ຕໍາແລ້ວໜີຜີໄລ່ນໍາ ກໍາຕາມສະໜອງ
ໂດຍ: ກ້ອງສ່ອງ ອິດສະຫລະ
ເທົ່າທີ່ຜູ້ຂຽນໄດ້ເຫັນຕົວຈິງ, ທັງໄດ້ຍິນໃນແຫລ່ງຂ່າວເວົ້າໄດ້ວ່າສະພາບແນວຄິດຈິດໃຈແລະ ການກະທໍາຂອງຄົນເຮົາດຽວນີ້ ບາງຄົນມັນກໍນັບມື້ເປື່ອຍເຍື່ອຍ ແລະ ເປັນໜ້າວິຕົກ.ອັນນີ້ມັນສະແດງໃຫ້ເຫັນເຖິງຄວາມເມດຕາຈິດ, ຄວາມສີວິໄລຂອງຄົນເຮົາໃນເງື່ອນໄຂທີ່ບ້ານເມືອງພວມມີຄວາມກ້າວໜ້າ ແລະ ພັດທະນາໄປຕາມຍຸກສະໄໝ. ສິ່ງທີ່ຜູ້ຂຽນຍົກມານີ້ໜຶ່ງໃນປາກົດການອັນໃໝ່ໆແປກໆທີ່ເກີດຂຶ້ນ ກໍຄືມີອຸປະຕິເຫດລົດຕໍາກັນຜູ້ທີ່ໄປຕໍາຄົນອື່ນຖືກບາດເຈັບ ຫລື ຕາຍແລ້ວປົບໜີໂດຍບໍ່ຫົວຊາຕໍ່ຄວາມຮັບຜິດຊອບ ຫລື ຄວາມຜິດທີ່ຕົນເອງໄດ້ກໍ່ຂຶ້ນ. ຕໍ່ເຫດການແບບນີ້ ຕາມຜູ້ຂຽນເຄີຍໄດ້ຍິນເຖົ້າແກ່ຄູບາອາຈານພາເວົ້າຕິດປາກກັນມາວ່າ: “ຕໍາຄົນຕາຍແລ້ວປົບໜີຜີກໍຈະໄລ່ນໍາ ກໍາກໍຕາມສະໜອງ” ບໍ່ໄວກໍຊ້າ. ປະໂຫຍກທີ່ວ່ານີ້ຖ້າຜູ້ໃດບໍ່ທັນເຊື່ອ ກໍຢ່າຟ້າວຫລົບລູ່ ເພາະກົດແຫ່ງກໍາມັນມີຈິງ ອັນຊະນິດທີ່ວ່າໂຕເອງຕໍາຄົນຕາຍແລ້ວປົບໜີຄະດີກໍຈະໜັກໜ່ວງ ແລະ ເພີ່ມຂຶ້ນ ຫລາຍກະໂທງ ໃນເມື່ອເຈົ້າໜ້າທີ່ຫາກຕາມລ່າຈັບຕົວມາດໍາເນີນຄະດີໄດ້. ຊາຜ່ານມາຜູ້ຂຽນເຄີຍເຫັນບໍ່ວັນໃດກໍວັນໜຶ່ງ, ບໍ່ໄວກໍຊ້າເຈົ້າໜ້າທີ່ຕ້ອງຊອກຫາຕາມລ່າຈັບໄດ້ແນ່ນອນ ຖ້າຜູ້ໃດບໍ່ທັນເຊື່ອກໍລອງຕິດຕາມເບິ່ງ ເພາະກົດໝາຍນັ້ນລະມັນຄືກົດແຫ່ງກໍາ.
ເມື່ອສາມອາທິດຜ່ານມາ, ມີຄົນຢູ່ບ້ານຂອງຜູ້ຂຽນເອງຖືກລົດຕໍາຕາຍຄາທີ່ໃນເວລາຕອນ ເດິກ. ຕາມການໃຫ້ຂໍ້ມູນຂອງຄົນທີ່ພົບເຫັນ ແລະ ຜ່ານການກວດກາກ້ອງວົງຈອນປິດເຫັນຜູ້ກ່ຽວກໍາລັງຂີ່ລົດຈັກຜ່ານສີ່ແຍກໄຟອໍານາດສີເຫລືອງເຕືອນມາບໆ ກໍພໍດີມີລົດກະບະແລ່ນມາສວນທາງຕໍາເອົາຜູ້ກ່ຽວຢ່າງແຮງ. ສ່ວນລົດໃຫຍ່ທີ່ຕໍານັ້ນກໍເປີດໜີອາດລາດໂດຍບໍ່ຫົວຊາຕໍ່ສິ່ງທີ່ເກີດຂຶ້ນ. ຕໍ່ມາກໍມີອີກມື້ໜຶ່ງເຊິ່ງຢູ່ໃກ້ໆກັບບ້ານຂອງຜູ້ຂຽນເອງໃນຂະນະທີ່ຊາຍໜຸ່ມຄົນໜຶ່ງພວມຂີ່ລົດຈັກໄປວຽກໃນເວລາຂ້ອນຄືນ, ຂີ່ລົດຈັກໄປດີໆຢູ່ບໍ່ຢູ່ກໍມີລົດໃຫຍ່ແລ່ນມາແຊງແລ້ວຕັ້ງແກ້ງເຈີດໄປໃສ່ຕໍາຜູ້ກ່ຽວຈົນຟົ້ງໄປຫລາຍແມັດ, ສ່ວນວ່າລົດໃຫຍ່ກໍປົບໜີໄປແບບໂກ້ໆ ໂດຍບໍ່ຫົວຊາ ແລະ ບໍ່ສົນໃຈກັບສິ່ງທີ່ເກີດຂຶ້ນ. ນອກຈາກເຫດການທີ່ຜູ້ຂຽນໄດ້ຍົກມານີ້ແລ້ວ ກໍຍັງມີ ຫລາຍໆເຫດການ, ມີຫລາຍບ່ອນ, ຫລາຍໝ້ອງທີ່ມີຂ່າວຄາວ ແລະ ຊ່າກັນວ່າລົດໃຫຍ່ຕໍາຄົນຂີ່ລົດຈັກຕາຍແລ້ວໜີ.
