄມ່ແອ່ນ ແຕ່ບໍ່ພົບໂຕ ແລະ ໄດ້ກວດຄົ້ນເຮືອນຜູ້ກ່ຽວບໍ່ພົບເຫັນສິ່ງທີ່ຜິດກົດໝາຍ.

ປະຈຸບັນທາງເຈົ້າໜ້າທີ່ພວມດຳເນີນການສືບສວນ-ສອບສວນ ເພື່ອຂະຫຍາຍຜົນຊອກຫາກຸ່ມແກ້ງຜູ້ຮ່ວມຂະບວນການທີ່ເອົາຕົວລົບໜີມາດຳເນີນຄະດີຕາມລະບຽບກົດໝາຍ.