ສິງກະໂປສົ່ງເຮືອບິນ-ໂດຣນ ຊ່ວຍຟີລິບປິນຕໍ່ສູ້ກຸ່ມກໍ່ການຮ້າຍ
ກະຊວງປ້ອງກັນປະເທດສິງກະໂປເປີດເຜີຍວ່າ: ທາງການໄດ້ຈັດສົ່ງເຮືອບິນລຳລຽງ, ໂດຣນກວດກາ ແລະ ສິ່ງອຳນວຍຄວາມສະດວກກ່ຽວກັບການເຝິກແອບໃຫ້ແກ່ຟີລິບປິນ ເພື່ອສະໜັບສະໜູນໃນການຕໍ່ສູ້ກັບໄພຄຸກຄາມຈາກກຸ່ມຕິດອາວຸດອິດສະລາມ.
ທ່ານ ອິ້ງ ເອງ ເຮນ ລັດຖະມົນຕີວ່າການກະຊວງປ້ອງກັນປະເທດຂອງສິງກະໂປ ແລະ ທ່ານ ເດລຟິນ ລໍເຣນຊານາ ລັດຖະມົນຕີວ່າການກະຊວງປ້ອງກັນປະເທດຂອງຟີລິບປິນ ພົບປະກັນໃນຕົ້ນອາທິດຜ່ານມາ ແລະ ກ່າວວ່າ: ສິງກະໂປກຳລັງສ່ຽງຕໍ່ໄພຄຸກຄາມຈາມກໍ່ການຮ້າຍລະດັບສູງສຸດໃນໄລຍະປີຜ່ານມາ ໂດຍສະເພາະພາຍຫລັງເກີດເຫດກຸ່ມຕິດອາວຸດທີ່ກ່ຽວຂ້ອງກັບກຸ່ມລັດອິດສະລາມ ຫລື IS ບຸກຍຶດເມືອງມາລາວີ ຢູ່ເກາະມິນດາເນົາ ທາງຕອນໃຕ້ຂອງຟີລິບປິນ.
ກະຊວງປ້ອງກັນປະເທດສິງກະໂປ ອອກຖະແຫລງການລະບຸວ່າ: ຂະນະທີ່ເຊື່ອວ່າສະຖານະການຄວາມບໍ່ສະຫງົບຢູ່ເມືອງມາລາວີກຳລັງຈະກັບຄືນສູ່ສະພາບປົກກະຕິໃນໄວໆນີ້, ແຕ່ຍັງຕ້ອງມີຄວາມພະຍາຍາມເພື່ອເຮັດໃຫ້ເກີດຄວາມເຊື່ອໝັ້ນວ່າ: ຈະບໍ່ມີກຸ່ມກໍ່ການຮ້າຍອື່ນໆຫລົງເຫລືອຢູ່ໃນພື້ນທີ່ທາງຕອນໃຕ້ຂອງຟີລິບປິນ ເພາະບັນຫາດັ່ງກ່າວຈະສົ່ງຜົນກະທົບຕໍ່ຄວາມມີສະຖຽນລະພາບຂອງປະເທດອື່ນໆໃນອາຊຽນ.
