ໜ້າເປັນຫ່ວງ ລາວອາດຈະປະເຊີນກັບໂຄວິດ-19 ກາຍພັນຊະນິດຕ່າງໆ ນັບມື້ຫລາຍຂຶ້ນ ຖ້າບໍ່ມີການສະກັດກັ້ນຢ່າງຈິງຈັງ

ໂດຍ: ລູກເມືອງພວນ

ຂະນະນີ້ ເຖິງແມ່ນວ່າການລະບາດໂຄວິດ-19 ຮອບ 2 ໃນລາວ ຈະມີທ່າອ່ຽງຫລຸດລົງເມື່ອທຽບໃສ່ໃນລະຫວ່າງເດືອນເມສາ ທີ່ຜ່ານມາກໍຕາມ, ແຕ່ທີ່ໜ້າເປັນຫ່ວງກໍຄືລາວເຮົາພົບໂຄວິດ-19 ກາຍພັນແລ້ວ 2 ຊະນິດ ໃນໄລຍະ 2-3 ວັນທີ່ຜ່ານມາ: ໂຄວິດ-19 ກາຍພັນ ເດລຕາ ກາປາ ແລະ ຄາດວ່າຍັງຈະພົບຫລາຍໆສາຍພັນຕື່ມອີກ ຖ້າພວກເຮົາພີ່ນ້ອງປະຊາຊົນລາວ ແລະ ເຈົ້າໜ້າທີ່ຂອງອົງການຈັດຕັ້ງພັກ-ລັດ ບໍ່ເຂັ້ມງວດໃນການຄັດກອງ ຄົນເຂົ້າອອກເມືອງຢ່າງເຄັ່ງຄັດ ພ້ອມທັງປ້ອງກັນ ຕິດຕາມກວດກາຄົນລັກລອບເຂົ້າເມືອງຜິດກົດໝາຍຢ່າງຈິງຈັງ.

ບັນດາປະເທດເພື່ອນບ້ານໃກ້ຄຽງຕິດຈອດກັບລາວມີການລະບາດຮ້າຍແຮງ ແລະ ລ້ວນແຕ່ພົບເຫັນສາຍພັນຕ່າງໆ ເກີດຂຶ້ນແລ້ວ. ດັ່ງນັ້ນ ຖ້າລາວເຮັດບໍ່ເອົາໃຈໃສ່ປ້ອງກັນຢ່າງເຂັ້ມແຂງ ກໍຄົງຈະຫລີກລ່ຽງບໍ່ມົ້ມສາຍພັນຕ່າງໆ ຈະເຂົ້າມາລາວນັບມື້ນັບຫລາຍຂຶ້ນ. ດ້ານໜຶ່ງອີກ, ຂະນະນີ້ແຮງງານລາວກຳລັງແຫ່ກັນກັບຄືນປະເທດໂດຍຖືກຕ້ອງ ແລະ ບໍ່ຖືກຕ້ອງ ຈຶ່ງນັບວ່າມີຄວາມສ່ຽງສູງທີ່ຈະນຳເອົາເຊື້ອ ໄວຣັສກາຍພັນເຫລົ່ານັ້ນເຂົ້າມາພ້ອມ.

ດັ່ງທີ່ພວກເຮົາຮັບຮູ້ນຳກັນແລ້ວວ່າ ໂຄວິດ ກາຍພັນສາຍພັນຕ່າງໆນັ້ນລ້ວນແຕ່ມີວິວັດທະນາການ ທີ່ມີລັກສະນະຮຸນແຮງກວ່າເດີມ, ແພ່ເຊື້ອໄດ້ໄວ, ບໍ່ສະແດງອາການ ແຕ່ເມື່ອສະແດງອາການອອກມາກໍຖືວ່າຮ້າຍແຮງກວ່າທີ່ຈະຮັບມືໄດ້, ຈຳນວນຜູ້້ເສຍຊີວິດຈາກໂຄວິດ ກາຍພັນຊະນິດຕ່າງໆ ໃນໂລກນັບມື້ເພີ່ມຫລາຍຂຶ້ນ.

ຕໍ່ໜ້າສະພາບການດັ່ງກ່າວ, ລາວເຮົາຈຶ່ງມີຄວາສ່ຽງທີ່ຈະຕິດເຊື້ອໄວຣັສດັ່ງກ່າວນັບມື້ຫລາຍຂຶ້ນ. ເວົ້າແບບນີ້ບໍ່ແມ່ນເວົ້າໃຫ້ຕົກໃຈ ຫຼື ໃຫ້ແຕກຕື່ນແຕ່ຢ່າງໃດ ແຕ່ເວົ້າໃຫ້ທຸກຄົນເຫັນໄດ້ຄວາມອັນຕະລາຍທີ່ຈະເກີດຂຶ້ນ ເພື່ອພ້ອມກັນມີສະຕິໃນການປ້ອງກັນຕົວເອງ, ປະຕິບັດມາດຕະການຕ່າງໆທີ່ລັດຖະບານ, ຄະນະສະເພາະກິດ ແລະ ກະຊວງສາທາລະນະສຸກວາງອອກຢ່າງເຄັ່ງຄັດ.
ຖ້າພວກເຮົາຮ່ວມແຮງຮ່ວມໃຈ ພ້ອມກັນປະຕິບັດມາດຕະການຕ່າງໆ ທີ່ພວກເຮົາເຄີຍເວົ້າກັນຜ່ານມານັ້ນໄດ້ດີ ກໍຄົງຈະບໍ່ມີການສູນເສຍ ແລະ ຄວາມໂສກເສົ້າເສຍໃຈ ຈາກພະຍາດໂຄວິດ-19 ເກີດຂຶ້ນໃນປະເທດລາວອີກ.