ສະມາຄົມນັກຂ່າວແຫ່ງ ສປປ ລາວ ສົ່ງສານຊົມເຊີຍ ເນື່ອງໃນໂອກາດວັນສ້າງຕັ້ງພັກຄອມມູນິດຈີນຄົບຮອບ100 ປີ

ໃນວັນທີ 30 ມິຖຸນາ 2021 ຜ່ານມາ, ທ່ານ ສະຫວັນຄອນ ຣາຊມຸນຕຣີ ປະທານສະມາຄົມນັກຂ່າວແຫ່ງ ສປປ ລາວ ໄດ້ສົ່ງສານຊົມເຊີຍ ເນື່ອງໃນໂອກາດວັນສ້າງຕັ້ງພັກຄອມມູນິດຈີນຄົບຮອບ 100 ປີ ເຖິງທ່ານ ຊາງຢັນນອງ ປະທານສະມາຄົມນັກຂ່າວແຫ່ງ ປະເທດຈີນ ເຊິ່ງເນື້ອໃນສານມີດັ່ງນີ້:

ເນື່ອງໃນໂອກາດຄົບຮອບ 100 ປີ ວັນສ້າງຕັ້ງພັກຄອມມູນິດຈີນ, ຕາງໜ້າໃຫ້ສະມາຄົມນັກຂ່າວແຫ່ງ ສປປ ລາວ ແລະ ໃນນາມສ່ວນຕົວ ຂ້າພະເຈົ້າຖືເປັນກຽດສົ່ງຄວາມຊົມເຊີຍຢ່າງອົບອຸ່ນ ແລະ ອວຍພອນ ໄຊອັນປະເສີດມາຍັງ ທ່ານ ແລະ ສົ່ງຜ່ານທ່ານໄປຍັງສະມາຊິກສະມາຄົມນັກຂ່າວລວມທັງປະຊາຊົນຈີນທຸກທົ່ວໜ້າຈົ່ງມີສຸຂະພາບເຂັ້ມແຂງ ແລະ ມີຄວາມຜາສຸກ.

ນັບແຕ່ມື້ສ້າງຕັ້ງພັກກອມມູນິດຈີນ, ພັກໄດ້ເຕີບໃຫຍ່ເຂັ້ມແຂງ ຢ່າງບໍ່ຢຸດຢັ້ງ ແລະ ນໍາພາປະຊາຊົນຈີນຜ່ານຜ່າການທົດສອບທີ່ດຸເດືອດຂ້ຽວຂາດ ໃນແປວໄຟປະຕິວັດ, ສ້າງວິລະກຳອັນລໍ້າເລີດ ແລະ ຍາດໄດ້ໄຊຊະນະອັນໃຫຍ່ຫຼວງ, ມີຄວາມໝາຍປະຫວັດສາດ, ເຮັດສໍາເລັດການປະຕິວັດປົດປ່ອຍຊາດ ແລະ ສະຖາປະນາ ສາທາລະນະລັດ ປະຊາຊົນຈີນ ຢ່າງສະຫງ່າຜ່າເຜີຍ ໃນປີ 1949, ອັນນີ້ໄດ້ເປີດສັງກາດໃໝ່ແຫ່ງການສ້າງສາພັດທະນາປະເທດຊາດຕາມເສັ້ນທາງສັງຄົມນິຍົມ.

ບົນພື້ນຖານອັນໜັກແໜ້ນເຫຼົ່ານີ້ແມ່ນໄດ້ສືບຕໍ່ພັດທະນາລະບອບສັງຄົມນິຍົມຕາມລັກສະນະສີສັນຂອງຈີນ, ພາຍໃຕ້ການນໍາພາຂອງພັກກອມມູນິດຈີນ ແລະ ການຊີ້ນໍາບັນຊາໂດຍ ກົງຂອງເລຂາທິກາໃຫຍ່ ແລະ ປະທານປະເທດແຫ່ງ ສປ ຈີນ ທ່ານ ສີຈິ້ນຜິງ ໄດ້ເຮັດໃຫ້ປະເທດຈີນ ມີການພັດທະນາຢ່າງຮອບດ້ານ ດ້ວຍຄຸນນະພາບໃໝ່ ແລະ ເຮັດໃຫ້ບົດບາດອິດທິພົນຂອງຈີນນັບມື້ສູງເດັ່ນຂຶ້ນໃນເວທີພາກພື້ນ ແລະ ສາກົນ.

ສື່ມວນຊົນ, ຕະຫຼອດຫຼາຍປີຜ່ານ ມາພາຍໃຕ້ການນໍາພາຂອງທ່ານ, ອົງການສື່ມວນຊົນຂອງພວກເຮົາ ທັງສອງໄດ້ຮັບໝາກຜົນດ້ວຍຄວາມປິຕິຍິນດີໃນການຮ່ວມ ມືໃນຖານະເພື່ອນມິດສະຫາຍເກົ່າ. ສະນັ້ນ, ຂ້າພະເຈົ້າເຊື່ອໝັ້ນວ່າ ນີ້ຈະຊ່ວຍຜູກແໜ້ນແລະພັດທະນາພັດທະນາຮ່ວມກັນໃນອະນາຄົດຕໍ່ໄປ.

ຂ້າພະເຈົ້າຫວັງວ່າ ຈະໄດ້ຮ່ວມກິດຈະກໍາຕ່າງໆລວມທັງການແລກປ່ຽນການຢ້ຽມຢາມ, ການຝຶກອົບຮົມ ພາຍຫຼັງທີ່ບໍ່ມີການລະບາດຂອງພະຍາດໂຄວິດ.