ຕາມຜູ້ຂຽນວ່າ, ນີ້ມັນເປັນປາກົດການໃໝ່ທີ່ເກີດຈາກຄົນທີ່ຂາດນ້ຳໃຈ, ຂາດຄວາມສີວິໄລໄຮ້ຄຸນນະທໍາຂອງຄົນຍຸກໂລກາພິ ວັດ. ໃນສະໄໝກ່ອນ, ເປີງປູ່ຍ່າຕານາຍ ຫລື ລຸ້ນພໍ່ແມ່ເຮົາແມ່ນບໍ່ເຄີຍມີ, ບໍ່ເຄີຍຫັນ ແລະ ບໍ່ເຄີຍໄດ້ຍິນເຂົາຊ່າກັນແບບນີ້. ໃນເຫດການທີ່ມັນເກີດແຕ່ລະຄັ້ງຫາງສຽງສ່ວນຫລາຍເຂົາກໍວ່າເປັນຍ້ອນດື່ມເຫລົ້າເບຍເມົາແລ້ວຂັບລົດ ວ່າຊັ້ນ !.
ເຖິງຢ່າງໃດກໍດີ, ຕາມທັດສະນະຂອງຜູ້ຂຽນວ່າເພື່ອເປັນການຫລີກເວັ້ນມັດຈຸລາດທີ່ມັນຈະມາເຊືອດເຮົາຢ່າງບໍ່ຮູ້ສຶກຕົວນັ້ນ ມັນກໍພໍມີທາງອອກ ຄືອັນທີໜຶ່ງ ໃນເວລາເດິກດື່ນຂ້ອນຄືນຖ້າບໍ່ຈໍາເປັນກໍບໍ່ຄວນອອກເຮືອນຊານ ເພາະຍາມກາງຄືນນັ້ນເປັນຍາມມັດຈຸລາດຊອກຕາມລ່າຂ້າຄົນ. ອັນສອງມາ ຖ້າກໍລະນີຈໍາເປັນຈະອອກໄປວຽກໄປງານໃນຕອນເດິກດື່ນເວລາຂັບຂີ່ລົດຈັກຕ້ອງປະສິດກັບຂອບທາງຕະຫລອດຢ່າຂີ່ກາງທາງເດັດຂາດ ເພາະພວກຊຽນເມົາທັງຫລາຍເວລາເພິ່ນຂີ່ລົດໃຫຍ່ມາເພິ່ນຈະບໍ່ເຫັນທີບເຫັນແດນອີ່ຫຍັງ ຂໍພຽງແຕ່ວ່າແມ່ນເສັ້ນທາງເພິ່ນກໍຢຽບຄັນເລັ່ງແບບໂຊເຟີຕີນຜີ ໂດຍບໍ່ສົນໃຈວ່າທາງເບື້ອງໜ້າ ຈະມີຫຍັງ ແລະ ຢຽບຮະໄປເລີຍ ອັນນີ້ລະມັນເປັນອັນຕະລາຍທີ່ສຸດ. ສ່ວນວ່າອັນທີສາມ ພວກເຮົາຕ້ອງພ້ອມກັນມາສຶກສາ ແລະ ເຂົ້າໃຈວ່າໃນເວລາເດິກດື່ນທ່ຽງຄືນນັ້ນເປັນໄລຍະເວລາທີ່ພວກຜີບໍລິສາດອອກຫາກິນກາງຄືນ ເປັນຕົ້ນພວກປຸ້ນຈີ້, ຂີ້ລັກງັດແງະ, ນັກເລງອັນຕະພານ, ເມື່ອເຂົາເຫັນເຮົາຂີ່ລົດໄປໂດດດ່ຽວເຂົາກໍສວຍໂອກາດປຸ້ນຈີ້ເອົາລົດ, ຈີ້ເອົາເງິນເອົາຄໍາ ຫລື ພວກມັນ ຕັ້ງຂີ່ລົດເຈີດມາຕໍາໃຫ້ເຮົາເຈັບ ຫລື ລົ້ມຕາຍໄປລ້າໆ. ນີ້ລະຄືຄວາມສ່ຽງບໍ່ປອດໄພໃນເວລາສັນຈອນຍາມເດິກ. ສະນັ້ນ ຖ້າຮູ້ສຶກວ່າຈະບໍ່ປອດໄພກໍບໍ່ຄວນໄປມາໃນຍາມກາງຄືນເດີກດື່ນ ຫລື ຖ້າຫາກໄປກໍຕ້ອງມີໝູ່ຄູ່ຫລາຍຄົນເມື່ອເກີດກໍລະນີສຸກເສີນ ຫລື ອຸປະຕິເຫດກໍຈະໄດ້ຊ່ວຍເຫລືອກັນໄດ້ທັນເວລາ.
