ຄະນະບໍລິຫານງານພັກ ກະຊວງການເງິນເນັ້ນສະຕິເປັນເຈົ້າການປະຕິບັດກົດໝາຍ ແລະ ລະບຽບການ, ພ້ອມສະກັດກັ້ນ ແລະ ຕ້ານພຶດຕິກຳ ເຊື່ອງອຳລາຍຮັບ

ໂດຍປະຕິບັດຕາມແຈ້ງການແນະນຳ ສະບັບເລກທີ 44/ຄກສພ, ລົງວັນທີ 15 ກຸມພາ 2021 ກ່ຽວກັບການຈັດຕັ້ງຜັນຂະຫຍາຍເນື້ອໃນຈິດກອງປະຊຸມວຽກງານກວດກາທົ່ວປະເທດ ປະຈຳປີ 2020 ແລະ 5 ປີ 2016-2020.
ໃນວັນທີ 8 ກໍລະກົດ 2021 ທີ່ກະຊວງການເງິນ, ຄະນະບໍລິຫານງານພັກ ກະຊວງການເງິນ, ໄດ້ຈັດກອງປະຊຸມເຜີຍແຜ່ເນື້ອໃນຈິດວຽກງານກວດກາທົ່ວປະເທດ ຂອງຄະນະກວດກາສູນກາງພັກ ປະຈຳປີ 2020ໂດຍເປັນປະທານຂອງສະຫາຍ ປອ ພູທະນູເພັດ ໄຊສົມບັດ ຄະນະປະຈຳພັກ, ປະທານຄະນະກວດກາ ຄະນະບໍລິຫານງານພັກ ກະຊວງການເງິນ, ມີບັນດາສະຫາຍເລຂາຄະນະພັກຮາກຖານ,ເລຂາໜ່ວຍພັກເອກະລາດ, ຄະນະໜ່ວຍພັກທີ່ຂຶ້ນກັບຄະນະພັກຮາກຖານ ກະຊວງການເງິນເຂົ້າຮ່ວມ.

ໂອກາດນີ້, ສະຫາຍ ປອ ພູທະນູເພັດ ໄຊສົມບັດ ໄດ້ມີຄຳເຫັນກ່າວເປີດກອງປະຊຸມກ່ຽວກັບການເຜີຍແຜ່ເນື້ອໃນຈິດໃຈວຽກງານກວດກາທົ່ວປະເທດ, ຊຶ່ງເປັນການສະຫຼຸບຕີລາຄາວຽກງານກວດກາປີ 2020 ແລະ ທິດທາງແຜນການປີ 2021 ຂອງຄະນະກວດກາສູນກາງພັກ, ອົງການກວດກາລັດຖະບານເວົ້າລວມ ເວົ້າສະເພາະວຽກງານກວດກາຮອບດ້ານຂອງຄະນະບໍລິຫານງານພັກ ກະຊວງການເງິນແຕ່ນີ້ຮອດປີ 2025.

ຄຽງຄູ່ກັນນີ້, ວຽກງານກວດກາເປັນວຽກທີ່ສອດຫ້ອຍ ແລະ ຄຽງຄູ່ກັບທຸກຂົງເຂດວຽກງານໂດຍສະເພາະວຽກງານກວດກາຂົງເຂດການເງິນແມ່ນມີຄວາມສຳຄັນຫຼາຍຕໍ່ການຊີ້ນຳ-ນໍາພາຂອງຄະນະພັກກະຊວງການເງິນ, ການຄຸ້ມຄອງເກັບລາຍຮັບ ແລະ ຄຸ້ມຄອງລາຍຈ່າຍງົບປະມານ, ສ້າງບັນທັດຖານໃຫ້ແກ່ການປະຕິບັດໜ້າທີ່ວຽກງານຂອງພະນັກງານລັດຖະກອນໃນຂະແໜງການເງິນ ໃຫ້ມີສະຕິເປັນເຈົ້າການປະຕິບັດກົດໝາຍ ແລະ ລະບຽບການຕ່າງໆໃນຂົງເຂດການເງິນຢ່າງເຂັ້ມງວດ, ລວມທັງການສະກັດກັ້ນ ແລະ ຕ້ານພຶດຕິກຳທີ່ເປັນການເຊື່ອງອຳລາຍຮັບ, ຫຼົບຫຼີກການປະຕິບັດພັນທະຕໍ່ງົບປະມານຂອງຜູ້ປະກອບການ ແລະການກວດກາກໍ່ເປັນການຊຸກຍູ້ສົ່ງເສີມໃຫ້ບັນດາວິສາຫະກິດເຂົ້າສູ່ການເຄື່ອນ
ໄຫວທຸລະກິດທີ່ສະເໝີພາບກັນຕາມລະບຽບກົດໝາຍ.

ໃນກອງປະຊຸມເຜີຍແຜ່ເນື້ອໃນຈິດໃຈວຽກງານກວດກາທົ່ວປະເທດ ຂອງຄະນະກວດກາສູນກາງພັກ ປະຈຳປີ 2020 ໄດ້ຮັບຟັງການຜ່ານບົດສະຫຼຸບວຽກງານກວດກາ 5 ປີຂອງຄະນະກວດກາ ກະຊວງການເງິນ, ບົດສະຫຼຸບວຽກງານກວດກາທົ່ວປະເທດປະຈຳປີ 2020 ແລະ 5 ປີ (2016-2020) ຂອງຄະນະກວດກາສູນກາງພັກ, ອົງການກວດກາລັດຖະບານ, ຂໍ້ກຳນົດວ່າດ້ວຍການຈັດຕັ້ງ ແລະ ການ ເຄື່ອນໄຫວຂອງຄະນະກວດກາພັກກະຊວງການເງິນ.