ຫວຽດນາມຍົກລະດັບມາດຕະການທາງສັງຄົມ

ກະຊວງສາທາລະສະສຸກຂອງຫວຽດນາມໄດ້ລາຍງານຍອດຜູ້ຕິດເຊື້ອໂຄວິດ-19 ວັນເສົາ 19 ກໍລະກົດ 2021 ນີ້ ມີຜູ້ຕິດເຊື້ອສູງເຖິງ 4.843 ຄົນ ເຊິ່ງເປັນຍອດທໍາລາຍສະຖິຕິເດີມທີ່ເຄີຍສູງສຸດໃນວັນທີ 18 ກໍລະກົດ ຜ່ານມາແມ່ນ 4.710 ຄົນ ແລະ ໄດ້ຍົກລະດັບຄຸມເຂັ້ມ ເພາະຢ້ານຈະເອົາບໍ່ຢູ່.

ໂຕເລກຜູ້ຕິດເຊື້ອປະຈຳວັນທີ 17 ກໍລະກົດ ຜ່ານມາແມ່ນ: 3.718 ຄົນ, ໃນນັ້ນ 3.705 ຄົນຊຸມຊົນ ແລະ ເປັນຜູ້ຕິດເຊື້ອຜູ້ເດີນທາງມາຈາກຕ່າງປະເທດ 13 ຄົນ, ເຮັດໃຫ້ຍອດຜູ້ຕິດເຊື້ອສະສົມຂອງປະເທດລວມ 47.904 ຄົນ, ຂະນະຜູ້ເສຍຊິວິດຢູ່ທີ່ 225 ຄົນ, ສ່ວນຍອດຜູ້ຕິດເຊື້ອໂຄວິດ-19 ທີ່ປິ່ນຜົວດີແລ້ວ 10.312 ຄົນ.

ສຳລັບພື້ນທີ່ທີ່ຕິດເຊື້ອໃນຊຸມຊົນ ສ່ວນຫຼາຍແມ່ນຢູ່ທາງພາກໃຕ້ຂອງປະເທດ ໂດຍພົບໃນນະຄອນໂຮຈິມິນ 2.786 ຄົນ, ໃນແຂວງ ດົງທາບ ອີກ 180 ຄົນ ແລະ ແຂວງ ລອງອານ 134 ຄົນ.

ທ່ານນາຍົກລັດຖະມົນຕີ ຫວຽດນາມ ຟາມມິງ ຈິງ ໄດ້ສັ່ງການໃຫ້ບັນດາແຂວງທາງຳາກໃຕ້ອີກ 16 ແຂວງຕ້ອງບັງຄັບໃຊ້ມາດຕະການເວັ້ນໄລຍະຫ່າງທາງສັງຄົມທີ່ເຂັ້ມງວດທີ່ສຸດເປັນເວລາ 14 ວັນ ເລີ່ມແຕ່ວັນທີ 19 ກໍລະກົດ 2021 ນີ້ເປັນຕົ້ນໄປ ເພື່ອຄຸມສະຖານະການການລະບາດໃນພື້ນທີ່ທາງພາກໃຕ້ຂອງປະເທດ ຊຶ່ງຈະສົ່ງຜົນໃຫ້ປະຊາຊົນຕ້ອງຢູ່ແຕ່ໃນເຮືອນ ແລະ ສາມາດອອກໄປໄດ້ເມື່ອມີຄວາມຈຳເປັນເທົ່ານັ້ນ.